တရားမျှတရေးနဲ့ ဆင်းရဲသားများအရေး ဆရာတော်ချားလ်စ်ဘို အစိုးရကို တိုက်တွန်းမည်

မြန်မာနိုင်ငံမှာ လူတန်းစား မမျှမတမှုတွေကို ဖြေရှင်းပေးနိုင်ဖို့ အစိုးရကို တိုက်တွန်းသွားမယ်လို့ ပုပ်ရဟန်းမင်းကြီး ဖရန်စစ် ရွေးချယ်ထားတဲ့ ကာဒီနယ်ရဟန်းအမတ် ၂၀ ထဲက ရန်ကုန်ကက်သလစ် ခရစ်ယာန်ဂိုဏ်းချုပ် ဆရာတော် ချားလ်စ်ဘိုက ပြောပါတယ်။

မြန်မာအစိုးရနဲ့ တွေ့ဆုံရာမှာ ဆင်းရဲသားတွေရဲ့ အဆင့်အတန်းမြှင့်တင်ပေးဖို့အတွက် တိုက်တွန်းသွားမယ်လို့ ဆရာတော် ချားလ်စ်ဘိုက အခုလို ပြောပါတယ်။

"မြန်မာပြည်အတွက်ဆိုလို့ရှိရင် ကျနော်တို့ဆီက ငြိမ်းချမ်းမှသာလျှင် တိုးတက်နိုင်မယ်၊ ငြိမ်းချမ်းဖို့ရန်အတွက်က တရားမျှတမှသာ ငြိမ်းချမ်းမှုဖြစ်လာမယ်၊ ငြိမ်းချမ်းမှသာ တိုးတက်မယ်၊ ဒီမြန်မာပြည်မှာ ဖြစ်ပျက်နေတာက ပွင့်လင်းလာတယ် နောက်ပြီးတော့ မီဒီယာတွေက ပြောနိုင်ဆိုနိုင်ကြတယ်၊ ဒါပေမဲ့ မမျှမတတွေ ဖြစ်နေကြတာရှိတယ်၊ ဆင်းရဲနေတဲ့သူတွေက ဆင်းရဲနေကြတာရှိတယ်၊ ရနိုင်တဲ့သူ စားနိုင်တဲ့သူတွေက စားနိုင်ကြတယ်၊ အဲ့ဒါတွေကို အစိုးရအနေနဲ့ ဘယ်အဆင့်အတန်းပဲဖြစ်ဖြစ် တရားမျှတနိုင်ဖို့အတွက် အရေးကြီးပါတယ်"

ဆရာတော် ချားလ်စ်ဘိုဟာ မြန်မာနိုင်ငံရဲ့ ပထမဆုံး ကာဒီနယ် ရဟန်းအမတ်အဖြစ် ပြီးခဲ့တဲ့ ဇန်နဝါရီလ ၄ ရက်နေ့က ပုပ်ရဟန်းမင်းကြီး ဖရန့်စစ်ရဲ့ အရွေးချယ်ခံထားရတာပါ။

ဆရာတော် ချားလ်စ်ဘိုအပါအ၀င် ရွေးချယ်ခံရတဲ့ ရဟန်းအမတ် ၂၀ ကို လာမယ့်ဖေဖော်ဝါရီလ ၁၄ ရက်နေ့ အီတလီနိုင်ငံ ရောမမြို့ ဗာတီကန်နန်းတော်မှာ ပုပ်ရဟန်းမင်းကြီးက ခန့်အပ်မှာဖြစ်ပါတယ်။

အခုလို ဗုဒ္ဓဘာသာဝင် အများစုနေထိုင်ကြတဲ့ မြန်မာနိုင်ငံလို တိုင်းပြည်မှာ ကာဒီနလ် ရဟန်းအမတ်အဖြစ် ပုပ်ရဟန်းမင်းက ရွေးချယ်တာဟာ မြန်မာနိုင်ငံရဲ့ အရေးကိစ္စတွေကို ကမ္ဘာကဖြေရှင်းဆောင်ရွက်ပေးနိုင်ဖို့ စီစဉ်တာလို့ ယူဆကြောင်းလည်း ဆရာတော် ချားလ်စ်ဘိုကပြောပါတယ်။

RFA Burmese
https://www.facebook.com/pages/RFA-Burmese/39218993127?fref=nf