လက်နက်စည်းကမ်း ချိုးဖောက်တဲ့ ရဲတွေကို အရေးယူဖို့ လူ့အခွင့်အရေး ကော်မရှင် အကြံပြု

ပြီးခဲ့တဲ့ ဒီဇင်ဘာလ အတွင်းက ဖြစ်ပွားခဲ့တဲ့ လက်ပံတောင်းတောင် ပဋိပက္ခမှာ ရဲတပ်ဖွဲ့ဝင်တွေက အကြမ်းဖက် နှိမ်နင်းရေး လက်နက်တွေကို စနစ်တကျ ကိုင်တွယ်အသုံးပြုခဲ့ခြင်း မရှိတာကြောင့် နှစ်ဖက်ထိခိုက်မှု များခဲ့တာဖြစ်ကြောင်း မြန်မာနိုင်ငံ အမျိုးသား လူ့အခွင့်အရေး ကော်မရှင်က ဒီနေ့ ကြေညာချက် ထုတ်ပြန်လိုက်ပါတယ်။

လုံခြုံရေးစီမံချက်မှာပါတဲ့ ညွှန်ကြားချက်တွေကို စနစ်တကျ လိုက်နာခြင်းမရှိတဲ့ ရဲတပ်ဖွဲ့ဝင်တွေကို ဖော်ထုတ်အရေးယူရမှာဖြစ်တယ်လို့ ဆားလင်းကြီးမြို့နယ်မှာ သွားရောက်စုံစမ်းစစ်ဆေးခဲ့တဲ့ မြန်မာနိုင်ငံ အမျိုးသား လူ့အခွင့်အရေး ကော်မရှင်အဖွဲ့ဝင် ဒေါက်တာဉာဏ်ဇော်က ပြောပါတယ်။

"လူစုခွဲဖို့အဆင့်လိုက် ၇ ဆင့်လိုက် သုံးရမယ်လေ၊ အဆင့်အလိုက် အကွာအဝေးအလိုက် အဝေးကလာရင် ဘယ်လက်နက်နဲ့ ပစ်ရမယ်၊ နီးလာရင် ဘယ်လက်နက်နဲ့ ပစ်ရမယ်ဆိုပြီး အပိုင်းအလိုက် သူတို့သုံးစွဲမှုမရှိဘဲနဲ့ လက်နက်တွေအားလုံး တစ်ပြိုင်နက် အရေးပေါ်သုံးစွဲလိုက်တာတွေ့ရတယ်၊ နောက်ကွပ်ကဲမှုအဖွဲ့ကလည်း လုံခြုံရေးစီမံချက်ပါတဲ့ ပစ္စည်းအသုံးအဆောင်တွေကို အဆင့်အလိုက်ဆောင်ရွက်နိုင်ခဲ့မှု မရှိတာကိုတွေ့ရတယ်၊ ကွပ်ကဲမှုအဖွဲ့က တာဝန်ရှိတဲ့လူကို ဖော်ထုတ်ပေါ့"

လုံခြုံရေးရဲတပ်ဖွဲ့ဝင်တွေကို အဓိကရုဏ်းတွေမှာ လူစုခွဲဖို့အတွက် လိုအပ်တဲ့ လက်နက်ပစ္စည်းတွေ ပြည့်စုံစွာ ထုတ်ပေးထားနိုင်ခြင်းမရှိဘူးလို့လည်း ထုတ်ပြန်ချက်မှာ ပါရှိပါတယ်။ ဒါ့အပြင် တောင်သူ ဒေါ်ခင်ဝင်း သေဆုံးမှုနဲ့ ပတ်သက်ပြီး သေမှုသေခင်းနဲ့ ဆက်လက်အရေးယူ ဆောင်ရွက်သင့်ကြောင်းလည်း ဖော်ပြထားပါတယ်။

ဒီဇင်ဘာလ ၂၂ ရက်နေ့က လက်ပံတောင်းတောင် ကြေးနီစီမံကိန်းအနီး လိပ်ခွံတောင်ခြေမှာ ၀မ်ပေါင်ကုမ္ပဏီက လျော်ကြေးမယူထားတဲ့ လယ်ယာမြေတွေမှာ ခြံစည်းရိုးဝင်ခတ်ရာ တားမြစ်ခဲ့တဲ့ ဒေသခံလယ်သမားတွေနဲ့ လုံခြုံရေးရဲတပ်ဖွဲ့ဝင်တွေ ပဋိပက္ခဖြစ်ပွားပြီး တောင်သူ ဒေါ်ခင်ဝင်း သေနတ်ထိမှန် သေဆုံးခဲ့တာဖြစ်ပါတယ်။

အဲဒီပဋိပက္ခမှာ ဒေသခံ ၁၁ ဦးနဲ့ ရဲတပ်ဖွဲ့ဝင် ၁၁ ဦး ထိခိုက်ဒါဏ်ရာရရှိခဲ့တယ်လို့လည်း သိရပါတယ်။

RFA Burmese
https://www.facebook.com/pages/RFA-Burmese/39218993127