ရွှေ့ပြောင်းနေထိုင်သူတွေနဲ့ အိမ်ထောင်စုစာရင်း

မွန်ပြည်နယ်လွှတ်တော်မှာ အစည်းအဝေးကျင်းပနေစဉ်။ Photo: Kyaw Lwin Oo/ RFA

ယာယီရွှေ့ပြောင်းနေထိုင်သူတွေမဟုတ်ဘဲ အပြီးတိုင်ရွှေ့ပြောင်းနေထိုင်သူတွေကိုသာ အစိုးရက အိမ်ထောင်စုစာရင်းချထားပေးသွားမှာဖြစ်တယ်လို့ မွန်ပြည်နယ် လူဝင်မှုကြီးကြပ်ရေးနဲ့ ပြည်သူ့ အင်အားဦးစီးဌာနဝန်ကြီး ဦးဝဏ္ဏကျော် က ဒီနေ့ ပြည်နယ်လွှတ်တော်မှာ တင်ပြပါတယ်။

ရွှေ့ပြောင်းလုပ်သားတွေကို အိမ်ထောင်စုစာရင်းချထားပေးဖို့ အစိုးရက စီစဉ်နေတာကို ရပ်ဆိုင်းပေးဖို့ အဆိုတင်ထားတာနဲ့ ပတ်သက်ပြီး ပြည်နယ်လွှတ်တော် မှာ ဆွေးနွေးရာ ပြည်နယ်ဝန်ကြီး ဦးဝဏ္ဏကျော် က ရှင်းပြခဲ့တာဖြစ်တယ်လို့ ပြည်နယ်လွှတ်တော်ကိုယ်စားလှယ် ဒေါက်တာ အောင်နိုင်ဦးက ပြောပါတယ်။

ပြီးခဲ့တဲ့နှစ်ရက်က မွန်ပြည်နယ် ချောင်းဆုံမြို့နယ် ပြည်နယ်လွှတ်တော်ကိုယ်စားလှယ် ဒေါက်တာ အောင်နိုင်ဦးက ဒေသတစ်ခုမှာ ၆ လနဲ့ အထက် ရွှေ့ပြောင်းနေထိုင်သူတွေကို အိမ်ထောင်စုစာရင်းတွေ ချထားပေးဖို့ အစိုးရက စီစဉ်နေတာကို ရပ်ဆိုင်းပေးဖို့ အဆိုတင်သွင်းခဲ့တာဖြစ်ပါတယ်။

အဲဒီအဆိုကို အမျိုးသားဒီမိုကရေစီအဖွဲ့ချုပ်၊ ပြည်ထောင်စုကြံခိုင်ရေး နဲ့ဖွံ့ဖြိုးရေးပါတီနဲ့ မွန်အမျိုးသား ပါတီက ကိုယ်စားလှယ်စုစုပေါင်း ၄ ဦး က ထောက်ခံဆွေးနွေးခဲ့ပါတယ်။

မွန်ပြည်နယ် လူဝင်မှုကြီးကြပ်ရေးနဲ့ ပြည်သူ့အင်အားဦးစီးဌာနဝန်ကြီး ဦးဝဏ္ဏကျော်က အစိုးရအနေနဲ့ ယာယီရွှေ့ပြောင်းနေထိုင်သူတွေကို အိမ်ထောင်စု စာရင်းချထားပေးမှာမဟုတ်တဲ့အတွက် ဒေါက်တာ အောင်နိုင်ဦးရဲ့ အဆိုကို လွှတ်တော်မှာ မှတ်တမ်းတင်ထားဖို့ တင်ပြခဲ့ရာ အဆိုကို လွှတ်တော်က မှတ်တမ်း တင်လိုက်ပါတယ်။

တစ်နိုင်ငံလုံးအတိုင်းအတာနဲ့ ဒေသတစ်ခုကနေ တစ်ခုမှာ ၆ လနဲ့အထက် ရွှေ့ပြောင်းနေထိုင်သူ တွေကို အိမ်ထောင်စုစာရင်းတွေ ထုတ်ပေးဖို့အတွက် လူဝင်မှုကြီးကြပ်ရေးနဲ့ ပြည်သူ့အင်အားဦးစီး ဌာနက သစ္စာစီမံချက်ကို ရေးဆွဲနေတာဖြစ်ပါတယ်။ အဲဒီစီမံချက်ကို ရှမ်းတိုင်းရင်းသားများ ဒီမိုကရေစီအဖွဲ့ချုပ်နဲ့ မွန်ပါတီတွေက ကန့်ကွက်ထားကြသလို မွန်အရပ်ဖက်အဖွဲ့တွေကလည်း အဲဒီစီမံချက်ကို ဖျက်သိမ်းပေးဖို့ မွန်ပြည်နယ်ဝန်ကြီးချုပ်ထံ စာပေးပို့ထားတာဖြစ်ပါတယ်။

RFA Burmese
http://www.rfa.org/burmese