စမ်းချောင်း မြေထိန်းနံရံ ပြိုကျမှု ကြွက်တွင်းထဲ ရေဝင်ပြီး ပြိုကျခြင်းဖြစ်တယ်လို့ ဆို

စမ်းချောင်းမြို့နယ် အောင်ချမ်းသာရေနုတ်မြောင်းအုတ်နံရံ ဆက်လက်ပြိုကျခြင်းမရှိစေရေးဆောင်ရွက်

ရန်ကုန် မေ ၂၃

စမ်းချောင်းမြို့နယ်တွင် မေ ၂၂ ရက် က ပြိုကျခဲ့သော အောင်ချမ်းသာရေနုတ် မြောင်းမြေထိန်းအုတ်နံရံ ဆက်လက် ပြိုကျခြင်းမရှိစေရန်နှင့် ရေနုတ် မြောင်းအနီးနေထိုင်သူများ စိုးရိမ် ပူပန်မှုမဖြစ်စေရန်အတွက် ရန်ကုန် မြို့တော်စည်ပင်သာယာရေးကော်မတီ က လူအား၊ စက်ယန္တရားအားများ အသုံးပြု၍ အချိန်နှင့်တစ်ပြေးညီ ဆောင်ရွက်လျက်ရှိသည်။

အောင်ချမ်းသာ ရေနုတ်မြောင်း မြေထိန်းအုတ်နံရံပြိုကျခြင်းကိစ္စကို ရန်ကုန်မြို့တော်စည်ပင်သာယာရေး ကော်မတီ အင်ဂျင်နီယာဌာန (လမ်း နှင့်တံတား)တာဝန်ရှိသူက ''ယခုပြိုကျ တဲ့အုတ်နံရံအရှည်ပေက ၁၇ဝ နီးပါး ရှိပါတယ်။ ရေနုတ်မြောင်းဘေးနေထိုင် တဲ့တိုက်တွေနဲ့ဆိုရင် ၁၂ ပေလောက် ဝေးကွာပါတယ်။ နေထိုင်သူများ စိုးရိမ်ပူပန်မှုမရှိစေရန် မြို့တော် စည်ပင်တာဝန်ရှိသူတွေဟာ အချိန် နှင့်တစ်ပြေးညီရောက်ရှိကာ ပြိုကျတဲ့ နေရာတွေမှာ ဝါးကတ်များကာပြီး မျောတိုင်များဖြင့် ယာယီတုတ်ရိုက်ခြင်း၊ သဲအိတ်များချခြင်းကို အပူတပြင်း ဆောင်ရွက်ကြရန် ညွှန်ကြားခဲ့ပါ တယ်။ ယာယီဝါးကတ်နဲ့ တုတ်ရိုက် ပြီးသွားတဲ့အချိန်မှာ ဆက်လက်ပြီး အနံ ၁ဝ လက်မ အရှည်ပေ ၃ဝ ရှိတဲ့ သံပေါင်တွေ မြေကြီးထဲရိုက်သွင်းပြီး ကွန်ကရစ်နံရံကို တည်ဆောက်သွား မှာဖြစ်ပါတယ်''ဟု ဌာနစုမှူး ဦးခင်မောင်ဝင်းက ပြောကြားသည်။

ယခုလိုပြိုကျခြင်းနှင့် ပတ်သက်၍ တာဝန်ရှိသူက ''ရေနုတ်မြောင်းနဲ့ လူနေအိမ်နောက်ဖေးက ၁၂ ပေကျော် သာဝေးကွာပါတယ်။ အချို့နောက် ဖေးအိမ်တွေက စားကြွင်းစားကျန် စွန့်ပစ်ရာမှ မြေကြွက်များဖောက်မှု ကြောင့် ကြွက်တွင်းထဲ ရေဝင်ပြီး အခုလိုပြိုကျခြင်းဖြစ်တယ်လို့ ယူဆရ တယ်။ အောင်ချမ်းသာရေနုတ်မြောင်း ဟာ ရေစီးအလွန်အားကောင်းတာ လဲဖြစ်တယ်'' ဟုပြောကြားသည်။

သဲအိတ်များချခြင်း၊ ဝါးကတ်များ ကာရံခြင်းနှင့် မျောတိုင်တုတ်ရိုက်ခြင်း လုပ်ငန်းများပြီးစီးသည်နှင့် အနံ ၁ဝ လက်မ အရှည် ပေ ၃ဝ သံပေါင် များကို မြေကြီးထဲရိုက်သွင်းပြီး ကွန်ကရစ်လုပ်ငန်းများ ဆက်လက် ဆောင်ရွက်သွားမည်ဖြစ်သည်။လုပ်ငန်းများ အချိန်နှင့်တစ်ပြေးညီ ပြီးစီးနိုင်ရန် မီနီမြေတူး မြေကော် စက်နှစ်လုံး၊ အလုပ်သမားအင်အား ၄ဝ ကျော်နှင့် တာဝန်ရှိသူအဆင့်ဆင့် က ကြီးကြပ်ဆောင်ရွက်လျက် ရှိကြောင်း သိရသည်။

(စောသိန်းဝင်း)
The Mirror Daily
https://www.facebook.com/TheMirrorDaily