အနည်းဆုံးလိုအပ်ဝင်ငွေ အလုပ်သမားတွေ ဝန်ကြီးတင်ပြ

ရန်ကုန်တိုင်းဒေသကြီး ရွှေပြည်သာစက်မှုဇုန် ၃ က အလုပ်သမားတွေ ဖေဖော်ဝါရီလ ၁၇ ရက်နေ့က ဆန္ဒပြကြစဉ်။ Photo: Wai Yan Moe Myint/RFA

ရန်ကုန်တိုင်း ရွှေပြည်သာစက်မှုဇုံမှာ သပိတ်မှောက်နေ တဲ့ အလုပ်သမားတွေက မျက်မှောက်ကာလ ကုန်ဈေးနှုန်းတွေအရ၊ လူတစ်ယောက်အတွက် တစ်လကို၊ အနည်းဆုံး ကျပ်ငွေ ၁ သိန်း ၃ သောင်းခန့် ဝင်ငွေရမှ ရှင်သန်ရပ်တည်နိုင်မယ်လို့ တွက်ချက်ပြထား တဲ့ အစီရင်စာတစ်စောင်ကို အလုပ်သမားဝန်ကြီးထံ မနေ့က တင်ပြလိုက်ပါတယ်။

ဒီပမာဏဟာ အလုပ်သမားတစ်ယောက်အတွက် မရှိမဖြစ်လိုအပ်တဲ့ငွေဖြစ်ပြီး၊ ဒီထဲမှာ ကျန်းမာရေးစရိတ်နဲ့ အခြားမိသားစုရေးအတွက် မပါသေးဘူးလို့ အလုပ် သမားစုပေါင်းသပိတ်ကော်မတီဝင် ကိုသူဇော်က RFA ကိုပြောပါတယ်။

"အလုပ်သမားဝန်ကြီးဆီကို ဒီနေ့မှာ အစီရင်ခံစာတစ်စောင် ပို့ပေးလိုက်ပါတယ်၊ အစီရင်ခံစာထဲမှာ ပျမ်းမျှတင်ပေးလိုက်တာက ကျနော်တို့ နေထိုင်စရိတ်က ၂ သောင်းပေါ့နော်၊ စားသောက်စရိတ်က ၅ သောင်းလောက်ကျတယ်၊ လမ်းစရိတ်တွေရှိတယ်၊ အားလုံးပေါင်းတစ်လကို ၁ သိန်း ၃ သောင်းလောက် အလုပ်သမားတွေ ပျမ်းမျှဝင်ငွေထည့်ပေးလိုက်တယ်၊ အဝတ်အစားစရိတ်၊ ကျန်းမာရေးစရိတ်တွေ ထည့်မတွက်သေးဘူး"

E-Lan Myanmar, Costec, Ford Glory နဲ့ ဟန်ကျင်းအထည်ချုပ်စက်ရုံတွေမှာရှိတဲ့ အလုပ်သမားတွေက အခြေခံလစာကိုကျပ် ၃ သောင်း တိုးမြှင့်ပေးဖို့ သပိတ်မှောက် တောင်းဆိုနေကြတာဖြစ်ပါတယ်။

အလုပ်သမားတယောက်အတွက် လက်ရှိအနိမ့်ဆုံးလစာအဖြစ် ၄ သောင်းဝန်းကျင်သာရနေပြီး၊ အချိန်ပိုလုပ်ခ၊ ရှားပါးစရိတ်၊ ပျက်ရက်မရှိလုပ်ခနဲ့ အခြားချီးမြှင့်ငွေတွေအားလုံးပေါင်းမှ အဲဒီအလုပ်သမားဟာ ကျပ်ငွေ ၈ သောင်းနဲ့ ၉ သောင်းဝန်းကျင်လောက်သာရရှိကြောင်းနဲ့ နေ့ရောညပါ အလုပ်လုပ်နေကြရပေမဲ့ လုံလောက်ခြင်းမရှိလို့ အခုလို သပိတ်မှောက်တောင်းဆိုနေကြတာဖြစ်ကြောင်းလည်း အလုပ်သမားတွေကပြောပါတယ်။

ဒီသပိတ်တွေကနေ မငြိမ်သက်မှုတွေဖြစ်လာရင် အရေးယူမယ်လို့ ရန်ကုန်တိုင်းအစိုးရက ပြီးခဲ့တဲ့ရက်က ကြေညာထားပြီး အလုပ်သမားတွေကလည်း သူတို့တောင်းဆိုထားတဲ့အတိုင်း အလုပ်ရှင်ဘက်က အခြေခံလစာကို နောက်ထပ်ကျပ် ၃ သောင်း တိုးမပေးဘူးဆိုရင် သပိတ်မလှန်ဘူးလို့ ပြောနေကြပါတယ်။

RFA Burmese
http://www.rfa.org/burmese/news/minimum-wage-propose-ministry-02192015222909.html