ခရီးသည်တင်ယာဉ်လိုင်းတွေကို အများပိုင်ယာဉ်လိုင်းစနစ်အဖြစ် စက်တင်ဘာမှာ စတင်ပြောင်းလဲမည်

ရန်ကုန်မြို့တွင်းပြေးဆွဲနေတဲ့ ခရီးသည်တင်ယာဉ်လိုင်းတွေကို အများပိုင်ယာဉ်လိုင်းစနစ်အဖြစ် စက်တင်ဘာလ မှာစတင်ပြောင်းလဲမယ်လို့ ရန်ကုန်တိုင်းဒေသကြီးဝန်ကြီးချုပ်ဦးဖြိုးမင်းသိန်းက ပြောကြားလိုက်တယ်လို့ သိရပါတယ်။

 ဇွန်လ (၁၉)ရက်နေ့က ခရီးသည်တင်ယာဉ်ပိုင်ရှင်တွေ နဲ့တွေ့ဆုံစဉ်ပြောကြားလိုက်တာဖြစ်တယ်လို့ တွေ့ဆုံပွဲကို တက်ရောက်ခဲ့တဲ့ ယာဉ်ပိုင်ရှင် တစ်ဦးဖြစ်သူ ကိုတရုတ်လေးက 5plus ကိုပြောပါတယ်။

 အများပိုင်ယာဉ်လိုင်း ကုမ္ပဏီတွေကိုတာဝန်ယူမှုတာဝန်ခံမှုနဲ့ လုပ်ကိုင်စေမှာဖြစ်သလို နဂိုစနစ်အတိုင်းသွားချင်တဲ့ ယာဉ်ပိုင်ရှင်တွေကို လည်း အတင်းအကျပ်ဖိအားမပေးပဲ အစိုးရအနေနဲ့ ကူညီဆောင်ရွက်ပေး သွားမယ်လို့ ၀န်ကြီးချုပ်က ပြောကြားခဲ့ကြောင်း ကိုတရုတ်လေးက ဆိုပါတယ်။

 ဒါ့အပြင် ရန်ကုန်မြို့တွင်း ပြေးဆွဲနေတဲ့ ခရီးသည် တင်ယာဉ်တွေနဲ့ တက်စီယာဉ်တွေကို စီမံခန့်ခွဲနိုင်ဖို့ သယ်ယူပို့ဆောင်ရေးအာဏာပိုင်အဖွဲ့ ဖွဲ့စည်းဖို့ စီစဉ်နေပြီး လက်ရှိရှိနေတဲ့ မော်တော်ယာဉ်လုပ်ငန်းပေါင်းစုံ ထိန်းသိမ်းရေးကြီးကြပ်မှုကော်မတီ (မ.ထ.သ) ကိုတော့ ဖျက်သိမ်းမယ့် သဘောမျိုး ပြောဆိုခဲ့တယ်လို့ သိရပါတယ်။

 ရန်ကုန်မြို့တွင်းသွားလာနေတဲ့ ယာဉ်တွေကို စောင့်ကြည့် ထိန်းချုပ်မယ့် control center ကိုလည်း ဖော်ဆောင်နေပြီး သြဂုတ်လအတွင်း ပြီးစီးမယ်လို့ ဆိုခဲ့ကြောင်း သိရပါတယ်။

 ဒါ့အပြင် ယာဉ်လုပ်သားတွေအကြားအခက်အခဲဖြစ်နေတဲ့ လိုင်စင်အနီအနက် သတ်မှတ်ထားတဲ့ ကိစ္စနဲ့ပတ်သက်ပြီးတော့လည်း ယာဉ်ကြီးမောင်းကျွမ်းကျင်မှုဆိုင်ရာနဲ့ ခရီးသည်တင်ဝန်ဆောင်မှု သင်တန်းတွေပေးနိုင်ဖို့ စီစဉ်ဆောင်ရွက်နေပြီး အဲဒီသင်တန်းဆင်း သူတွေအနေနဲ့ ဘယ်လိုင်စင်ကိုင်ထား သူဖြစ်စေခရီးသည်တင်ယာဉ်တွေ ကို မောင်းနှင်ခွင့်ရှိမယ်လို့လည်း ၀န်ကြီးချုပ်က ပြောကြားခဲ့တယ်လို့ သိရပါတယ်။

5 Plus News
https://www.facebook.com/5plusnews