တပ်တွင်းမဲရုံ ၂၅ ရုံ တွင် ပါတီမဲဆွယ်ခွင့်မရှိ

 ကယားပြည်နယ်ရှိ တပ်ဧရိယာတွင်း မဲရုံ(၂၅)ရုံထားရှိမည်ဖြစ်ပြီး တပ်တွင်း နိုင်ငံရေးပါတီများက မဲဆွယ်စည်းရုံး ဟောပြောခွင့်မရှိ ၊ တပ်ဧရိယာပြင်ပတွင်သာ ခွင့်ပြုထားသည်ဟု ပြည်နယ်ရွေးကောက်ပွဲအရာရှိ ဦးကျော်ဆန်းဝင်းပြောသည်။

“ကျနော်တို့ ကယားမှာ တပ်တွင်းမှာမဲရုံ (၂၅)ရုံ ထားမှာဖြစ်တယ်။ ဒီတပ်တွင်း မှာရှိတဲ့ မဲရုံ (၂၅)ရုံကို ကိုယ်စာလှယ်လောင်းတွေ ၀င်ပြီး မဲဆွယ်လို့မရပါဘူး။ တပ်အပြင်မှာပဲ မဲဆွယ်လို့ ရမယ်။” ဟု ဦးကျော်ဆန်းဝင်းက ပြောသည်။

တပ်တွင်းရှိ မဲဆန္ဒရှင်များကို သက်ဆိုင်ရာရာဝန်ရှိသူများ သို့မဟုတ် တပ်ရင်းမှူးများထံ ခွင့်ပြုမိန့်တောင်းခံပြီး မဲဆွယ်ခွင့်ပြုစေလိုကြောင်း လူမျိုးပေါင်းစုံ ဒီမိုကရေစီပါတီ (ကယားပြည်နယ်) မှ လွိုင်ကော်မြို့နယ် ပြည်သူ့လွတ်တော်ကိုယ်စားလှယ်လောင်း ဦးစောပိုလေးက ဆိုသည်။

“တပ်ထဲမဲဆွယ်ခြင်းနဲ့ ပတ်သက်ပြီးတရားဝင်ထုတ်ပြန်ကြေညာခြင်းတော့ မရှိဘူးပေ့ါ။ ဒါပေမယ့် သက်ဆိုင်ရာတပ်ရင်းတပ်မှူးဖြစ်ဖြစ် အကြာင်းကြားပြီးတော့ သူတို့ ခွင့်ပြုမိန့်ရရင်တော့ မဲဆွယ်လို့ရတယ်ဆိုတဲ့ ဟာ တော့ကြားရတယ်လေ။အဲတော့ သူတို့ ကျနော်တို့ တရားဝင်ခွင့်တောင်းပြီး တော့ သူတို့ ရဲ့  ခွင့်ပြုမိန့်ကိုလည်း ရယူပြီးမှ ၀င်ချင်တယ်။။အခုလောလောဆယ်တော့ တပ်တွင်းမှာ မဲဆွယ်ဖို့က အခက်အခဲတော့ရှိတယ်။” ဟု ဦးစောပိုလေးက ပြောသည်။

၎င်းကိစ္စနှင့်ပတ်သက်ပြီး တပ်တွင်းမဲဆွယ်နိုင်ရန် ပါတီကိုယ်စားလှယ်လောင်းများက တပ်ပိုင်းဆိုင်ရာ တာဝန်ခံများ တရားဝင်ခွင့်ပြုချက်တောင်းဆိုသွားမည်ဖြစ်သော်လည်း အခက်အခဲရှိနိုင်ကြောင်း ကယားလူမျိုးစုဒီမိုကရေစီပါတီ ဥက္ထဌ ၊ ဒီမောဆိုမြို့နယ် အမျိုးသားလွတ်တော်တွင်ဝင်ရောက်ယှဉ်ပြိုင်မည့် ကိုယ်စားလှယ်လောင်း ဦးစောဒယ်နီယယ်က ဆိုသည်။

“တပ်တွင်းမဲဝင်ဆွယ်ဖို့ မလွယ်ပါဘူး…တပ်ထဲမှာ ကျနော်တို့ လည်း မဲဆွယ်လို့လည်းမရဘူးး။မဲဆွယ်ဖို့ တောင်းလို့လည်းရမှာမဟုတ်ဘူး။မဲရုံတောင်မှ တပ်အပြင်ကိုထုတ်ပေးဖို့ သူတို့ ကတိပေးရဲ့သားနဲ့ မထုတ်ပေးဘူး။တပ်ထဲမှာ မဲဆွယ်ဖို့ဆိုတာ အင်မတန်ခက်ပါတယ်။ သူတို့ ခွင့်ပြုရင်တော့ ကျနော်တို့ က ၀င်တာပေ့ါ။ကျနော်တို့ က ဘာလို့ မ၀င်ရဲမှာလဲ။ဝင်ရဲပါတယ်။”ဟု ဦးစောဒယ်နီယာက ပြောသည်။

ကယားပြည်နယ်တွင် မဲရုံ(၂၂၉)ရုံ ရှိသည့်အနက် မဲရုံ(၂၅)ရုံသည် တပ်တွင်းတွင် ထားရှိမည်ဖြစ်ပြီး မဲရုံ(၃၂)ရုံကလည်း တပ်မတော်မှ အကူအညီဖြင့် လုံခြုံရေး ယူသွားမည်ဖြစ်ကြောင်း သိရပါသည်။

ကယားပြည်နယ်တွင် မဲဆန္ဒရှင် (၁၇၂၁၀၀)ဦး ရှိပြီး ၄င်းထဲတွင် တပ်တွင်းရှိ မဲဆန္ဒရှင်များ (၆၀၀၀)ကျော်ရှိကြောင်းသိရပါသည်။

ကယားပြည်နယ်တွင် ဒေသကွပ်ကဲရေးစစ်ဌာနချူပ်လက်အောက်ခံတပ်ရင်း ၁၀ ရင်း ၊ စစ်ကွပ်ကဲရေး ဌာနချုပ်လက်အောက်ခံတပ်ရင်း ၄ ရင်း ၊ တပ်မ ၅၅ လက်အောက်ခံတပ်ရင်း ၇ ရင်း ၊ နယ်ခြားစောင့်တပ် ၂ ရင်း ၊ အမြောက်တပ် စုစုပေါင်း ၂၄ ရင်းရှိသည်။

ဖြိုးဝေအောင်
Kantarawaddy Times
https://www.facebook.com/kantarawaddytimes