ကာကွယ်ရေးနဲ့ လုံခြုံရေး ကောင်စီ အဖွဲ့သစ်

၂၀၀၈ အခြေခံ ဥပဒေထဲမှာ အုပ်ချုပ်ရေး အခန်းကဏ္ဍ ကနေပြီး ကာလုံ အဖွဲ့ကို ထည့်သွင်း ရွေးဆွဲ ပြဋ္ဌာန်း

သမ္မတ ဦးထင်ကျော် ဦးဆောင်တဲ့ ပြည်ထောင်စု အစိုးရသစ် တစ်ရပ် ပေါ်ပေါက် လာတာခဲ့ပြီးနောက် တပ်မတော် ဘက်က ကိုယ်စားလှယ်တွေ၊ အုပ်ချုပ်ရေး နဲ့ ဥပဒေပြု အာဏာပိုင် အကြီးအကဲ တွေ ပေါင်းစပ် ဖွဲ့စည်း ထားတဲ့ နိုင်ငံတော် ကာကွယ်ရေး နဲ့ လုံခြုံရေး ကောင်စီ (ကာလုံ) အဖွဲ့သစ်လည်း ပေါ်ထွန်း လာပြီ ဖြစ်ပါတယ်။

ကာလုံ အဖွဲ့ရဲ့ အခန်းကဏ္ဍဟာ နိုင်ငံရဲ့ လုံခြုံရေး နဲ့ ကာကွယ်ရေး ကိစ္စတွေ ကို ဦးဆောင် ဆုံးဖြတ် တာကြောင့် မြန်မာ နိုင်ငံ အနေနဲ့ နိုင်ငံ့ ဦးသျှောင် အဖွဲ့ အစည်း တစ်ခု ဖြစ်တယ်လို့ တကောင်း သုတေသန အသင်းက ဒါရိုက်တာ ကိုရဲမျိုးဟိန်းက ပြောပါတယ်။

၂၀၀၈ အခြေခံ ဥပဒေထဲမှာ အုပ်ချုပ်ရေး အခန်းကဏ္ဍ ကနေပြီး ကာလုံ အဖွဲ့ကို ထည့်သွင်း ရွေးဆွဲ ပြဋ္ဌာန်း ခဲ့တာ ဖြစ်ပါတယ်။

နိုင်ငံတကာ မှာတော့ ကာကွယ်ရေးနဲ့ လုံခြုံရေး ကဏ္ဍမှာ သမ္မတ ကို အကြံဉာဏ် ပေးနိုင်အောင် ဖွဲ့စည်းထားတဲ့ အဖွဲ့မျိုး ဖြစ်ပြီး မြန်မာ နိုင်ငံမှာတော့ အုပ်ချုပ်ရေး အခန်း ကဏ္ဍမှာ ကာလုံ အဖွဲ့က ဝင်ရောက် ဆုံးဖြတ် နိုင်တဲ့ အခွင့်အာဏာ ရှိတယ်လို့ ဆိုပါတယ်။

ကာလုံ အဖွဲ့ အနေနဲ့ ဘယ်လို အစည်းအဝေး ထိုင်ပြီး လုပ်ကိုင် ဆုံးဖြတ် သလဲ ဆိုတာ မသိရှိနိုင်တဲ့ အပြင် သီးသန့် ဥပဒေ လည်း အခုချိန်အထိ ထုတ်ပြန် ထားခြင်း မရှိဘူး လို့ သိရပါတယ်။

သမ္မတသစ် ဦးထင်ကျော် လက်ထက်မှာ ပေါ်ပေါက်လာမယ့် ကာလုံ ဖွဲ့စည်းရာမှာ တပ်မတော် ကာကွယ်ရေး ဦးစီးချုပ်၊ ဒုတိယ တပ်မတော် ကာကွယ်ရေး ဦးစီးချုပ် အပြင် ကာချုပ်က ခန့်အပ်တဲ့ ဒုသမ္မတ နဲ့ ဝန်ကြီး သုံးဦး တို့ ပါရှိမှာ ဖြစ်ပြီး စစ်ဘက် က လွှမ်းမိုးမှု ပိုများတယ်လို့ ပြောပါတယ်။

ကာလုံ အဖွဲ့အစည်းထဲမှာ ပါဝင်တဲ့ အရပ်သား အစိုးရ အဖွဲ့ဝင်တွေနဲ့ စစ်ဘက် ဆိုင်ရာ လူပုဂ္ဂိုလ်တွေ ပိုမိုထိတွေ့မှု များများ လုပ်ကာ နားလည်မှု၊ ယုံကြည်မှု တွေ တည်ဆောက်ပြီး ကောင်းမွန်တဲ့ အရပ်ဘက် စစ်ဘက် ဆက်ဆံရေး ကို ရရှိ မလားဆိုတာ စောင့်ကြည့်ရမှာ ဖြစ်တယ်လို့ ပြောပါတယ်။

BBC Burmese
http://www.bbc.com/burmese