ဒီမိုကရေစီပညာရေးပြုပြင်ပြောင်းလဲဖို့ အစိုးရသစ်ဖော်ဆောင်နိုင်မည်ဟု မျှော်လင့်

ဒီမိုကရေစီ ပညာရေးသပိတ်စစ်ကြောင်းကို ထောက်ခံကြောင်း ဆန္ဒထုတ်ဖော်မှုဖြင့် ဧပြီ ၁ ရက်က ပန်းဘဲတန်းတရားရုံးတွင် ဗမာနိုင်ငံလုံးဆိုင်ရာ ကျောင်းသားများသမဂ္ဂ ကျောင်းသားခေါင်းဆောင်များဖြစ်သော ကိုနန္ဒာစစ်အောင်၊ မဖြိုးဖြိုးအောင်နှင့် ကိုကျော်ကိုကိုတို့ကို ရုံးထုတ်ခဲ့သည်။ ထို ဖမ်းဆီးခံ ကျောင်းသားခေါင်းဆောင်များနှင့် ဒီမိုကရေစီပညာရေး ပြုပြင်ပြောင်းလဲမှုနှင့် ပတ်သက်၍ တွေ့ဆုံမေးမြန်းထားသည်များကို ကောက်နုတ်ဖော်ပြလိုက်ပါသည်။

ကိုနန္ဒာစစ်အောင်

အစိုးရသစ်က ပြည်သူရဲ့အပြောင်းအလဲ မျှော်လင့်ချက်ကိုဦးဆောင်ပြီး ဒီမိုကရေစီ ဖက်ဒရယ်နိုင်ငံထူထောင်ရေးကို လက်တွေ့အကောင်အထည်ဖော်နိုင်ဖို့လိုပါတယ်။

ဒေါ်အောင်ဆန်းစုကြည် အနေနဲ့ နိုင်ငံတော်အတိုင်ပင်ခံလုပ်တာ ကောင်းပါတယ်။ နိုင်ငံတကာအတွေ့အကြုံလည်းရှိ၊ ကောင်းမွန်ရင့်ကျက်တဲ့ ကိုယ်ရည်ကိုယ်သွေး လည်းရှိ၊ နိုင်ငံရဲ့ဒီမိုကရေစီရေး မျှော်လင့်ချက် ခေါင်းဆောင်လည်းဖြစ်တော့ သမ္မတအနေနဲ့ နိုင်ငံတော်အတွက်အကျိုးရှိတဲ့တာဝန်ယူမှုပါ။ အသက်အရွယ်နဲ့ တာဝန်ယူထားတဲ့အလုပ် တွေအတွက်တော့ စိတ်ပူပါတယ်။

လေးပွင့်ဆိုင်ဆွေးနွေးပွဲ ဆက်လက်အကောင်အထည်ဖော်ပေးရေး ကျောင်းသားထု တောင်းဆိုမှုကို လက်ခံလိမ့်မယ်ထင်ပါတယ်။ ဒါကြောင့် ကျောင်းသားထုရဲ့ ကျောင်းသားသမဂ္ဂအိပ်မက်နဲ့ ဒီမိုကရေစီ ပညာရေးမျှော်လင့်ချက်ကို အကောင်အထည် ဖော်နိုင်ဖို့၊ ကျောင်းသားသမဂ္ဂတွေကို ပူးပေါင်းဆောင်ရွက်ဖို့ ဖိတ်ခေါ်လိမ့်မယ်ထင်ပါတယ်။ ဒီမိုကရေစီနိုင်ငံထူထောင်ဖို့ ဒီမိုကရေစီပညာရေး ပြုပြင်ပြောင်းလဲမှုဟာ အခြေခံကျပြီး ရေရှည်ဖွံ့ဖြိုးရေးဦးတည်ကြောင်း နားလည်နိုင်တဲ့သူပဲဖြစ်ပါတယ်။ ဒေါ်အောင်ဆန်း စုကြည်ဟာ ၁၉၈၈ ကတည်းက ကျောင်းသား သမဂ္ဂတွေနဲ့တွဲပြီး တစ်ဆက်တစ်စပ်တည်း စစ်အာဏာရှင်စနစ်ဆန့်ကျင်ရေး၊ ဒီမိုကရေစီရေး တိုက်ပွဲဝင်ခဲ့သူလည်းဖြစ်တယ်။ ကျောင်းသားခေါင်းဆောင် ကိုအောင်ဆန်းရဲ့ သမီးလည်းဖြစ်တော့ ကျောင်းသားသမဂ္ဂရဲ့ ကျောင်းသားထုသမိုင်းအမွေကို နားလည် နိုင်သူလည်းဖြစ်တယ်။

အကျပ်အတည်းကတော့ ရှိပါတယ်။ ၂ဝဝ၈ ဖွဲ့စည်းပုံအခြေခံဥပဒေအရ ကာလုံရဲ့ ခွင့်ပြုမှု လိုအပ်တာကိုး။ အဲဒီတော့ စစ်ဘက်က သဘောထားတင်းမာရင် ၂ဝဝ၈ ဖွဲ့စည်းပုံအရ အခြားဘယ်လိုနည်းသုံးပြီး လွတ်နိုင်မလဲဆိုတာ အစိုးရသစ်က လုပ်နည်းလုပ်ဟန် ရှာရလိမ့်မယ်ထင်ပါတယ်။

မဖြိုးဖြိုးအောင်

ကျွန်မတို့တောင်းဆိုတဲ့ အချက်တွေကတော့ ပညာရေးလွတ်လပ်ခွင့်ကို အခြေခံပြီးတော့ ဒီမိုကရေစီပညာရေးကို တောင်းဆိုထားတာပါ။ တိုင်းပြည်တစ်ခုမှာ ဒီမိုကရေစီကို တကယ်သွားတော့မယ်ဆိုရင် ဒီတိုင်းပြည်ထဲမှာ ဒီမိုကရေစီပညာရေးစနစ်ကို အခြေခံတဲ့ ပညာရေးမျိုးဖြစ်မှသာလျှင် တကယ်ကို ဒီမိုကရေစီခိုင်မာတဲ့ တိုင်းပြည်မျိုးအဖြစ် ရေရှည်သွားနိုင်မှာပါ။ ပညာရေးကို ရင်းနှီး မြှုပ်နှံနိုင်မှသာလျှင် တိုင်းပြည်ကအခြေခိုင်နိုင်မယ်လို့ ကျွန်မတို့ကမြင်ပါတယ်။ ကျွန်မတို့ ပညာရေးနဲ့ပတ်သက်ပြီး လှုပ်ရှားမှုတွေ လုပ်ခါစအချိန်က ဗ.က.သ ဗဟိုကော်မတီဝင် တစ်ဦးက ဒေါ်အောင်ဆန်းစုကြည်ရဲ့ ပညာရေးနဲ့ ပတ်သက်တဲ့ မိန့်ခွန်းတွေ၊ အင်တာဗျူးတွေကို မြန်မာဘာသာပြန်ပြီးတော့ အခွေလုပ် ထားတာလေးရှိပါတယ်။ အဲ့ဒီတုန်းက သူ့ရဲ့ ပညာရေးအပေါ်မှာထားတဲ့ သဘောထားတွေ၊ မူဝါဒတွေကိုလည်း ကျွန်မတို့ အကြမ်းဖျင်းတွေ့ရပါတယ်။ ဒီမှာပညာရေးက တိုင်းပြည်အတွက် တကယ်အရေးကြီးတယ် ဆိုတာကို သူကိုယ်တိုင် ယုံကြည်ထားတယ် ဆိုတာကိုလည်း တွေ့ရပါတယ်။ အခုက အစိုးရသစ်မှာလည်း အရေးကြီးတဲ့ ပညာရေးကို ဒေါ်အောင်ဆန်းစုကြည်ကိုယ်တိုင် ဝန်ကြီးနေရာကို ယူထားပြီး ကိုင်တွယ်ထားတာ ကို တွေ့ရတယ်။ အဲဒီတော့ ကျွန်မတို့အနေနဲ့ ပညာရေးမူဝါဒတွေနဲ့ ပတ်သက်ပြီးတော့ ကြီးကြီးမားမား ကွာဟချက်မရှိလောက်ဘူးလို့ယူဆပါတယ်။ အကြမ်းဖျင်းအားဖြင့်တော့ မတူတာတွေတော့ ရှိကောင်းရှိမှာပါ။ ဥပမာ အားဖြင့်ဆိုရင် ပညာရေးနဲ့ပတ်သက်ပြီး ဗဟို ချုပ်ကိုင်မှုကို လျှော့ချဖို့ ကျွန်မတို့တောက် လျှောက်တောင်းဆိုတဲ့နေရာမှာ NLD ရဲ့ မူဝါဒထဲမှာကျတော့ အထိုက်အလျောက် ဗဟိုချုပ်ကိုင်မှုစနစ်ကိုထားဖို့ မူဝါဒချထားတာ ကို တွေ့ရပါတယ်။ ဒါမျိုးလေးတွေတော့ရှိပါ တယ်။ ဒါပေမယ့် ဒါတွေကိုလည်း ကျွန်မတို့ နှစ်ဖက်လုံးက စိတ်ရှည်လက်ရှည်နဲ့ ဆွေးနွေး ညှိနှိုင်းဆောင်ရွက်သွားဖို့ လိုအပ်ပါတယ်။ လက်တွေ့ အကောင်အထည်ဖော်တဲ့နေရာမှာ ပိုပြီးတော့ အဆင်ပြေတဲ့ နည်းမျိုး၊ ပုံစံမျိုးနဲ့ပါ။ အဓိကအရေးကြီးဆုံးက အစိုးရသစ်မှာ ဒေါ်အောင်ဆန်းစုကြည်က ပညာရေးဝန်ကြီး နေရာကို ကိုင်တွယ်မယ်၊ ဒီတော့ အရင် ဦးသိန်းစိန်အစိုးရနဲ့ကျောင်းသားတွေ၊ NNER လိုပညာရှင်တွေပါတဲ့ အရပ်ဘက်အဖွဲ့အစည်း တွေပါမယ်။ လွှတ်တော်ပါမယ်။ လေးပွင့်ဆိုင် ဆွေးနွေးပွဲပါ။ ဒီလေးပွင့်ဆိုင် ဆွေးနွေးပွဲကနေ သဘောတူထားတဲ့ အချက်တွေရှိပါတယ်။ ဒါကိုအစိုးရသစ်အထူးသဖြင့် ပညာရေးဝန်ကြီးသစ်က ဒီလေးပွင့်ဆိုင် ကတိကဝတ်တွေကို ဆက်ပြီးတော့ အကောင်အထည်ဖော်ပေးဖို့ ကိစ္စကလည်း ကျွန်မတို့အတွက် မဖြစ်မနေ တောင်းဆိုရမယ့် ကိစ္စတစ်ခုလို ပါဝင်လာပါပြီ။ လေးပွင့်ဆိုင်ထဲမှာက လတ်တလော ကျွန်မတို့သပိတ်က ဖမ်းဆီးထိန်းသိမ်းခံ ထားရတဲ့ ကိစ္စတွေနဲ့ ပတ်သက်လို့ရော၊ ရေရှည်မှာ ပြုပြင်ပြောင်းလဲမှုတွေနဲ့ ပတ်သက်တဲ့ ကျောင်းသားထုတွေရဲ့ တောင်းဆိုမှုတွေ ဒီအထဲမှာတစ်ပါတည်း ပါဝင်တာဖြစ်တဲ့အတွက် လေးပွင့်ဆိုင် သဘောတူညီမှုကို ဆက်ပြီးအကောင် အထည်ဖော်ဖုိ့ကလည်း အစိုးရသစ်နဲ့ ပညာရေးဝန်ကြီးသစ် ဒေါ်အောင်ဆန်းစုကြည် အနေနဲ့ အထူးဂရုပြုဆောင်ရွက်ပေးဖို့ ကျွန်မပြောချင်ပါတယ်။

ဒီမိုကရေစီတိုင်းပြည်ကို တကယ်ကူးပြောင်းပြီဆိုရင် နိုင်ငံရေးအကျဉ်းသားဆိုတာ လုံးဝမရှိသင့်ဘူးဆိုတာ ဒီမိုကရေစီ လိုလားသူတွေ အားလုံးစိတ်ထဲမှာ ရှိထားပြီးသား အရာတစ်ခုဖြစ်ပါတယ်။ ဒီနိုင်ငံရေး အကျဉ်းသား လွတ်မြောက်ရေးတင်မကပါဘူး။ ကျွန်မသဘောထားကတော့ အကျဉ်းထောင် တွေထဲက နိုင်ငံရေးအကျဉ်းသားတွေကို လွှတ်ပေးဖို့အပြင် နောက်ထပ် နိုင်ငံရေးသမားတွေ အဖမ်းမခံရဖို့ကလည်း အင်မတန်မှ အရေးကြီးတယ်လို့မြင်ပါတယ်။ ဒီတော့ လွှတ်တော်ထဲမှာရှိနေတဲ့ ၇၅ ရာခိုင်နှုန်းသော လွှတ်တော်ကိုယ်စားလှယ်တွေက နိုင်ငံရေး အကျဉ်းသားတွေကို အလွယ်တကူ ဖိနှိပ်လို့ရတဲ့ ဥပဒေတွေကို ဖျက်သိမ်းတဲ့နည်းလမ်းမျိုးကို ပိုပြီးတော့ ရွေးချယ်စေချင်တယ်။ ဒါမှ အာမခံချက်ရှိတဲ့၊ အခြေခိုင်တဲ့ ဒီမိုကရေစီနိုင်ငံ ဖြစ်လာနိုင်မယ်လို့ မြင်တယ်။ ဒီလိုဥပဒေတွေကို ပြင်မယ်၊ ဖျက်မယ်။ တစ်ဖက်မှာလည်း တရားဥပဒေစိုးမိုးမှုတွေ ရှိလာမယ်ဆိုရင် နိုင်ငံရေးအကျဉ်းသားပြဿနာက ပြေလျော့ လာလိမ့်မယ်လို့ ကျွန်မထင်ပါတယ်။

ကိုကျော်ကိုကို

ကျွန်တော်ကတော့ ပညာရေးဝန်ကြီးသစ်ကို လေးပွင့်ဆိုင် သဘောတူညီချက်တွေကို အကောင်အထည်ဖော်ပေးပါလို့ပဲ တောင်းဆို ချင်ပါတယ်။ နိုင်ငံရေးအကျဉ်းသားလွှတ်ဖို့ကတော့ သူတို့မှာ အစီအစဉ်ရှိပြီးသားဖြစ်မယ်လို့ ထင်ပါတယ်။ ။

မော်လေး
The Mirror Daily
https://www.facebook.com/TheMirrorDaily