အစိုးရအဖွဲ့ မအား၍ လွှတ်တော် မကျင်းပနိုင်သည့် သဘောမျိုး တိုင်းလွှတ်တော်ဥက္ကဋ္ဌ ပြောဆိုမှုကို လက်မခံ နိုင်ကြောင်း ဒေါက်တာ ညိုညိုသင်းပြော

ရန်ကုန်၊ ဒီဇင်ဘာ ၃၁

ရန်ကုန်တိုင်း ဒေသကြီး အစိုးရအဖွဲ့ဝင်များ မအား၍ တိုင်းလွှတ်တော် မကျင်းပနိုင်သည့် သဘောမျိုး ဖြေရှင်း ခဲ့သော တိုင်းဒေသကြီး လွှတ်တော် ဥက္ကဋ္ဌ၏ ဖြေရှင်း ချက်သည် လက်ခံနိုင်ဖွယ်ရာ မရှိကြောင်း ရန်ကုန် တိုင်း ဒေသကြီး လွှတ်တော် ကိုယ်စားလှယ် ဒေါက်တာ ညိုညိုသင်းက ဒီဇင်ဘာလ ၃၁ ရက်တွင် မြန်မာ သံတော်ဆင့် သို့ ပြောသည်။

ရန်ကုန်တိုင်းဒေသကြီး အစိုးရအဖွဲ့ရုံး၌ ဒီဇင်ဘာလ ၃၀ ရက်နေ့က ပြုလုပ်သည့် ပြည်ထောင်စု လွှတ်တော် နာယက သူရဦးရွှေမန်းနှင့် လူမှုရေး အဖွဲ့အစည်းများ တိုင်းဒေသကြီး လွှတ်တော် ကိုယ်စားလှယ် များနှင့် တွေ့ဆုံ စဉ် ဒေါက်တာညိုညိုသင်းက ၄ နှစ်အတွင်း ၇၆ ရက်သာ ကျင်းပပြီး ချီးမြှင့်ငွေ တစ်လကျပ် ၂သိန်း ယူနေရခြင်းအပေါ် ရှက်မိကြောင်း ပြောကြားခဲ့ရာ တိုင်းလွှတ်တော် ဥက္ကဋ္ဌ ဦးစိန်တင်ဝင်းက အစိုးရအဖွဲ့ဝင်များ မအားသည့် အတွက်ကြောင့်ဟု ဖြေရှင်းခဲ့မှုအပေါ် ယခုကဲ့သို့ တုံ့ပြန် ပြောဆိုလိုက်ခြင်း ဖြစ်သည်။

““ဥက္ကဋ္ဌကြီး ပြန်ဖြေတဲ့ သဘောက ဒီလိုပဲလေ။ ၉ ဦးက အစိုးရအဖွဲ့ဝင်တွေ ဖြစ်တဲ့အတွက်ကြောင့် အစိုးရ အဖွဲ့ဝင်တွေ မအားတဲ့ အတွက်ကြောင့် မတက်နိုင်ဘူးဆိုတာက ရန်ကုန်တိုင်းအတွက်တော့ လုံလောက်တဲ့ အကြောင်းပြချက် မဟုတ်ဘူးလေ။ အစိုးရအဖွဲ့ဝင်တွေကလည်း ထိုက်သင့်တဲ့ ချီးမြှင့်ငွေကို သိန်း ၂၀ ပေါ့နော် ခံစားနေတယ်။ ခံစားနေတယ်ဆိုရင် ထိုက်တန်တဲ့ အလုပ်တွေလုပ်ဖို့ လိုတာပေါ့။ ကိုယ်ကလွှတ်တော် ကိုယ်စားလှယ် နေရာကလည်းနေတယ်၊ ၀န်ကြီးအနေနဲ့လည်း နေတယ်ဆိုရင် ၀န်ကြီးအလုပ်ကော လွှတ်တော် ကိုယ်စားလှယ် အလုပ်ကော တာဝန်ကျေဖို့ လိုတာပေါ့။ အစိုးရအဖွဲ့ဝင် ၉ ဦး လောက် လွှတ်တော်ကို မတက်နိုင်ရုံနဲ့ လွှတ်တော် မကျင်းပဘူး ဆိုတာက လက်ခံနိုင်တဲ့ အဖြေမဟုတ်ဘူးဆိုတာ ပြည်သူတစ်ရပ်လုံး သိပါတယ်”” ဟု ရန်ကုန်တိုင်းဒေသကြီး လွှတ်တော်ကိုယ်စားလှယ် ဒေါက်တာညိုညိုသင်း က မြန်မာသံတော်ဆင့်သို့ ပြောသည်။

ရန်ကုန်တိုင်းဒေသကြီး လွှတ်တော်အား ၂၀၁၁ ခုနှစ်တွင် ၁၄ ရက်၊ ၂၀၁၂ ခုနှစ်တွင် ၁၄ ရက်၊ ၂၀၁၃ ခုနှစ်တွင် ၂၃ ရက်၊ ၂၀၁၄ ခုနှစ်တွင် ၂၅ ရက် စုစုပေါင်း ၄ နှစ်အတွင်း ၇၆ ရက်သာ ကျင်းပနိုင်ခဲ့သည်။

““နေပြည်တော်မှာရှိတဲ့ အစိုးရအဖွဲ့က သမ္မတစနစ်နဲ့ သွားတယ်။ တိုင်းနဲ့ပြည်နယ်(၁၄)ခုက ပါလီမန်စနစ်နဲ့ သွားတယ်။အဲဒါ မကွဲပြားလို့ ဒီလိုဖြစ်နေတာ။ သမ္မတစနစ်မှာ အစိုးရအဖွဲ့ဝင် ၀န်ကြီးများ ဖြစ်သွားရင် လွှတ်တော် ကိုယ်စားလှယ်က နုတ်ထွက်ပေးရတယ်။ လွှတ်တော်နဲ့ အစိုးရအဖွဲ့နဲ့ သီးခြားစီ။ တိုင်းနဲ့ ပြည်နယ် ကျတော့ ပါလီမန်စနစ်””ဟု ရန်ကုန်တိုင်း ဒေသကြီး အစိုးရအဖွဲ့မှ ရခိုင် တိုင်းရင်းသားရေးရာ ၀န်ကြီး ဦးဇော်အေးမောင်က မြန်မာသံတော်ဆင့်သို့ ပြောသည်။

ရန်ကုန်တိုင်းဒေသကြီး လွှတ်တော်တွင် လွှတ်တော်ဥက္ကဋ္ဌကို ရန်ကုန်တိုင်းဒေသကြီး ၀န်ကြီးချုပ် အပါအ၀င် အစိုးရအဖွဲ့က သြဇာညောင်းသောကြောင့် လွှတ်တော်၏ လုပ်ငန်းစဉ်များတွင် အနှောင့်အယှက်များ ဖြစ်ပေါ် လျက်ရှိပြီး အုပ်ချုပ်ရေး အဖွဲ့အနေဖြင့် လွှတ်တော်၏ ထောက်ပြ ဝေဖန်မှုများကိုလည်း လက်ခံခြင်း မရှိကြောင်း ဝေဖန်မှုများ ထွက်ပေါ်လျက်ရှိသည်။

ဝိုင်းမော်

မြန်မာသံတော်ဆင့်သတင်းဌာန- http://www.facebook.com/myanmarherald