လှော်တက် တစ်ခု အကြောင်းပြု၍ ကျောက်ဖြူတွင် လူသတ်မှု ဖြစ်ပွား

နိရဉ္စရာ၊ မေ ၂၉

ရခိုင်ပြည်နယ် ကျောက်ဖြူမြို့နယ်တွင် လှေလှော်တက် တစ်ခုကို အကြောင်းပြု၍ လူသတ်မှု ဖြစ်ပွားခဲ့ကြောင်း သတင်း ရရှိသည်။

၎င်းလူသတ်မှုမှာ မေလ ၂၆ ရက်နေ့ ညဥ့် ၉ နာရီခန့်တွင် ကျောက်ဖြူမြို့နယ် ရတနကျေးရွာအုပ်စု၊ ရတနကျေးရွာတွင် ဖြစ်ပွားခဲ့ကြောင်း၊ ဦးဝင်းသိန်း (၃၅) နှစ်မှ တစ်ရွာတည်းနေ ဦးထွန်းဝင်းဦး (၄၂)နှစ်ထံမှ သူငှားထားသော လှော်တက်ကို သွားတောင်းရာမှ စကားများပြီး ဦးထွန်းဝင်ဦးမှ ဦ၀င်းသိန်းကို ဓါးဖြင့် ခုတ်သတ်လိုက်ကြောင်း ကျောက်ဖြူမြို့မ ရဲစခန်းမှ အရာရှိ တစ်ဦးက အတည်ပြု ပြောကြားသည်။

၎င်းပြင် ယင်းရဲအရာရှိက “ စကားများပြီး ထွန်းဝင်းဦးမှ အနီးရှိ ဓားနဲ့ လိုက်ခုတ်တယ်။ ၀င်းသိန်းက အိမ်ခြံကနေ ထွက်ပြေးပြီး လမ်းမ အရောက်မှာ ဓါးမနဲ့ ဆက်တိုက် လိုက်ခုတ်တယ်။ ဓါးခုတ်ခံရတဲ့ ၀င်းသိန်းကတော့ လမ်းပေါ် အခုတ်ခံရတဲ့ နေရာဘဲ ပွဲချင်းပြီး သေဆုံးသွားတယ်။ သူတို့ နှစ်ယောက် အရင်တုန်းကလည်း စကားများ ရန်ဖြစ်ခဲ့ဖူးတယ်လို့သိရတယ်။ အရင်က ရန်ဖြစ်ဖူးတာကို အကြောင်းပြုပြီးတော့ လှေလှော်တက် သွားတောင်းရာ မကျေနပ်လို့ ပြသနာဖြစ်တယ်လို့ဆိုပါတယ်” ဟု ဖြစ်စဉ် အသေးစိတ်ကို ရှင်းလင်း ပြောကြားသည်။

ဓါးမဖြင့်အခုတ်ခံရမှုကြောင့် သေဆုံးသူ ၀င်းသိန်းတွင် ၀ဲဘက်နားရွက်တွင် ပြတ်ရှဒဏ်ရာ(၁)ချက်၊ ၀ဲဘက်လည်ပင်းအထက် အရိုးထိ ပြတ်ရှဒဏ်ရာ(၁)ချက်၊ ၀ဲဘက်လက်ခုံ ပြတ်ရှဒဏ်ရာ(၁)ချက်တို့ ရရှိသွားပြီး နေရာတွင် ပွဲချင်းပြီးသေဆုံးသွားကြောင်း ရဲစစ်ဆေးချက် မှတ်တမ်းအရ သိရသည်။

ပြစ်မှုကျူးလွန်သူ ထွန်းဝင်းဦးမှာ တိမ်းရှောင်နေပြီး ၎င်းအားဖမ်းဆီးရရှိရေးအတွက် စုံစမ်း ရှာဖွေနေကြောင်း ရဲက ပြောသည်။

၎င်းအမှုအား မခင်ဝင်းသိန်းမှ တရားလို လုပ်တိုင်တန်းထားပြီး ကျောက်ဖြူမြို့မရဲစခန်း (ပ)အမှတ်၊ ပုဒ်မ၃၇၅/၁၆ ပြစ်မှုပုဒ်မ-၃၀၂ အရ အရေးယူဆောင်ရွက်လျက်ရှိပြီး ကျောက်ဖြူမြို့မရဲစခန်းမှူး ဒုရဲမှူး မိုးဇော်သူ ကတာဝန်ယူ ဆောင်ရွက်လျက်ရှိကြောင်းသိရသည်။

ကျော်ဝင်း(ကျောက်ဖြူ)
Narinjara
https://www.facebook.com/Narinjara