အခြေခံဥပဒေ ပြင်ပေးဖို့ ပခုက္ကူမြို့မှာ လူ ၁၀၀၀ နီးပါး ဆန္ဒပြတောင်းဆို

၂၀၀၈ ဖွဲ့စည်းပုံ အခြေခံဥပဒေကို ပြင်ဆင်ပေးဖို့ မကွေးတိုင်းဒေသကြီး ပခုက္ကူမြို့မှာ ဒေသခံ တစ်ထောင်နီးပါးလောက် ဒီနေ့ ဆန္ဒပြတောင်းဆိုခဲ့ကြပါတယ်။

ပုဒ်မ ၄၃၆ နဲ့ နိုင်ငံတော်သမ္မတ အရည်အချင်း သတ်မှတ်ချက် ပုဒ်မ ၅၉(စ)တို့ကို ပြင်ဆင်ပေးဖို့ တောင်းဆိုခဲ့တာဖြစ်တယ်လို့ ပခုက္ကူမြို့နယ် အမျိုးသား ဒီမိုကရေစီအဖွဲ့ချုပ် အတွင်းရေးမှူး ဒေါ်ဌေးလှိုင်က ပြောပါတယ်။

"ပြည်သူတွေက ၄၃၆ ပုဒ်မကို ပြင်ဆင်စေချင်တယ်လေ၊ ၅၉(စ)၊ ၅၉(ဃ)ကို ပြင်ဆင်စေချင်တယ်၊ ဒါပေမဲ့ ပြည်သူရွေးချယ်တင်မြှောက်ထားတဲ့ လွှတ်တော်ကိုယ်စားလှယ်တွေ မဟုတ်တဲ့ တပ်မတော် လွှတ်တော် ကိုယ်စားလှယ်တွေကလည်း ၄၃၆ နဲ့ ၅၉(စ)၊ ၅၉(ဃ) တွေကို မပြင်စေချင်ပါဘူးလို့ လွှတ်တော်ထဲမှာပြောလို့ကျတော့ လွှတ်တော်ဥက္ကဌကြီး ဦးရွှေမန်းက ပြောထားတယ်လေ၊ ပြည်သူ့အသံ လွှတ်တော်အသံ လို့ပြောပြီးတော့ ပြည်သူရဲ့အသံတွေကို ဂရုမစိုက်ပဲနဲ့ သူတို့ဘာသာသူတို့ လွှတ်တော်ထဲမှာ ဆွေးနွေးချင်တာတွေကို ဆွေးနွေးနေတဲ့ လွှတ်တော် ကိုယ်စားလှယ်တွေတချို့ ရှိနေတဲ့အတွက်ကြောင့်မို့ ကျမတို့က ပြည်သူရဲ့အသံကို ထပ်တင်တဲ့အနေနဲ့ ဆန္ဒထုတ်ဖော်တာကို လုပ်တာပါ"

ဆန္ဒပြပွဲမှာ ပခုက္ကူမြို့နယ် အမျိုးသား ဒီမိုကရေစီအဖွဲ့ချုပ် ပါတီဝင်တွေနဲ့ ဒေသခံတွေ ပါဝင်ခဲ့ကြပြီး ဒေါ်အောင်ဆန်းစုကြည် တောင်းဆိုနေတဲ့ လေးပွင့်ဆိုင်တွေ့ဆုံပွဲဖြစ်မြောက်ဖို့၊ တရားဥပဒေစိုးမိုးမှုရှိဖို့နဲ့ ပြည်တွင်းငြိမ်းချမ်းရေးရရှိဖို့တို့ကိုလည်း တောင်းဆိုခဲ့ကြပါတယ်။

RFA Burmese
https://www.facebook.com/pages/RFA-Burmese/39218993127