ညွန့်ပေါင်းအစိုးရအသံလွှင့်ဌာနမှ ပုဂ္ဂလိကပုိုင် စီးပွါးဖြစ် သတင်းဌာနအဖြစ်သုို့

ညွန့်ပေါင်းအစိုးရအသံလွှင့်ဌာနမှ ပုဂ္ဂလိကပုိုင် စီးပွါးဖြစ် သတင်းဌာနအဖြစ်သုို့ 

DVB (ဒီမုိုကရက်တစ်မြန်မာ့အသံ-မူလ) သတင်းဌာနဟာ ဒီမုိုကရေစီလှုပ်ရှားသူတွေကုိုယ်စား ပေါ်လာတဲ့ အတုိုက်အခံ သတင်းဌာနလား။ လွတ်လပ်တဲ့ ပုဂ္ဂလိကပုိုင် စီးပွါးဖြစ်သတင်းဌာနလား။ DVB ကုိုဘယ်သူပုိုင်သလဲ ဆုိုတဲ့မေးခွန်း တွေ အခုမှအကြီးအကျယ် ထွက်လာပေမဲ့ တကယ်တော့ ဒီဇတ်လမ်းဟာ လွန်ခဲ့တဲ့ ၁၀ နှစ်ခန့် ကတည်းက စတင် ခဲ့တာလုို့ပြောရမယ်ထင်ပါတယ်။

(၂၀၁၃ ခုနှစ် ဖေဖေါ်ဝါရီလ ၂၈ ရက်နေ့မှာ နော်ဝေးရောက် သမ္မတဦးသိန်းစိန်နဲ့ အင်တာဗျုးလွှင့်ပြီးတဲ့နောက် DVB-မူလ စတူဒီယုိုကုို ပိတ်တော့မယ်လို့ နော်ဝေး မီဒီယာဆီ ပြောကြားနေစဉ်)

ကျနော်မှတ်မိသလောက်ဆုိုရင် ၂၀၀၃ ခုနှစ် ဒီပဲယင်းအရေးခင်းဝန်းကျင်ကတည်းက ‘’အမျိုးသားညွန့်ပေါင်းအစိုးရ အသံလွှင့်ဌာန၊ ဒီမုိုကရက်တစ်မြန်မာ့အသံက စတင်အလွှင့်နေပါပြီခင်ဗျား’’ ဆုိုတဲ့ အသံလွှင့်မှုအစ မိတ်ဆက်စကား လုံးထဲက ‘’အမျိုး သားညွန့်ပေါင်းအစိုးရ အသံလွှင့်ဌာန’’ ဆုိုတာကုိုဖြုတ်ထားခဲ့ဖုို့ ကျနော်တုို့ စတင်ကြိုးစားခဲ့ပါ တယ်။ ကျနော်တုို့ဆုိုတာ သတင်းခန်းကလူတွေကိုပြောတာပါ။ 

အထူးသဖြင့် ကျနော်ကုိုယ်တုိုင် (အဲဒီတုန်းက TV မပေါ်သေးပါ။ ၂၀၀၅ နှောင်းပုိုင်းမှ TV ပေါ်လာပါတယ်) ရေဒီယုို ပရီစန်တာလုပ်တဲ့နေ့ တွေမှာ ‘’အမျိုးသားညွန့်ပေါင်း အစိုးအသံလွှင့်ဌာန’’ ဆုိုတာကုို တမင်ထည့်မဖတ်ပဲ ချန်ထား ခဲ့ပြီး  ‘’ဒီမုိုကရက်တစ်မြန်မာ့အသံက စတင်အသံလွှင့်နေပါပြီခင်ဗျား’’ လောက်ကုိုသာ ဖတ်တာမျိုး လုပ်ခဲ့ မိပါတယ်။

ဒါပေမယ့် အရုိုးသားဆုံးဝန်ခံချင်တာတခုကတော့ အမျိုးသားညွန့်ပေါင်းအစိုးရ အသံလွှင့်ဌာန ဆိုတာကုို လေလှိုင်းထဲမှာ ထည့် မဖတ်ဘဲ ချန်ထားဖုို့ ကျနော်တုို့ကြိုးစားခဲ့ပေမဲ့ လက်တွေ့မှာတော့ အတုိုက်ခံကုိုယ်စားပြု၊ ဒီမုိုကရေစီလှုပ်ရှားသူများကုိုယ်စားပြုအဖြစ် တကယ်လုပ်ခဲ့တယ်ဆုိုတာပါ။ ၁၉၉၂ ဇူလုိုင်လ ၁၉  ရက်နေ့ကနေ ၂၀၁၂ ကြားဖြတ်ရွေး ကောက်ပွဲကာလအထိ၊ တနည်းအားဖြင့် မူလ DVB (ဒီမုိုကရက်တစ်မြန်မာ့အသံ-မူလ) ကနေ လက်ရှိ အသွင်ပြောင်း DVB (DVB Multimedia Group) မဖြစ်ခင်အထိ နှစ် ၂၀ ကာလ အသံလွှင့်ခဲ့သမျှ သတင်းတွေ၊ အပတ်စဉ် ကဏ္ဍတွေကုို ပြန်ဆန်းစစ်လေ့လာနိုင်ပါတယ်။

ဒါဖြင့် ဘာကြောင့် ‘’အမျိုးသားညွန့်ပေါင်းအစိုးရအသံလွှင့်ဌာန’’ ဆုိုတာကို ဖြုတ်ထားခဲ့ချင်တာလဲလုို့ မေးစရာရှိလာ ပါ တယ်။ ကျန်တဲ့လူတွေ၊ အထူးသဖြင့် အုပ်ချုပ်ရေးပုိုင်းတာဝန်ရှိသူတွေနဲ့ နုိုင်ငံရေးသမားတွေမှာ ဘယ်လုိုအမြင်၊ ဘယ်လုိုအကြံစည်ရှိ မှန်းကျနော်မသိပေမဲ့ ကျနော်တုို့သတင်းခန်းကလူတွေကြားမှာတော့ နုိုင်ငံရေးရည်ရွယ်ချက် ဘာမှမရှိပါ။ 

DVB နားထောင်လို့ အဖမ်းခံ ရတာတွေ၊ DVB ကုိုအင်တာဗျုးပေးလုို့ အဖမ်းခံရတာတွေရှိနေတယ်။ စစ်အစိုးရ ဖက်ကလည်း ညွန့်ပေါင်းအစိုးရအသံလွှင့်ဌာနဆုိုတာကိုကုိုင်ပြီး ပုဒ်မ ၁၇-၁ တရားမ၀င်အသင်းအဖွဲများ နဲ့ဆက်သွယ်မှုနဲ့ စွဲချက်တင်ဖုို့လွယ်ကူစေတယ်။ ဒါကြောင့် ဒီခေါင်းစဉ်ကြီးကိုဖြုတ်ထားရင် ပရိတ်သတ်အတွက် ပုိုကောင်းမယ်ဆုိုပြီး သတင်းသမားအမြင်သက်သက်နဲ့စဉ်စားခဲ့တာပါ။

ဒီထက်ပုိုမုိုပွင့်လင်းစွာဝန်ခံရမယ်ဆုိုရင်တော့ လွတ်လပ်တဲ့သတင်းသမားအဖြစ်ရပ်တည်ချင်တာလည်း အဓိက နေရာကပါ ပါတယ်။ အရင် DVB အယ်ဒီတာဟောင်း ၀ါရင့်အသံလွှင့်သတင်းသမား ဒေါက်တာအောင်ခင် ပြော ဖူးတာကုို မှတ်မိသလောက်ပြန်ကိုးကားရမယ်ဆုိုရင်… ‘’BBC လဲ ဗြိတိန်အစုိုးရက ပုိုင်တာပဲကွာ။ VOA ကုိုလဲ အမေရိကန်အစိုးရကပုိုင်တာပဲ။ RFA လဲ ဘာထူးလဲ။ အမေရိကန်အစိုးရကပုိုင်တာပဲ။ ဒါပေမယ့် ဘယ် ရေဒီယုိုကမှ အစိုးရကပုိုင်ပါတယ်ဆုိုပြီး ထည့်ကြေငြာလေ့မရှိပါဘူး။ DVB ကျမှ ထူးထူးခြားခြား ဘာလုို့ အဲဒါ ကြီးကုို ထည့်ပြော နေ တာလဲ။ အယ်ဒီတုိုရီရယ် လွတ်လပ်မှုကုို ထိခုိုက်နုိုင်တာပေါ့’’ တဲ့။ 

ဆိုလုိုတာက ကျနော်တုို့သတင်းသမားတွေဖက်က စဉ်းစားတာဟာ ဒီအချက်ထက်မပုိုပါဘူး။ နုိုင်ငံရေးပယောက ဘာမှ မပါ ပါဘူး။ ဒါပေမယ့် သတင်းသမားတွေရဲ့စဉ်းစားချက်က ညွန်မှုးတွေ၊ နုိုင်ငံရေးရည်ရွယ်ချက်ရှိသူတွေရဲ့ စဉ်းစားချက်ကို ဘယ်မှီပါ့မလဲ။ ဝေဖန်သူတွေရဲ့ ထောက်ပြမှုတွေအရဆုိုရင် ကျနော်တုို့သတင်းသမားတွေရဲ့ ‘’လွတ်လပ်တဲ့သတင်းသမား’’ ဖြစ်ချင်လွန်းတဲ့ အဲဒီလုိုစဉ်းစားချက်အပေါ် နုိုင်ငံရေးသမားတွေက အခွင့်ကောင်းယူပြီး တချိန်ချိ်န်မှာ DVB ကုို ပုဂ္ဂလိကပုိုင်၊ ကုိုယ်ပုိုင် သတင်းဌာနအဖြစ် အသွင်ပြောင်းနုိုင်ဖုို့အထိ အဲဒီကတည်းက စဉ်စားထားပုံရတယ်လုို့ ခန့်မှန်းရပါတယ်။

အထ မမြောက်လုိုက်တဲ့ နော်ဝေးမှ အုိုင်ယာလန် ပြောင်းရေးအစီစဉ်

ရှေ့ပုိုင်းမှာ (ခုနှစ်၊ သက္ကရာဇ်အလုိုက်) တင်ပြဖုို့ ကျန်ခဲ့တဲ့အရေးကြီးအချက်တွေထဲမှာ DVB (ဒီမုိုကရက်တစ်မြန်မာ့ အသံ-မူလ) ကုို နော်ဝေးနုိုင်ငံ အော်စလိုမြို့ကနေ အုိုင်ယာလန်နုိုင်ငံ ဒါဗလင်မြို့သုို့ပြောင်းရေးအစီစဉ်တခုလည်း ပါဝင်ပါတယ်။ 

( ၂၀၀၃-၂၀၀၄ ကာလတွေက အုိုင်ယာလန်နုိုင်ငံ ဒါဗလင်မြို့မှာတွေ့ရတဲ့ ၀န်ကြီးချုပ်ဒေါက်တာစိန်ဝင်း၊ ကုလသမဂ္ဂဆုိုင်ရာ ကိုယ်စားလှယ်ဒေါက်တာသောင်းထွန်းနဲ့ ဗြိတိန်မှ ဒေါက်တာသိန်းလွင်တုို့ကိုတွေ့ရစဉ်)

ကျနော်မှတ်မိသလောက်ဆုိုရင် TV အစီစဉ်မစခင် ၂၀၀၄ ခုနှစ်ထဲမှာ အဲဒီစဉ်းစားချက်စတင်ပေါ်ခဲ့တာလုို့ထင်ပါ တယ်။ အဓိကအခြေခံစဉ်းစားတာကတော့ ရှေ့ပုိုင်းမှာတင်ပြခဲ့တဲ့အတုိုင်း DVB ၀န်ထမ်းတွေရဲ့ လူဝင်မှုကြီးကြပ်ရေး အဆင့်တန်း၊ နုိုင်ငံကူးလက်မှတ်၊ ခရီးသွားလာခွင့်တွေနဲ့ ဆက်စပ်နေပါတယ်။ ကျနော်တုို့ရဲ့ မြန်မာစာအုပ်အတု သက်တန်းကုန်လုို့ အော်စလုိုရဲစခန်းဆီ ပြန်အပ်ပြီးနောက် နော်ဝေး-ယာယီခရီးသွားခွင့်လက်မှတ်တွေ ထုတ်ပေးခဲ့ပါတယ်။ ဒါပေမယ့် အဲဒီလက်မှတ်က ဗီဇာ မပါပဲ ဘယ်မှသွားလုို့မရပါ။

ပုိုဆုိုးတာက စာအုပ်သက်တန်းကို တနှစ်ပဲပေးထားပြီး အနည်းဆုံး ၆ လသက်တန်းကျန်နေမှ ပြည်ပနုိုင်ငံတွေဆီ ခရီးသွားခွင့်ရှိပါတယ်။ စာအုပ်အသစ်ပြန်လဲလုို့ စောင့်ရတဲ့အချိန်ကုိုပါ ထည့်တွက်လုိုက်ရင် ခရီးသွားနုိုင်တဲ့ကာလက တနှစ်မှာ ၄ လလောက်ပဲကျန်ပါတယ်။ ကိစ္စရှိတဲ့အချိန် ခရီးထသွားလုို့မရပါ။ မြန်မာစာအုပ်ကုိုအပ်ပြီး ဒီစာအုပ်တွေကို စယူစဉ်ကတော့ ဒီစာအုပ်အသစ်နဲ့ဆုို ကမ္ဘာတလွှား ခရီးသွားလုို့အဆင်ပြေပြီလုို့ ထင်ထားခဲ့တာပါ။ ဘာကြောင့်လဲဆုိုရင် သတင်းထောက်ဆုိုတာ တချိန်လုံး ခရီးသွားနေရတဲ့ အမျိုးမဟုတ်ပါလား။ 

အခုတော့ အဲဒီလုိုမဟုတ်။ ခရီးတခါသွားမယ်ဆုိုရင် စာအုပ်သက်တန်းလွန်နေတာ၊ ဗီဇာ လျောက်ရတာ။ တချို့နုိုင်ငံတွေက နုိုင်ငံသားအဆင့်မဟုတ်သေးတဲ့ ခရီးသွားလက်မှတ်ကုို ဗီဇာ မပေးတာတွေရှိ တော့ ဒီထက်အဆင့်မြင့်တဲ့ စာအုပ်ကုိုထုတ်ပေးဖုို့ နော်ဝေးနုိုင်ငံခြားရေးဝန်ကြီးဌာနနဲ့ လ၀က တွေဆီတင်ပြခဲ့ပါ တယ်။

ဒါပေမယ့် မရပါဘူး။ နုိုင်ငံခြားရေးဌာနက ခွင့်ပြုချင်ရင်တောင် လ၀က အပါဝင် ဗျုရုိုကရေစီယားက ဒါမျိုးကို ခွင့်မပြု ပါဘူး။ ဘယ်လုိုမှညှိမရတဲ့အဆုံး နော်ဝေးအစိုးရနဲ့တော့ အလုပ်မဖြစ်တော့ဘူး။ လ၀က ကိစ္စအပါဝင် အားလုံး ကို အဆင်ပြေအောင်လုပ်ပေးမယ်လို့ယူဆရတဲ့ အုိုင်ယာလန်နုိုင်ငံဆီပြောင်းမှဖြစ်မယ်လို့ ဘုတ်အဖွဲ့ကပါ ဆုံးဖြတ်ခဲ့ တာပါ။

၂၀၀၃-၂၀၀၄ ၀န်းကျင်ကာလတွေမှာ အုိုင်ယာလန်က မြန်မာ့ဒီမုိုကရေစီအရေးလှုပ်ရှားမှုကုို အလွန်အလေးထား ထောက်ခံခဲ့ပြီး ညွန့်ပေါင်းအစိုးရ NCGUB အဖွဲ့အစည်းဝေးတွေ၊ ပြည်ပရောက် လွှတ်တော်အမတ်တွေရဲ့ MPU အစည်းဝေးတွေကို မြို့တော်ဒါဗလင်မှာ လက်ခံကျင်းပပေးနေတဲ့ကာလလဲဖြစ်ပါတယ်။ တခါ အုိုင်ယာလန်က နာ မည်ကြီး အနုပညာသမားတွေဖြစ်တဲ့ U2 တေးဂီတအဖွဲ့မှ အဆုိုတော် Bono နဲ့ တခြားအဆုိုတော်တဦးဖြစ်သူ Damien Rice တို့ကလဲ မြန်မာ့ဒီမုိုကရေစီအရေးလှုပ်ရှားမှုခေါင်းဆောင် ဒေါ်အောင်ဆန်းစုကြည်ကုို ကမ္ဘာကျော် သီချင်းတွေနဲ့ ဂုဏ်ပြုကြိုဆိုနေချိန်လဲဖြစ်ပါတယ်။ 

…(U2-Bono ရဲ့ Walk On )နဲ့ (Damien Rice ရဲ့ Unplayed Piano) တွေကို ကြည့်ပါရန်)…။ 

ဒီအတွက် ပထမ အဆုိုတင်သွင်းသူက သတင်းအယ်ဒီတာ ကိုမုိုးအေး ဖြစ်ပါတယ်။ ဒါပေမယ့် ညွန်ချုပ် ကုိုအေးချမ်းနုိုင်ကတော့ သိပ်စိတ်ဝင်စားပုံ မပြပါဘူး။ နောက်ပုိုင်းမှာတော့ ဒုညွန်မှုး ကုိုခင်မောင်ဝင်းကုိုယ်တုိုင် ၂-၃ ခေါက်လောက် အုိုင်ယာလန်အစိုးရပုိုင်းနဲ့သွားဆွေးနွေးခဲ့ပါတယ်။ အဲဒီနောက် DVB ကုို အော်စလုိုကနေ ဒါဗလင်ကိုပြောင်းတော့မယ်လို့ ကမ္ဘာ့မီဒီယာတွေဆီ တရားဝင်ကြေငြာလုိုက်ပါတယ်။ အဲဒီလုို ကြေငြာလုိုက် ချိန်ကျမှ နော်ဝေးနုိုင်ငံခြားရေးဌာနက ထိပ်ထိပ်ပြာပြာဖြစ်သွားပြီး DVB ညွန်မှုးတွေကုို ခေါ်တွေ့ ပါတယ်။

အဲဒီနောက်ပုိုင်း အုိုင်ယာလန်ပြောင်းရေးအစီစဉ်လဲ အဖျားရှုးသွားပါတယ်။ အဓိကပြောင်းဖုို့တွန်းအားဖြစ်စေခဲ့တဲ့ ကျနော်တုို့ရဲ့ခရီးသွားလာခွင့်စာအုပ်တွေကိုတော့ တနှစ်ကနေ ၂ နှစ်အထိတုိုးပေးလုိုက်တဲ့အတွက် နည်းနည်းလေး တော့ ခရီးသွားရေးပုိုအဆင်ပြေလာတယ်ပြောရမလားပါပဲ။ ။

ထက်အောင်ကျော် 

http://www.htetaungkyaw.net/2014/11/blog-post_14.html