ကိုးကန့်တိုက်ပွဲတွေမှာ ပါဝင်ကြောင်း စွပ်စွဲချက် SSPP/SSA အဖွဲ့ ငြင်းဆို

ရှမ်းပြည် တပ်မတော် (မြောက်ပိုင်း) SSPP/SSA တည်ထောင်ခြင်း ၄၈ နှစ်ပြည့် အခမ်းအနားတွင် SSA တပ်သားများ စစ်ရေးပြချီတက်နေကြစဉ်။ Photo courtesy of SSPP/SSA

ကိုးကန့်နယ်မှာဖြစ်ပွားနေတဲ့ တိုက်ပွဲတွေမှာ ကိုးကန့်အဖွဲ့တွေနဲ့အတူ တပ်မတော်ကို တိုက်ခိုက်တာမှာ SPPP/SSA ရှမ်းပြည်တိုးတက်ရေးပါတီ၊ ရှမ်းပြည်တပ်မတော် ပါဝင်တယ်လို့ စွပ်စွဲပြောဆိုမှုနဲ့ပတ်သက်ပြီး ကန့်ကွက်ကြောင်း  SSPP/SSA က RFA ကို ပြောပါတယ်။

ပြီးခဲ့တဲ့ ဖေဖ၀ါရီလ ၉ ရက်နေ့ကစပြီး  ကိုးကန့်နယ်အတွင်းဖြစ်ပွားတဲ့ တိုက်ပွဲတွေအတွင်း အစိုးရတပ်တွေကို ကိုးကန့်တပ်ဖွဲ့တွေအပြင် KIA ကချင်လွတ်မြောက်ရေးတပ်၊ တအာင်းအမျိုးသား လွတ်မြောက်ရေးတပ်မတော် TNLA ၊ ရှမ်းပြည်တပ်မတော် (၀မ်ဟိုင်း) အဖွဲ့တွေ ပူးပေါင်းပါဝင်တိုက်ခိုက်တယ်လို့ ကာကွယ်ရေးဝန်ကြီးဌာနရဲ့ လူမှုရေးစာမျက်နှာမှာ ရေးသားထားပါတယ်။

ဒီကိစ္စနဲ့ပတ်သက်ပြီး SSPP/SSA အထွေထွေအတွင်းရေးမှူး ဦးခွန်ဆိုင်းက ငြင်းဆိုပါတယ်။

"သံလွင်မြစ်အရှေ့ဘက်မှာ ကျနော်တို့တပ်တွေမရှိဘူး၊ အများကြီးဝေးပါတယ်၊ သံလွင်မြစ်ကြီးခြားထားပါတယ်၊ တစ်ခုကကြားထဲက မဟာမိတ်အဖွဲ့အစည်းတွေရှိပါတယ်၊ ကျန်တဲ့အဖွဲ့အစည်းတွေရှိပါတယ်၊ အဲ့ဒါမရှိတာကို ဘယ်လိုကြောင့် ကျနော်တို့ကို ကိုးကန့်မှာ ပါဝင်တိုက်ခိုက်နေပါတယ်လို့ ပြောနေတာဟာ တရားနည်းလမ်းမကျပါဘူး၊ လက်တွေ့လည်းမကျပါဘူး၊ အဲ့ဒါကိုကျနော်တို့ လုံးဝကန့်ကွက်တယ်"

ဦးခွန်ဆိုင်းက ၀မ်ဟိုင်းမှာရှိတဲ့ SSA တပ်တွေကို အစိုးရတပ်တွေက တပ်အချင်းချင်းအဆက်အသွယ်နဲ့ လှုပ်ရှားလို့မရအောင် ပိတ်ဆို့ထားတယ်လို့ ပြောပါတယ်။

အခုလို ကာကွယ်ရေးဝန်ကြီးဌာနရဲ့ပြောဆိုချက်နဲ့ ပတ်သက်ပြီး KIA အဖွဲ့ကလည်း ငြင်းဆိုထားပါတယ်။  ဖြစ်ပွားတဲ့တိုက်ပွဲတွေမှာ တအာင်းအမျိုးသား လွတ်မြောက်ရေးတပ် TNLA နဲ့ ရခိ်ုင်တပ်မတော် AA တို့က မိမိတို့ ပါဝင်တိုက်ခိုက်ခဲ့ကြောင်း ပြောဆိုထားတာဖြစ်ပါတယ်။

RFA Burmese
http://www.rfa.org/burmese/news/sspp-ssa-decline-govt-accuse-02192015094412.html