ကျောက်မျက်ကုမ္ပဏီတွေကို တိုင်ကြားရင် တင်းကြပ်ဖို့မှာကြား

ဖားကန့်မြို့နယ် လုံးခင်းကျေးရွာအုပ်စု ဆန်ခါကျေးရွာအနီးက မှော်ပုံ တောင်ကြောမှာ ကုမ္ပဏီတွေက ဝှက်ထားတဲ့ ကျောက်တူးဖော်ရေးလုပ်ငန်းမှာအသုံးပြုတဲ့ စက်ယန္တရားများကို တွေ့ရစဉ်။ Photo: Ko Tin Hlaing

ကျောက်မျက်တူးဖော်တဲ့ ကုမ္ပဏီတွေ စည်းကမ်းဖောက်ဖျက်ကြောင်း ပြည်သူတွေက သတင်းပေးတိုင်ကြားလာရင် အစိုးရဌာနဆိုင်ရာတွေအနေနဲ့ စည်းကမ်းပျက်တဲ့ ကုမ္ပဏီတွေကို ကြပ်မတ်ဆောင်ရွက်ဖို့ သယံဇာတနဲ့ သဘာဝပတ်ဝန်းကျင် ထိန်းသိမ်းရေးဋ္ဌာန ပြည်ထောင်စုဝန်ကြီး ဦးအုန်းဝင်း က ပြည်နယ်အစိုးရအဖွဲ့ကို မှာကြားလိုက်ပါတယ်။

ပြည်ထောင်စုဝန်ကြီး ဦးအုန်းဝင်းဟာ ဒီကနေ့ညနေမှာ ကချင်ပြည်နယ်အစိုးရအဖွဲ့နဲ့ တွေ့ဆုံစဉ် ပြောကြားခဲ့တာလို့ အဲဒီတွေ့ဆုံပွဲကို တက်ရောက်ခဲ့တဲ့ ပြည်နယ် အစိုးရအဖွဲ့ ညွှန်ကြားရေးမှူး ဦးအေးမောင်ကြည် က ပြောပါတယ်။

ပြည်ထောင်စုဝန်ကြီး ဦးအုန်းဝင်းဟာ ဖားကန့်မြို့နယ်မှာ ကုမ္ပဏီတွေ ကျောက်စိမ်းတူးဖော်နေကြတဲ့ အခြေအနေတွေကို မနေ့ကသွားရောက်လေ့လာခဲ့ပြီး ပြည်နယ် ဝန်ကြီးချုပ်၊ လုံခြုံရေးနဲ့နယ်စပ်ရေးရာဝန်ကြီး စတဲ့ ကချင်ပြည်နယ်အစိုးရအဖွဲ့နဲ့ တွေ့ဆုံခဲ့တာဖြစ်ပါတယ်။

ဖားကန့်ကျောက်စိမ်းတူးဖော်ရေးလုပ်ငန်းတွေကို ပြည်ထောင်စုအစိုးရအဖွဲ့က တိုက်ရိုက် စီမံခန့်ခွဲနေတာဖြစ်ပြီး ကုမ္ပဏီတွေဟာ အင်အားကြီးစက်ယန္တရားတွေနဲ့ တူးဖော်လုပ်ကိုင်မှုကြောင့် သဘာဝပတ်ဝန်းကျင် ထိခိုက်ပျက်စီးနေတယ်ဆိုပြီး ဒေသခံတွေနဲ့ ပညာရှင်တွေက ပြောကြပါတယ်။

မေလကုန်မှာ မိုးရာသီရောက်ရှိလာပြီဖြစ်တဲ့အတွက် ကုမ္ပဏီတွေဟာ ကျောက်စိမ်းတူးဖော်ရေး လုပ်ငန်းတွေကို မကြာခင်ရပ်နားကြတော့မှာဖြစ်ပါတယ်။

RFA Burmese
http://www.rfa.org/burmese