ဆောက်လုပ်ရေးလုပ်ငန်းခွင်တွင် လူငယ်(၂)ဦးပေါ်သို့ မြေကြီး သိုလှောင်ကန် ပြိုကျပိမိ

ရန်ကုန်၊ နိုဝင်ဘာ ၂၀

၂၀.၁၁.၂၀၁၄ ရက်နေ့ ၁၆၅၀ အချိန်တွင် ပန်းဘဲတန်းမြို့နယ်၊ ဗိုလ်ချုပ်အောင်ဆန်းလမ်း၊ ရွှေတိဂုံ ဘုရားလမ်းနှင့်(၂၇)လမ်းကြားရှိ ဆောက်လုပ်ရေး လုပ်ငန်းခွင်တွင် လူငယ်(၂)ဦးမြေပိမိမှု ဖြစ်ပွားခဲ့ကြောင်း သိရှိရပါသည်။

ဖြစ်စဉ်မှာ အဆိုပါ ဆောက်လုပ်ရေး လုပ်ငန်းခွင်တွင် မြေကြီးများ သိုလှောင်ရာ၌ အသုံးပြုသည့် ပေ(၄၀)ပတ်လည်၊အမြင့်ပေ(၂၀)ခန့်ရှိ သံဖြင့် ပြုလုပ်ထားသော ကန်၏ (၂၇)လမ်းဘက်အခြမ်းရှိ သံကိုယ်ထည်မှာ ရွံမြေကြီးများ၏ အလေးချိန်ကြောင့် ပြိုကျသွားခဲ့ကြောင်း၊ ထိုသို့ပြိုကျခဲ့သဖြင့် အနီးတွင်ရှိနေသည့် မြေသယ်ယာဉ် ယာဉ်နောက်လိုက် ဖြစ်သော ကိုသူ (ခ)သူရိန်လှိုင်ဝင်းနှင့် ကိုပြည့်ဖြိုးအောင်တို့ (၂)ဦး အပေါ်သို့ မြေကြီးများ ပိသွားခဲ့ကြောင်း သိရှိရပါသည်။

ထိုသို့မြေပိမိသူ (၂)ဦးအား မီးသတ်ဦးစီးဌာနမှ ကယ်ဆယ်ရေး ဆောင်ရွက်ခဲ့ရာ ၁၇၀၀ အချိန်တွင် ကိုသူ(ခ)သူရိန်လှိုင်ဝင်းအား ကယ်ထုတ်နိုင်ခဲ့ကြောင်း၊ ၁၇၃၀ အချိန်တွင် ကိုပြည့်ဖြိုးအောင်အား ကယ်ထုတ်နိုင်ခဲ့ပြီး ရန်ကုန်ဆေးရုံကြီးတွင် ဆေးကုသမှု ခံယူလျက်ရှိကြောင်း သတင်းရရှိပါသည်။

Yangon Police
https://www.facebook.com/yangonpolice