ရဲတပ်ဖွဲ့နဲ့ ပညာရေးဝန်ကြီးဌာနကို ဗကသကျောင်းသားတွေ တရားစွဲမည်

 လက်ပံတန်းမြို့မှာ လုံခြုံရေးယူထားတဲ့ ရဲတပ်ဖွဲ့ဝင်တချို့ကို မတ်လ ၆ ရက်နေ့က တွေ့ရစဉ်။ Photo: Kyaw Zaw Win/RFA

 အမျိုးသား ပညာရေး ဥပဒေကို ပြင်ဆင်ပေးဖို့ သပိတ်မှောက်ဆန္ဒပြခဲ့ကြတဲ့ ဒီမိုကရေစီ ပညာရေး ပင်မသပိတ်စစ်ကျောင်းကို ပြီးခဲ့တဲ့ မတ်လအတွင်း အကြမ်းဖက်ဖြိုခွဲခဲ့တဲ့ ပြည်ထဲရေး ဝန်ကြီးဌာန လက်အောက်ခံ မြန်မာနိုင်ငံ ရဲတပ်ဖွဲ့နဲ့ အဲဒီ့လိုအကြမ်းဖက်မှု ဖြစ်ပေါ်အောင် တွန်းအားပေးခဲ့တယ်လို့ ယူဆရတဲ့ ပညာရေး ဝန်ကြီးဌာနတို့ကို  ဗမာနိုင်ငံလုံးဆိုင်ရာ ကျောင်းသား သမဂ္ဂများ အဖွဲ့ချုပ် (ဗကသ)က တရားစွဲဆိုသွားမယ်လို့ သိရပါတယ်။

နိုင်ငံတကာ ဥပဒေတွေ အရဖြစ်စေ၊ ပြည်တွင်းဥပဒေတွေ အရဖြစ်စေ သင့်တော်တဲ့ ဥပဒေပုဒ်မတွေနဲ့ တရားစွဲဆိုသွားမှာဖြစ်တယ်လို့ ဗကသကျောင်းသားသမဂ္ဂ ဦးဆောင်ကော်မတီဝင် ကိုအောင်နေပိုင်က ပြောပါတယ်။

"ဒီဥပဒေချိုးဖောက်တဲ့အတွက် သူတို့ရဲ့မတရားတဲ့ဥပဒေအတိုင်း ကျနော်တို့မှာလည်း ဥပဒေအရ ပြန်လည်ပြီး တရားစွဲဆိုပိုင်ခွင့်ရှိတယ်လို့ ကျနော်တို့ယူဆတယ်၊ ဥပမာ နိုင်ငံတကာနဲ့ ပတ်သက်တဲ့ ဥပဒေပဲဖြစ်ဖြစ် ဗမာပြည်အတွင်းမှာရှိတဲ့ ဥပဒေနဲ့ပဲဖြစ်ဖြစ် နောက်ဆုံးပြည်ထောင်စု တရားလွှတ်တော်ချုပ်ဆီ စာချွန်လွှာပို့တာမျိုးတွေ ကျနော်တို့တွေ ဆောင်ရွက်သွားဖို့ရှိတယ်"

အဲဒီ့လိုတရားစွဲနိုင်ဖို့အတွက် ဥပဒေပညာရှင်တွေနဲ့ ဆွေးနွေးတိုင်ပင်နေပြီး တရားစွဲဆိုနိုင်မယ့် သက်သေခံမှတ်တမ်းတွေ၊ ကျောင်းသားတွေအပေါ် လူ့အခွင့်အရေးချိုးဖောက်ပြီး ရိုက်နှက်ဖမ်းဆီးစစ်ဆေးခဲ့တာတွေအတွက် အချက်အလက်တွေ စုဆောင်းကောက်ယူနေတယ်လို့ သိရပါတယ်။

ဗမာနိုင်ငံလုံးဆိုင်ရာ ကျောင်းသားများအဖွဲ့ချုပ်ဝင်တွေ ဦးဆောင်တဲ့ ပင်မကျောင်းသား သပိတ်စစ်ကြောင်း ကို မတ်လ ၁၀ ရက်နေ့က လက်ပံတန်းမြို့မှာ ရဲတွေက အကြမ်းဖက်ဖြိုခွင်းပြီးနောက် ကျောင်းသားတွေနဲ့ ၀န်းရံပြည်သူ ၁၂၇ ဦးကို ဖမ်းဆီးခဲ့ပြီးနောက် သာယာဝတီထောင်ကိုပို့ဆောင်ခဲ့ပါတယ်။

အဲဒီနောက် ၅၉ ဦးကို ပြန်လွှတ်ပေးခဲ့ပြီး ကျန်တဲ့သူတွေကို တရားစွဲဆိုထားပါတယ်။ လက်ပံတန်း ကျောင်းသားသပိတ်ဖြိုခွဲခံရပြီးနောက်ပိုင်း ဒီနေ့အထိ နိုင်ငံတ၀ှမ်းမှာ ဖမ်းဆီးချုပ်နှောင်တရားစွဲဆိုခံရတဲ့ ကျောင်းသူကျောင်းသား စုစုပေါင်း ၂၀၀ နီးပါးရှိပြီလို့လည်း သိရပါတယ်။

RFA Burmese
http://www.rfa.org/burmese