မုံရွာတွင် ကြက်ငှက်တုပ်ကွေးကြောင့် အစုအပြုံလိုက် သေဆုံး၊ သယ်ယူခွင့်ပိတ်

မုံရွာမြို့က ကြက်မွေးမြူရေးဇုန်မှာ ကြက်ငှက်တုပ်ကွေးရောဂါ (H5N1) စစ်ဆေးတွေ့ရှိတာကြောင့် စစ်ကိုင်းတိုင်းဒေသတွင်းမှာ ကြက်ငှက်တွေ သယ်ယူဖြတ်သန်းခွင့် ပိတ်ပင်ထားပါတယ်။

မုံရွာမြို့က ကြက်မွေးမြူရေးဇုန်မှာရှိတဲ့ ကြက်ခြံနဲ့ ငုံးခြံတွေမှာ အစုအပြုံလိုက် သေဆုံးမှုတွေ ရှိတဲ့အတွက် မုံရွာမြို့နယ် မွေးမြူရေးနဲ့ ကုသရေးဦးစီးဌာနက လုံခြုံရေး တိုးမြှင့်ဆောင်ရွက်တဲ့အနေနဲ့ စစ်ကိုင်းတိုင်းဒေသတွင်းမှာ ကြက်ငှက်ဖြတ်သန်းသယ်ယူခွင့်တွေကို ပိတ်ပင်ထားတာလို့ မုံရွာမွေးမြူရေးလုပ်ငန်းရှင်များအသင်းဥက္ကဋ္ဌ ဦးအောင်ဝင်းသန်းက ပြောပါတယ်။

“ကျနော်တို့ လုံခြုံရေးကို တိုးမြှင့်ပြီးလုပ်ကိုင်တယ်။ မွေးမြူရေးသမားတွေကိုလည်း အသေအပျောက်ရှိရင် ရောင်းမထုတ်ဖို့၊ ချက်ပြုတ်မစားဖို့၊ စနစ်တကျမြှုပ်ဖို့ နှစ်စဉ်နှစ်တိုင်းပဲ၊ ဒီလိုအချိန်ရောက်တိုင်း နှိုးဆော်ပေးတယ်။ ၁၈ ရက်နေ့မှာ ကြက်ခြံတခြံက ကြက်ဆုံးရှုံးမှုတွေ ရှိတဲ့အကြောင်း အကြောင်းကြားလာလို့ မန္တလေး ဓာတ်ခွဲခန်းပို့ပြီး စမ်းသပ်တယ်။”

ဖေဖော်ဝါရီ ၁၈ ရက်ကနေ ၂၅ ရက်နေ့ အထိ ၁ ပတ်အတွင်း မုံရွာမွေးမြူရေးဇုန်မှာ မွေးမြူထားတဲ့ ကြက်နဲ့ငုံး ကောင်ရေ ထောင်သောင်းချီ သုတ်သင်ပစ်ခဲ့ရပြီး အခုတော့ ဇုန်အပြင်ဘက်ကို ကြက်ငှက်တုပ်ကွေးရောဂါ မပြန့်ပွားအောင် ကန့်သတ်လုပ်ဆောင်နေပါတယ်။

ကြက်ခြံပိုင်ရှင်တဦးဖြစ်တဲ့ ဦးကောင်းခန့်သော်က “အစာစားလိုက် သေလိုက်၊ ရေသောက်လိုက် သေလိုက်နဲ့ နည်းမျိုးစုံနဲ့ သေနေတာ အခု တခြံလုံးကို သေသွားလို့ ကျနော်က ဥက္ကဋ္ဌကို လာပြောတာပါ” လို့ ပြောပါတယ်။

ဖေဖော်ဝါရီ ၂၆ ရက်နေ့ထိ ကောက်ယူရရှိတဲ့ စာရင်းတွေအရ ငုံးအကောင်ရေ ၁၃၆၀၀ နဲ့ ကြက်ကောင်ရေ ၃၂၀၀ ကျော်သေဆုံးခဲ့ပြီလို့လည်း ပြောပါတယ်။

သေဆုံးတဲ့ငုံးနဲ့ကြက်တွေကို အနက် ၁၀ ပေ နဲ့ အကျယ် ၁၀ ပေပတ်လည်လောက်ရှိတဲ့ ကျင်းတွေတူးပြီး မြေမြှုပ်ပေးတယ်လို့ ကြက်ငှက်မြှုပ်နှံပေးနေသူတဦးက ပြောပါတယ်။

“မှန်းလိုက်ရင်တော့ မနည်းဘူး။ တအိမ်တအိမ်ထွက်လာတာ မနည်းဘူး။ ငုံးဆိုရင်လည်း ၂ ၀၀၀၊ ၃၀၀၀။ ကြက်ဆိုရင်လည်း ၄၀၀၊ ၅၀၀ ဒါတောင် နည်းတဲ့အိမ်လေးတွေ။ များတဲ့ခြံတွေဆို ၁၀၀၀ ကျော်၊ ၂၀၀၀ ကျော် ထွက်တယ်။”

မုံရွာမှာ သေဆုံးတဲ့ကြက်ငှက်တွေကို ဓာတ်ခွဲ စစ်ဆေးခဲ့ရာမှာ H5N1 ဗိုင်းရပ်စ်ပိုး တွေ့ရှိရတယ်လို့ နိုင်ငံပိုင်သတင်းစာတွေမှာလည်း အတည်ပြုထားပြီး ကြက်ငှက်တုပ်ကွေးရောဂါ လူတွေထံ မကူးစက်ဖို့ လုပ်ဆောင်ရမယ့်အချက်တွေ အသိပေး ဖော်ပြထားပါတယ်။

စစ်ကိုင်းတိုင်း မုံရွာမှာ ၂၀၀၆၊ ၂၀၁၀နဲ့ အခု ၂၀၁၅ တို့မှာ ကြက်ငှက်တုပ်ကွေးရောဂါ ၃ ကြိမ် ဖြစ်ပွားခဲ့ပါတယ်။ ၂၀၀၆ ခုနှစ် စတင်ဖြစ်ပွားခဲ့တုန်းက အဆိုးဆုံးဖြစ်ပြီး ကြက်ကောင်ရေ သောင်းနဲ့ချီ သတ်ပစ်ခဲ့ရပါတယ်။

By ဒီဗွီဘီ
http://burmese.dvb.no/archives/83452