၂၀၀၈ အခြေခံဥပဒေ ပြင်ဆင်ရေး ဥပဒေကြမ်း လွှတ်တော်မှာတင်သွင်း

၂၀၀၈ ဖွဲ့စည်းပုံ အခြေခံဥပဒေ ပြင်ဆင်တဲ့ ဥပဒေမူကြမ်းကို အတည်ပြုရေး အတွက် ပြည်လုံးကျွတ်ဆန္ဒ ခံယူပွဲ ကျင်းပ သွားမှာဖြစ်ပြီး အဲဒီ့အတွက် ဥပဒေကြမ်းကို ပြည်သူ့ လွှတ်တော်မှာ ဒီကနေ့ တင်သွင်း ခဲ့ပါတယ်။

ဒီဥပဒေကြမ်းကို တင်သွင်းခဲ့တဲ့ ပြည်သူ့ လွှတ်တော် ဥပဒေကြမ်းကော်မတီ အတွင်းရေးမှူး ဦးစောလှထွန်းက ပြည်သူ့ လွှတ်တော်မှာ အခုလို ထည့်သွင်း တင်ပြခဲ့ပါတယ်။

"ဒီနေ့ ပြည်သူတွေရဲ့ဆန္ဒ၊ ပြည်သူတွေရဲ့ လိုအပ်ချက်နဲ့အညီ ဖွဲ့စည်းပုံအခြေခံဥပဒေ ပြင်ဆင်ရေး ဆွေးနွေးမှုရလာဒ်များကို ဆက်လက်အကောင်ထည်နိုင်ဖို့ ဥပဒေတစ်ရပ် လိုအပ်ချက်အရ ရေးဆွဲကြခြင်းဖြစ်ပါတယ်၊ ဒီဥပဒေမှာ အခန်း ၁၂ ခန်း ပုဒ်မပေါင်း ၃ဝ ပါရှိပါတယ်၊ ယခုကဲ့သို့ ဥပဒေပြဌာန်းဆောင်ရွက်ထားရှိခြင်းဖြင့် ပြည်ထောင်စုလွှတ်တော်က ဆုံးဖြတ်ခဲ့သည်များကို ပြည်လုံးကျွတ်ဆန္ဒခံယူပွဲကျင်းပပြီး ဥပဒေနဲ့အညီ ဆောင်ရွက်နိုင်မှာဖြစ်ပါတယ်၊ ပြည်လုံးကျွတ်ဆန္ဒခံယူပွဲရလာဒ်တွေကို လာမယ့်ရွေးကောက်ပွဲ သက်တမ်းတစ်လျှောက် ပြုပြင်ပြောင်းလဲ ကျင့်သုံးသွားရမှာဖြစ်ပါတယ်"

ဖွဲ့စည်းပုံပြင်ဆင်ရေး အကောင်အထည်ဖော်မှုကော်မတီရဲ့ အစီရင်ခံစာကို ပြည်ထောင်စု လွှတ်တော်မှာ ဆွေးနွေးနေတာ ဒီနေ့ဆို ငါးရက်မြောက်ဖြစ်ပြီး လာမယ့်၂၅ ရက်နေ့မှာ အပြီးဆွေးနွေးသွားမှာဖြစ်ကြောင်းနဲ့ ပြည်လုံးကျွတ်ဆန္ဒခံယူပွဲကို လာမယ့် ၂၀၁၅ မေလထဲမှာ ကျင်းပသွားမှာဖြစ်ကြောင်း သိရပါတယ်။

RFA Burmese
https://www.facebook.com/pages/RFA-Burmese/39218993127