လျှပ်စစ်မီတာနှုန်းထား ကြီးမြင့်မှု ထားဝယ်မှာ ထောင်နဲ့ချီ ဆန္ဒပြ

တနင်္သာရီတိုင်း ဒေသကြီးမှာ မီတာခ တစ်ယူနစ်ကို ၃၅ ကျပ်နဲ့ သတ်မှတ်ကောက်ယူဖို့ ဒေသခံ တစ်ထောင်ကျော်က ဒီနေ့ ထားဝယ်မြို့မှာ ဆန္ဒပြတောင်းဆို ကြပါတယ်။

လက်ရှိမီတာခ တစ်ယူနစ်ဟာ ကျပ်လေးရာကနေ ကျပ်တစ်ထောင်ကျော်အထိ ပေးပြီးသုံးစွဲနေရကြောင်း ဆန္ဒပြတောင်းဆိုရာမှာ ပါဝင်တဲ့ ထားဝယ်လူ့အခွင့်အရေး စောင့်ကြည်ရေး ကွန်ရက်က ကိုသန်းဝင်းက ပြောပါတယ်။

"တနင်္သာရီတိုင်းမှာ ကျနော်တို့ သဘာဝသယံဇာတ ဓါတ်ငွေ့တွေဟာ လွန်ခဲ့တဲ့ ၁၇ နှစ်ကျော်ကတည်းက ထုတ်ယူသွားတာပါ၊ ဒါပေမဲ့ တနင်္သာရီတိုင်းတွေမှာ ဒီသယံဇာတတွေ သုံးစွဲခွင့်မရရှိဘဲနဲ့ လျှပ်စစ်မီတာခ တစ်ယူနစ်ကို ၄ဝဝ ကျော် ၅ဝဝ တချို့နေရာတွေမှာ ၁ဝဝဝ ကျော်အထိပေးနေရတာ ကျနော်တို့ရဲ့ နိုင်ငံသားအခွင့်အရေးတွေ ချိုးဖောက်တာပဲ၊ ဒါကြောင့်မို့ ကျနော်တို့ဟာ နိုင်ငံသားတိုင်း တန်းတူအခွင့်အရေးရရှိစေချင်လို့ ဒီနေ့တိုင်းအစိုးရကိုရော၊ ပြည်ထောင်စုအစိုးရကိုပါ သိစေနိုင်ရန်အတွက် ကျနော်တို့ဆန္ဒထုတ်ဖော်ခြင်းဖြစ်ပါတယ်"

ဆန္ဒပြပွဲကို တနင်္သာရီတိုင်း သဘာဝသယံဇာတ အကျိုးခံစားခွင့်ရရှိရေးကော်မတီက ဦးဆောင်တာဖြစ်ပြီး ထားဝယ်၊ လောင်းလုံ၊ သရက်ချောင်းနဲ့ ရေဖြူမြို့နယ်တွေကဒေသခံတွေ ပါဝင်ခဲ့ကြပါတယ်။ တနင်္သာရီတိုင်းဒေသကြီးမှာ လျှပ်စစ်ဓာတ်အားကို အစိုးရကဖြန့်ဝေပေးတာမဟုတ်ဘဲ ပုဂ္ဂလိကလုပ်ငန်းရှင်တွေကသာ မီးစက်တွေနဲ့ လျှပ်စစ်မီးပေးနေတာဖြစ်ပါတယ်။

RFA Burmese
https://www.facebook.com/pages/RFA-Burmese/39218993127