PR စနစ် အတည်ပြုချက် စိစစ်ဖို့ အခြေခံဥပဒေခုံရုံးထံ အမျိုးသားလွှတ်တော်တင်ပြ

အမျိုးသား လွှတ်တော် ရွေးကောက်ပွဲမှာ PR ခေါ် အချိုးကျကိုယ်စားပြုစနစ်ကို ကျင့်သုံးဖို့ အမျိုးသား လွှတ်တော်က အတည်ပြု ထားတာကို လွှတ်တော် ကိုယ်စားလှယ် ၂၆ ဦးက အဲဒီ့စနစ်ဟာ ဖွဲ့စည်းပုံအခြေခံ ဥပဒေနဲ့ ညီညွတ်ခြင်း ရှိ၊ မရှိ စိစစ်ပေးဖို့ အခြေခံ ဥပဒေ ခုံရုံးထံ တင်ပြထားကြောင်း ဒီနေ့ လွှတ်တော်ထံ အသိပေးခဲ့ပါတယ်။

အမျိုးသား လွှတ်တော် ကိုယ်စားလှယ် ၂၆ ဦးရဲ့ တင်ပြမှုကို အမျိုးသား လွှတ်တော် ဥက္ကဌ ဦးခင်အောင်မြင့် က လွှတ်တော်ထံ အခုလိုအသိပေးကြေညာခဲ့ပါတယ်။

"အမျိုးသားလွှတ်တော် ရွေးကောက်ပွဲများတွင် ပီအာစနစ်ကျင့်သုံးခြင်း ကိုယ်ပိုင်အုပ်ချုပ်ခွင့်ရဒေသများကို ချန်လှပ်ပြီး ကျန်တိုင်းဒေသကြီးများနှင့် ပြည်နယ်တို့တွင် တပြေးညီကျင့်သုံးရန် လျာထားခြင်းနဲ့ တင်ပြထားသော ရွေးကောက်ပွဲပုံစံ နှစ်မျိုးတို့သည် ဖွဲ့စည်းပုံအခြေခံဥပဒေနဲ့ ကိုက်ညီမှု ရှိ၊ မရှိ အဆုံးအဖြတ်ပြုပေးပါရန် အမျိုးသားလွှတ်တော် ကိုယ်စားလှယ် ဦးအောင်ကြည်ညွန့် အပါအဝင် အမျိုးသားလွှတ်တော်ကိုယ်စားလှယ် ၂၆ ဦးတို့က အမျိုးသားလွှတ်တော်ဥက္ကဌ မှတဆင့် နိုင်ငံတော်ဖွဲ့စည်းပုံ အခြေခံဥပဒေဆိုင်ရာခုံရုံးသို့ တင်ပြလာပါတယ်"

အမျိုးသားလွှတ်တော်ရွေးကောက်ပွဲတွေမှာ PR စနစ် ကျင့်သုံးပေးဖို့အဆိုကို အမျိုးသား လွှတ်တော် ကိုယ်စားလှယ် ဒေါ်ခင်ဝိုင်းကြည်က ပြီးခဲ့တဲ့နှစ် ဇွန်လမှာ လွှတ်တော်ထံ တင်ပြခဲ့တာဖြစ်ပါတယ်။

အဲဒီ့အဆိုကို အမျိုးသားလွှတ်တော်က အတည်ပြုလိုက်ပြီးနောက် PR ရွေးကောက်ပွဲစနစ်တွေကို လေ့လာဖို့ ကော်မရှင်တစ်ရပ်ကို ဖွဲ့စည်းခဲ့ပါတယ်။ ပြည်သူ့လွှတ်တော်ကတော့ PR စနစ်ဟာ ဖွဲ့စည်းပုံ အခြေခံဥပဒေနဲ့ ညီညွတ်မှုမရှိဘူးဆိုပြီး ပယ်ချထားပါတယ်။

RFA Burmese
https://www.facebook.com/pages/RFA-Burmese/39218993127