ပညာရေး ဥပဒေပြုပြင်ရေး တပ်မတော်သားကိုယ်စားလှယ်တွေ ပါဝင်ဆွေးနွေး

အမျိုးသားလွှတ်တော်မှာ ကြားနာပွဲတွေကျင်းပပြီး ပြင်ဆင်ရေးဆွဲထားတဲ့ အမျိုးသား ပညာရေး ဥပဒေကို ပြင်ဆင်တဲ့ ဥပဒေမူကြမ်းကို ဒုတိယနေ့အဖြစ် အမျိုးသားလွှတ်တော်မှာ ကိုယ်စားလှယ် ၆ ဦးက ဆွေးနွေးကြပါတယ်။

အမျိုးသားလွှတ်တော်မှာ ဒီနေ့ ဆွေးနွေးရာ ပညာရေးအသုံးစရိတ်သတ်မှတ်ချက်ကို ပြင်ဆင်ပေးဖို့ တပ်မတော်သားလွှတ်တော်ကိုယ်စားလှယ် ဗိုလ်မှူးအောင်ကျော်ဇောက ဆွေးနွေးခဲ့ပါတယ်။

"နိုင်ငံတော်၏ ပညာရေးအသုံးစရိတ်ကို ၅ နှစ်အတွင်း တစ်နိုင်ငံလုံးအသုံးစရိတ်၏ သင့်လျော်သည့် ရာခိုင်နှုန်းထိ နှစ်စဉ် တိုးမြှင့်သုံးစွဲနိုင်ရန် ရည် မှန်းဆောင်ရွက်ရမည်လို့ ပြင်ဆင်ပေးသင့်ကြောင်း အကြံပေးတင်ပြလိုပါတယ်၊ နိုင်ငံတစ်နိုင်ငံဖွံ့ဖြိုးတိုးတက်ဖို့ အတွက် လူ့စွမ်းအားအရင်းအမြစ်များ ဖွံ့ဖြိုးတိုးတက်ရေးဟာ အလွန်ပဲအသုံးပါတဲ့ အတွက် ပညာရေးအသုံးစရိတ်ကို နှစ်စဉ်တိုးမြှင့်သုံးစွဲသင့်တာအမှန်ပဲဖြစ်ပါတယ်၊ ဒီလိုတိုးမြှင့်သုံးစွဲတဲ့အခါ တစ်နိုင်ငံလုံးအသုံးစရိတ်၏ ရာခိုင်နှုန်းမည်မျှဖြစ်ရမယ်လို့ အမျိုးသားပညာရေး ဥပဒေမှာပုံသေထည့်သွင်းပြဌာန်းခဲ့မယ်ဆိုရင် လက်တွေ့အကောင် အထည်ဖော်ဆောင်ရွက်တဲ့အခါမှာ နိုင်ငံတော်ရဲ့လိုအပ်ချက်အရ ဘဏ္ဍငွေကိုလိုတိုး၊ ပိုလျှော့ဆောင်ရွက်ဖို့အတွက် အခက်အခဲ၊ အကန့်အသတ်ဖြစ် သွားနိုင်တဲ့အတွက် ကြောင့် တစ်နိုင်ငံလုံးအသုံးစရိတ်၏သင့်လျော်သည့်ရာခိုင်နှုန်းအထိ နှစ်စဉ်တိုးမြှင့် သုံးစွဲသွားရန်လိုသာ ထည့်သွင်းပြဌာန်း သင့်ကြောင်း အကြံပြုဆွေးနွေးလိုပါတယ်"

အဲဒီဥပဒေကြမ်းမှာ ပညာရေးလွတ်လပ်ခွင့်ရှိရေး၊ ဆရာ ဆရာမများ သမဂ္ဂဖွဲ့စည်းခွင့် ရှိရေး၊ အခမဲ့ပညာသင်ကြားရေးကို အခြေခံပညာအဆင့်ကနေခွင့်ပြုပေးဖို့နဲ့ တက္ကသိုလ် ဝင်ခွင့်ကို အမှတ်စာရင်းနဲ့မသတ်မှတ်ဘဲ သက်ဆိုင်ရာတက္ကသိုလ်တွေမှာ လွတ်လွတ် လပ်လပ် လျှောက်ထားခွင့်ရှိရေးတို့ ပါရှိပါတယ်။

ပညာရေးအသုံးစားရိတ် ၂၀ ရာခိုင်နှုန်းအထက်အထိသုံးစွဲခွင့် ဆိုတဲ့အချက်ကို ကျောင်းသူ ကျောင်းသားတွေ၊ အစိုးရ NNER နဲ့ လွှတ်တော်ကိုယ်စားလှယ်တွေ က ၄ ပွင့်ဆိုင်ဆွေးနွေးပွဲတွေမှာ သဘောတူခဲ့တာဖြစ်ပါတယ်။

ဒီနေ့ ဆွေးနွေးခဲ့တဲ့ လွှတ်တော်ကိုယ်စားလှယ်တွေက ဥပဒေမူကြမ်းမှာပါတဲ့ စကားလုံး အသုံးအနှုန်းတွေ၊ အဓိပ္ပါယ်ဖွင့်ဆိုချက်တွေနဲ့ ဥပဒေဆိုင်ရာတွေ ကို ပြင်ဆင်ချက်တစ်ခု ချင်းစီအလိုက် ဆွေးနွေးခဲ့ကြပါတယ်။

အဲ့ဒီဥပဒေမူကြမ်းကို အမျိုးသားလွှတ်တော်ကိုယ်စားလှယ် ၁၄ ဦးက ၂ ရက်ကြာ ဆွေးနွေးခဲ့တာဖြစ်ပါတယ်။

RFA Burmese
http://www.rfa.org/burmese