သံလွင်မြစ်အနောက်ခြမ်း UWSA ထိန်းချုပ်ဒေသကပ်လျက် SSPP/SSA တပ်များ ဆုတ်ခွာပေးရန် တပ်မတော်ညွှန်ကြား

ဧပြီ ၁၉ ရက် ၂၀၁၆

သျှမ်းပြည်မြောက်ပိုင်း တန့်ယန်းမြို့နယ် သံလွင်မြစ် အနောက်ဘက်ခြမ်းရှိ လွယ်စေး လွယ်လန်း စသည့် တောင်ကြောများပေါ်တွင် တပ်စွဲထားသော သျှမ်းပြည်တပ်မတော် SSA/SSPP တပ်များကို ဧပြီလ ၂၂ ရက်နေ့ နောက်ဆုံးထား၍ ဆုတ်ခွာပေးရန် လားရှိုး အခြေစိုက် အရှေ့မြောက်တိုင်း စစ်ဌာနချုပ်မှ ညွှန်ကြားထား သည်ဟု ဆိုသည်။

“တန့်ယန်းနယ် လွယ်စေး လွယ်လန်းတောင်ပေါ်မှာရှိတဲ့ တို့တပ်တွေ ၂၂ရက်နေ့ နောက်ဆုံးထား ဆုတ်ပေးဖို့ တပ်မတွေဝင်ရှင်းမယ် ပြောတယ်။ ရမခက အကြောင်းကြားလာတာ” - ဟု သျှမ်းတပ်မတော်မြောက်ပိုင်း ပြန်ကြားရေးဌာနမှ တာဝန်ရှိသူတစ်ဦးဖြစ်သည့် ဗိုလ်မှူးစိုင်းဘုန်းဟန်က ပြောသည်။
အဆိုပါဒေသမှာ မြစ်အရှေ့ဘက်ကမ်း ၀ UWSA ထိန်းချုပ်ရာ ပန်ယန်း ( မိုင်းလင်း ) ဒေသကို လှမ်းမြင်နေရ သည့် ဒေသဖြစ်ပြီး တောင်ပေါ်မှ လက်နက်ကြီးဖြင့် ပစ်ခတ်ပါက ပန်ယန်းမြို့အား ခြိမ်းခြောက်နိုင်မည့် နေရာ များလည်း ဖြစ်သည်။

ပြည်ထောင်စုအဆင့် အပစ်ခတ်ရပ်စဲထားသော်လည်း နိုင်ငံလုံးဆိုင်ရာ အပစ်ခတ်ရပ်စဲရေးကို လက်မှတ် ရေးထိုးခြင်း မရှိသေးသည့် SSPP ဘက်ကမူ အဆိုပါဒေသမှာ ရှမ်းလက်နက်ကိုင်များ ဆယ်စုနှစ်ပေါင်း များ စွာတိုင် အခြေချခဲ့သည့် ဒေသဖြစ်သည့်အတွက် ဆုတ်ခွာပေးရန် ခက်ခဲနိုင်ကြောင်း ဗိုလ်မှူးစိုင်းဘုန်းဟန်က ပြောသည်။

' ဒီဂွင်ထဲမှာSSA နေလာတာ တန့်ယန်းပဲနော် နှစ်ပေါင်း ၄၀ - ၅၀ ရှိပြီ အစဉ်တစိုက်နေလာခဲ့တဲ့နေရာဖြစ်တဲ့အကြောင်း နားလည်ပေးစေချင်ကြောင်း ပြောထားတယ်' ဟု ၄င်းက ပြောသည်။

အဆိုပါ ဒေသအားပေးလိုက်ပါက အောက်ဘက်ရှိ မိုင်းရှူးဒေသကိုပါ အစိုးရ စစ်တပ်များ အသာစီးသွားနိုင်ပြီး သျှမ်းပြည်တပ်မတော် ဌာနချုပ် ၀မ်ဟိုင်းကိုပါ ပတ်ပတ်လည် ၀ိုင်းထားသကဲ့သို့ ဖြစ်လာမည်လည်း ဖြစ်သည်။

လွယ်လန်းကြောက ဟိုးကတည်းက ဝ နယ် နဲ့ သျှမ်းနယ်ဆက်သွယ်ရေး လမ်းကြောင်းကိုးမဆုတ် လို့ တကယ်တိုက်ရင် ဝ ကိုပါ ရန်စတာ ဖြစ်သွားလိမ့်မယ် - ဟု နယ်စပ် စစ်ရေးနိုင်ငံရေး လေ့လာသူ ဦးဂါမဏိက သုံးသပ်သည်။ အဆိုပါနယ်မြေများရှိ SSA/SSPP တပ်များကို ဆုတ်ခွာပေးရန် ၂၀၁၄ ခုနစ်ကလည်း အစိုးရတပ်မတော်ဘက်မှ ညွှန်ကြားဖူးကြောင်း သိရသည်။

သျှမ်းသံတော်ဆင့် / စိုင်းအောင်ဆိုင်း
Panglong(Burmese)
https://www.facebook.com/Panglong.burmese