ဝန်ကြီးများ စစ်ဆေးချိန်မို့ ကုမ္ပဏီ များ အလုပ်ရပ်နား

ဖားကန့်ကျောက်စိမ်းတွင်းဒေသမှာ မြေစာသယ်ကားတွေအသုံးပြုပြီး ကျောက်စိမ်းတူးဖော်လုပ်ကိုင်နေမှုကို ၂၀၁၄ ခုနှစ် နိုဝင်ဘာလ အတွင်းကတွေ့ရစဉ်။ Photo: Kyaw Myo Min/ RFA

သယံဇာတနဲ့ သဘာဝပတ်ဝန်းကျင်ထိန်းသိမ်းရေးဋ္ဌာန ပြည်ထောင်စုဝန်ကြီးနဲ့ ကချင်ပြည်နယ် အစိုးရအဖွဲ့ဝင် တချို့ဖားကန့်ကျောက်စိမ်းတွင်းဒေသမှာ ကွင်းဆင်းစစ်ဆေးနေတဲ့အတွက် ကျောက်မျက်ကုမ္ပဏီတွေက စက်ယန္တရားတွေနဲ့ ကျောက်စိမ်းတူးဖော်လုပ်ကိုင်နေမှုတွေကို ယာယီရပ်နားထားတယ် လို့ ပြည်နယ်လွှတ်တော် ကိုယ်စားလှယ်တွေက ပြောပါတယ်။

ကုမ္ပဏီတွေဟာ မနေ့ကအထိ ယန္တရားတွေနဲ့ တူးဖော်လုပ်ကိုင်နေပေမယ့် ဒီကနေ့မှာ ရပ်နားထားတာ တွေ့ရတယ် လို့ ဖားကန့်မြို့နယ် မဲဆန္ဒနယ် အမှတ် ၂ ရဲ့ ပြည်နယ်လွှတ်တော် ကိုယ်စားလှယ် ဦးဒါရှီလဆိုင်းက ပြောပါတယ်။

"ကျနော်တို့ဝန်ကြီးအဖွဲ့တွေ လာရောက်မယ်လို့ကြားလိုက်တဲ့အချိန်မှာဝန်ကြီးအဖွဲ့များ လာရောက် ပြီးတော့ ဖြတ်သန်းသွားမယ့်လမ်းကြောမှာ ရှိနေတဲ့ ကျောက်မျက်လုပ်ငန်း လုပ်နေတဲ့ကုမ္ပဏီတွေကျတော့ နဂိုမူလသူတို့လုပ်နေတဲ့ပုံစံမဟုတ်ပဲနဲ့ ရပ်နားထားတဲ့ အနေအထားပေါ့နော်၊ အဲ့လိုမျိုး ကျနော်တို့တွေတွေ့ ရတယ်၊ လွန်ခဲ့တဲ့ ၂ ရက်ထဲက အဲ့လမ်းပေါ်မှာသူတို့တွေက မြေစာသယ်ယာဉ်တွေဖြတ်သန်းသွားလာနေ တာပေါ့နော်၊ ဒီနေ့ကတော့ ရှင်းလင်းနေတဲ့အနေအထားဆိုတော့ အများကြီးကွာဟနေတာတွေ့ရပါတယ်"

ပြည်ထောင်စုဝန်ကြီး ဦးအုန်းဝင်းနဲ့ ပြည်နယ်အစိုးရအဖွဲ့က သယံဇာတနဲ့ သဘာဝပတ်ဝန်းကျင် ထိန်းသိမ်းရေး ဝန်ကြီး၊ ကျောက်မျက်လုပ်ငန်းရှင်များအသင်းက တာဝန်ရှိသူတွေအပါအဝင် ဋ္ဌာနဆိုင်ရာအရာရှိတွေက ဒီကနေ့ မနက်ပိုင်းမှာ လုံးခင်းကျောက်စိမ်းတူးဖော်ရေးရုံးမှာ ကုမ္ပဏီတာဝန်ရှိသူတွေ၊ ဝန်ထမ်းတွေနဲ့ တွေ့ဆုံခဲ့ပြီး ကျောက် စိမ်းလုပ်ကွက်တချို့ကို သွားရောက် စစ်ဆေးနေတာဖြစ်ပါတယ်။

ဝန်ကြီးနဲ့အဖွဲ့ကို ဆက်သွယ်လို့မရတဲ့အတွက် အသေးစိတ်ကိုတော့မသိရှိရသေးပါဘူး။

ဖားကန့်ကကျောက်စိမ်းတွင်းဒေသမှာ စက်န္တရားတွေနဲ့ တူးဖော်လုပ်ကိုင်နေတဲ့အတွက် မြေပြိုမှုတွေမကြာခဏဖြစ် ပွားပြီး လူသေဆုံးမှုတွေ၊ ရေကြီးမှုကြောင့် မြို့ရွာလူနေအိမ်ပျက်စီးမှုတွေစသဖြင့် သဘာဝပတ်ဝန်းကျင် ဆိုင်ရာ ပြဿနာတွေဖြစ်ပွားနေတယ်လို့ ဒေသခံတွေနဲ့ လွှတ်တော်ကိုယ်စားလှယ်တွေက ပြောပါတယ်။

အခုအစိုးရသစ်လက်ထက်မှာ သယံဇာတဲ့ သဘာဝပတ်ဝန်းကျင် ထိန်းသိမ်းရေးဝန်ကြီး နဲ့အဖွဲ့ဟာ ဖားကန့်ဒေသကို ပထဆုံးအကြိမ်လာရောက်လေ့လာ တာဖြစ်ပါတယ်။

RFA Burmese
http://www.rfa.org/burmese