KIA ထံတိုင်ကြားသူလေးဦး အမှုဖွင့်ခံရ

ကချင်ပြည်နယ် မြစ်ကြီးနားမြို့မှာ ငွေကြေးအရှုပ်အရှင်းတစ်ခုကိုဖြေရှင်းပေးဖို့အတွက် ကချင်လွတ်မြောက်ရေး တပ်မတော် ကေအိုင်အေ အဖွဲ့ထံ တိုင်ကြားခဲ့တဲ့ ဒေသခံ လေးဦး ကို မတရားအသင်းဆက်သွယ်မှု ဥပဒေပုဒ်မ ၁၇ (၁) နဲ့ မြစ်ကြီးနားမြို့ မြို့မ အမှတ် ၁ ရဲစခန်းက အမှုဖွင့်လိုက်ပါတယ်။

အုပ်ချုပ်ရေး တာဝန်ရှိသူတွေကို မဖြေရှင်းခိုင်းဘဲ ကေအိုင်အေအဖွဲ့ကို ဆက်သွယ်ပြီး တိုင်ကြားတာကြောင့် ပုဒ်မ ၁၇ (၁) နဲ့ မနေ့က အမှုဖွင့်လိုက်တာဖြစ်တယ်လို့ ပြည်နယ်ရဲတပ်ဖွဲ့ရုံးက ဒုတိယရဲမှူးကြီး မြင့်ထူး က ပြောပါတယ်။

မြစ်ကြီးနားမြို့ တပ်ကုန်း ရပ်ကွက်မှာနေထိုင်တဲ့ အမျိုးသမီးတစ်ဦးဟာ ငွေကျပ်သိန်းနှစ်ရာပြန်ပေးဖို့ ပျက်ကွက်လို့ဆိုပြီး အမျိုးသားတစ်ဦးနဲ့ အမျိုးသမီး သုံးဦး စုစုပေါင်း လေးဦးက ကေအိုင်အေတပ်ရင်း ၁၁ ထံ တိုင်ကြားခဲ့တာဖြစ်ပါတယ်။

အဲ့ဒီလိုတိုင်ကြားမှုကြောင့် ပြီးခဲ့တဲ့ မတ်လ ၁၅ ရက်နေ့က ကားတစ်စီး၊ ဆိုင်ကယ် ငါးစီး နဲ့ ကေအိုင်အေတပ်ဖွဲ့ဝင် ဆယ်ယောက်ကျော်လောက်ဟာ တိုင်ကြားခံရသူ အမျိုးသမီးကို ဖမ်းဆီးခေါ်ဆောင်သွားပြီး မနေ့က ပြန်လွှတ်ပေးခဲ့ပါတယ်။

အဲ့ဒီကိစ္စဖြစ်ပွားခဲ့တာ မှန်ကန်ကြောင်း မြစ်ကြီးနားအခြေစိုက် PCG ငြိမ်းချမ်းရေးအကျိုးဆောင်အဖွဲ့ဝင် ဦးဆန်းအောင် က RFA ကို အတည်ပြုပြောပါတယ်။
ကေအိုင်အေထံ တိုင်ကြားသူ လေးဦးဟာ လတ်တလော ထွက်ပြေးတိမ်းရှောင်နေကြပါတယ်။

အဲဒီကိစ္စနဲ့ ဆက်စပ်ပြီး မြစ်ကြီးနားမြို့နယ် နန်ကျင်ကျေးရွာရဲ့မြောက်ဘက် ၁ဝ မိုင်အကွာမှာ အစိုးရတပ်မတော်နဲ့ ကေအိုင်အေတပ်ရင်း ၁၁ တို့ နာရီဝက်ကြာ တိုက်ပွဲဖြစ်ပွားခဲ့တယ်လို့ ဒေသခံတွေက ပြောပါတယ်။

RFA Burmese
https://www.facebook.com/RFA-Burmese