လှေစီးဝင် ဘင်္ဂလားဒေ့ရ်ှနိုင်ငံသားများကို ဇွန် ၇ ရက် ပြန်ခေါ်မည်

လှေစီးဒုက္ခသည်များ (ဓာတ်ပုံ - Wai Nwe Lwin)

မြန်မာပြည်က ကယ်တင်ထားတဲ့ ဘင်္ဂလားဒေ့ရှ် နိုင်ငံသားတွေကို ဇွန်လ ၇ ရက်ကစပြီး ပြန်လည် ခေါ်ယူမယ်လို့ မြန်မာနိုင်ငံဆိုင်ရာ ဘင်္ဂလားဒေ့ရှ် သံအမတ်ကြီးက ပြောကြောင်း မြန်မာနိုင်ငံခြားရေး ၀န်ကြီးဌာနက ဒီကနေ့ သတင်းထုတ်ပြန်ပါတယ်။

ဇွန်လ ၃ ရက် မနက်ပိုင်းမှာ မြန်မာနိုင်ငံခြားရေးဝန်ကြီး ဦးဝဏ္ဏမောင်လွင်နဲ့ ဘင်္ဂလားဒေ့ရှ် သံအမတ်ကြီးတို့ နေပြည်တော်မှာ တွေ့ဆုံပြီးနောက် ခုလို  ထုတ်ပြန်လိုက်တာပါ။

ဒီတွေ့ဆုံပွဲမှာ ဦးဝဏ္ဏမောင်လွင်က လှေစီးသွားလာသူတွေကို မြန်မာနိုင်ငံက လူသားချင်း စာနာထောက်ထားမှု ရှုထောင့်အရ ယာယီစောင့်ရှောက်မှု ပေးထားကြောင်း၊ ကောင်စစ်တွေ့ဆုံမှုပြုပြီး စိစစ် အတည်ပြုပြီးတဲ့ မြန်မာနိုင်ငံမှာ ယာယီစောင့်ရှောက်မှု ပေးထား သူတွေကို အမြန်ဆုံး ပြန်လည်ခေါ်ယူဖို့ တိုက်တွန်းကြောင်း ပြောကြားခဲ့တယ်လို့ သတင်းမှာ ဖော်ပြပါတယ်။

ဘင်္ဂလားဒေ့ရ်ှသံအမတ်ကြီးကတော့ မိမိအစိုးရသည် ဤကိစ္စကို အလေး ထား ဆောင်ရွက်လျက်ရှိ ပါကြောင်း၊ နှစ်နိုင်ငံ ချစ်ကြည်ရင်းနှီးသည့် အားလျော်စွာ အမြန်ဆုံးဆောင်ရွက် လျက်ရှိပါကြောင်း၊ ဘင်္ဂလားဒေ့ရ်ှနိုင်ငံသို့ ပြန် လည်ခေါ်ယူမှုလုပ်ငန်းစဉ်ကို လာမည့် ၇-၆-၂၀၁၅ ရက်နေ့ တွင် စတင်နိုင်မည်ဖြစ်ကြောင်း ပြန်လည်ဖြေကြားခဲ့တယ်လို့ သတင်းက ဆိုပါတယ်။

မြန်မာ့ရေပိုင်နက်ထဲ မေလ ၂၁ ရက်နဲ့ ၂၉ရက်တို့မှာ တွေ့ရှိဖမ်းမိတဲ့ လူမှောင်ခိုကူးစက်လှေတွေပေါ်က ဘင်္ဂလားဒေ့ရ်ှနိုင်ငံသား အများစုပါဝင်တဲ့ လူ ၁၀၀၀ လောက်ကို လတ်တလောမှာ ရခိုင်ပြည်နယ်နဲ့ ဘင်္ဂလားဒေ့ရ်ှနယ်စပ် တောင်ပြိုလက်ဝဲမှာ ယာယီနေရာချထားပေးထားတယ်လို့ နိုင်ငံခြားရေးဝန်ကြီးဌာနရဲ့ သတင်းထုတ်ပြန်ချက်မှာ ဖော်ပြထားပါတယ်။

By ဒီဗွီဘီ
http://burmese.dvb.no