ချီတက်ဆန္ဒပြပွဲ ဆက်လက်ဆင်နွှဲဖို့ ကျောင်သားတွေ ဆုံးဖြတ်

အမျိုးသား ပညာရေး ဥပဒေကို ကန့်ကွက်တဲ့ အနေနဲ့ မန္တလေးမြို့ကနေ လမ်းလျှောက်ဆန္ဒပြတဲ့ ဆန္ဒပြ ကျောင်းသား ကျောင်းသူ တွေက လေးပွင့်ဆိုင် ဆွေးနွေးပွဲ ကျင်းပတဲ့ အထိ ဆက်လက် ချီတက်ဆန္ဒပြ ကြမယ်လို့ ပြောပါတယ်။

အစိုးရနဲ့ ကျောင်းသား ကိုယ်စားလှယ် တွေပါတဲ့ လေးပွင့်ဆိုင်တွေ့ဆုံပွဲကို လက်ခံပေမဲ့ ဖေဖော်ဝါရီလ ၁ ရက်နေ့ ဆွေးနွေးပွဲနေ့အထိ လမ်းလျှောက်ဖို့ ဆုံးဖြတ်ထားတယ်လို့ ဆန္ဒပြကျောင်းသား ကိုအောင်နေပိုင် က ပြောပါတယ်။

"ကျနော်တို့က ပုပ္ပားကိုရောက်နေတဲ့အတွက် ကျောက်ပံတောင်းမြို့ အထိရောက်အောင် ဆက်ထွက်တာပါ၊ ဆွေးနွေးပွဲနဲ့ပတ်သက်လို့ ကျနော်တို့အနေနဲ့ ဘာမှမပြောလိုပါဘူး၊ အဓိကကတော့ ကျနော်တို့က လမ်းကြောင်းဆက်ထွက်တဲ့သဘောပါပဲ၊ ကျနော်တို့အနေနဲ့ ညှိနှိုင်းဆောင်ရွက်ဖို့တွေ ရှိပါသေးတယ်၊ ကျနော်တို့ ဒီဖေဖော်ဝါရီ ၁ ရက်နေ့ မတိုင်ခင်အထိ လှုပ်ရှားမှုတွေဆက်သွားမှာပါ၊ ကျနော်တို့လျှောက်နေတယ်ဆိုတာက ဒီဖက်ကညှိနှိုင်းဆောင်ရွက်ရေးကိစ္စကိုလည်း သွားနေတယ်၊ တစ်ဖက်မှာလည်း တိုက်ပွဲပုံသဏ္ဍန်ကို သွားနေတယ်ဆိုတဲ့ သဘောမျိုးပါပဲ"

အဲဒီဆန္ဒပြကျောင်းသားတွေဟာ ဒီနေ့ ကျောက်ပံတောင်းမြို့မှာ ညအိပ်နားမှာဖြစ်ပါတယ်။ ဧရာဝတီတိုင်းက ကျောင်းသားကျောင်းသူတွေနဲ့ တောင်သူလယ်သမား အကျိုးဆောင်ကွန်ရက်က အမျိုးသားပညာရေးဥပဒေကို မနက်ဖြန် စတင်ကန့်ကွက်ဆန္ဒပြကြမယ်လို့ သိရပါတယ်။

စစ်တွေမြို့မှာလည်း ကျောင်းသား ကျောင်းသူ ၇၀၀ လောက်က အမျိုးသားပညာရေးဥပဒေကို ကန့်ကွက်ကြောင်း ဒီနေ့ ဆန္ဒပြခဲ့ကြပြီး ထားဝယ်မြို့က ဆန္ဒပြကျောင်းသား ကျောင်းသူတွေကတော့ ဆန္ဒပြပွဲကို ဒီနေ့ ရပ်နားလိုက်ပါတယ်။

ရန်ကုန်တက္ကသိုလ် စိန်ရတုခန်းမမှာ အစိုးရ၊ လွှတ်တော်၊ ကျောင်းသားတွေနဲ့ မြန်မာနိုင်ငံ ပညာရေး စနစ်ပြုပြင်ပြောင်းလဲရေး နိုင်ငံလုံးဆိုင်ရာကွန်ရက်တို့က အမျိုးသားပညာရေးဥပဒေနဲ့ ပတ်သက်ပြီး ရှေ့လ ၁ ရက်နေ့ ဆွေးနွေးကြမှာဖြစ်ပါတယ်။

RFA Burmese
https://www.facebook.com/pages/RFA-Burmese/39218993127