စဥ့်ကူးမှာ ပိတ်မိနေတဲ့ ရွှေလုပ်သား ၁၀၀ ကျော် လွတ်မြောက်

 ဇူလိုင်လ၂၈ရက်နေ့က မန္တလေးတိုင်း ဒေသကြီး စဥ့်ကူးမြို့နယ် ကံတောင်ကျေးရွာက ရွှေလုပ်သားများ ရွှေတွင်း တူးဖော်ရေး လုပ်ငန်းကို ပြင်ဦးလွင်ခရိုင် ရဲတပ်ဖွဲ့ဝင်တွေက တရားမ၀င် လုပ်ငန်းဆိုပြီး ၀င်ရောက် ဖမ်းဆီးတဲ့ အတွက် ရွှေတွင်းထဲ ပိတ်မိနေတဲ့ လုပ်သား တစ်ရာကျော်ဟာ ဇူလိုင်လ ၃၁ရက်နေ့က တွင်းထဲ ကနေ ထွက်ခွင့် ရခဲ့ကြပါတယ်။

ပြန်ထွက်ခွင့်ရလာတာနဲ့ ပတ်သက်ပြီး ပိတ်မိခံရတဲ့ အထဲ ပါဝင်တဲ့ ရွှေတွင်းလုပ်သား ကိုညိုဝင်းက အခုလိုပြောပါတယ်။

"၂၉ ရက်နေ့က ဖမ်းတယ်လို့ကြားတော့ တွင်းထဲကနေ အပေါ်ကို မတက်ရဲတာပေါ့၊ တကယ်တော့ သူတို့က မဖမ်းဘူး လို့တော့ ပြောပါတယ်၊ အောက်ထဲကို ဆင်းပြီး ခေါ်ခိုင်းတယ်၊ အကုန်လုံး ၃၁ ရက်နေ့ မနက်တက်လာတယ်"

အဲဒီရွှေအင်းကို မခိုင်ဆိုသူက ပိုင်ဆိုင်ပြီး ပြီးခဲ့တဲ့ ၅ နှစ်လောက်ကတည်းက သတ္တုတွင်းဝန်ကြီးဌာနရဲ့ တရားဝင်ခွင့်ပြုချက်မရဘဲ လုပ်ကိုင်ခဲ့တာဖြစ်ကြောင်း၊ လက်ရှိမှာအဲဒီပိုင်ရှင်ကို သတ္တုတွင်းဝန်ကြီးဌာနက တရားမ၀င် သတ္တု တူးဖော်မှုဥပဒေ ၃၀ (ခ) အရ အမှုဖွင့်ထားတာကြောင့် တွင်းပိုင်ရှင် ထွက်ပြေးတိမ်းရှောင်နေကြောင်း သိရပါတယ်။

ပိတ်မိနေတဲ့အင်းက လွတ်မြောက်လာကြတဲ့ လုပ်သားတွေကိုတော့ ပြင်ဦးလွင်ခရိုင် ရဲတပ်ဖွဲ့က အရေးမယူဘူးလို့ သိရပါတယ်။

RFA Burmese
https://www.facebook.com/pages/RFA-Burmese/39218993127