ဝန်ကြီးဟောင်း ဦးဆန်းဆင့်အမှု ဒုဝန်ကြီးကို တရားရုံးစစ်ဆေး

 သာသနာရေး ၀န်ကြီးဟောင်း ဦးဆန်းဆင့်ကို နေပြည်တော် ဒက္ခိဏသီရိခရိုင် တရားရုံးမှာ ၆ကြိမ် မြောက်အဖြစ် ဒီနေ့ ရုံးထုတ်စစ်ဆေး ခဲ့ပါတယ်။

ဒီကနေ့ တရားရုံးမှာ သာသနာရေးဝန်ကြီးဌာန ဒုတိယ၀န်ကြီး ဦးမောင်မောင်ဌေးကို စစ်ဆေးခဲ့တယ်လို့ ဦးဆန်းဆင့်ရဲ့ရှေ့နေ ဦးတင်ထွန်းက ပြောပါတယ်။

"ပြစ်မှုကြီးအမှတ် ၄၁/၁၄၊ ၁၄ က ၄ဝ၉ အဲ့ဒီအမှုက ပြီးခဲ့တဲ့ရုံးချိန်းက စုံစမ်းစစ်ဆေးရေးမှူး ဦးညိုဝင်းကိုပဲ ဆက်စစ်လိုက်တယ်ပြီးသွားပြီ၊ ပြီးသွားတော့ ၁၂၄ (က)ပြစ်မှုကြီးအမှတ် ၄၂/၁၄ အဲဒီ့အမှုက ဒုတိယ၀န်ကြီး ဦးမောင်မောင်ဌေးလာတယ်၊ ဒီနေ့စစ်ဆေးမှုတွေပြီးသွားပြီပေါ့၊ နောက်ရုံးချိန်းက ၁၂ ရက်နေ့နဲ့ ၁၅ ရက်နေ့ပါ၊ ရမည်းသင်းအကျဉ်းထောင်က ကုသပေးတယ်လို့ဆိုတယ်၊ တရားသူကြီးက သူ့စီရင်ချက်ထဲမှာ ကြီးကြပ်ပြီးတော့ ကုသပေးတယ်လို့ ကြားသိရတယ်၊ "

ဦးဆန်းဆင့်ကို ရမည်းသင်းအကျဉ်းထောင်မှာ ဖမ်းဆီးထိန်းသိမ်းထားပြီး သူဟာ နှလုံးရောဂါ၊ ကျီးပေါင်းရောဂါနဲ့ မျက်စိဝေဒနာ ခံစားနေရတဲ့အတွက် ပြီးခဲ့တဲ့ဇူလိုင်လ ၃၀ ရက်နေ့ ရုံးချိန်းတုန်းက တရားရုံးမှာ ကျန်းမာရေးအာမခံ လျှောက်ထားခဲ့ပေမဲ့ ငြင်းပယ်ခံခဲ့ရပါတယ်။

ဝန်ကြီးဟောင်း ဦးဆန်းဆင့်ကို ဖမ်းဆီးစဉ်က ပြစ်မှုပုဒ်မ ၄၀၉ ပြည်သူပိုင်ပစ္စည်း အလွဲသုံးစားမှု၊ ပုဒ်မ ၁၀၉ လှုံ့ဆော်ခြင်းကြောင့်ဖြစ်စေ ပူးပေါင်းကြံစည်ခြင်းကြောင့်ဖြစ်စေ အားပေးကူညီမှုတို့နဲ့ အထူးစုံစမ်းစစ်ဆေးရေး ဦးစီးဌာန(စစစ) က တရားစွဲခဲ့တာဖြစ်ပါတယ်။

ပြီးခဲ့တဲ့ဇူလိုင်လ ၂၂ရက်နေ့က ပုဒ်မ ၁၀၉ ကို ရုပ်သိမ်းလိုက်ပြီး ပုဒ်မ ၁၂၄ နိုင်ငံတော် အကြည်ညိုပျက်အောင်လုပ်ဆောင်မှုဆိုပြီး တရားစွဲလိုက်တာဖြစ်ပါတယ်။

ဦးဆန်းဆင့်ကို လာမယ့် သြဂုတ်လ ၁၂ ရက်နေ့မှာ ထပ်မံရုံးထုတ်စစ်ဆေးသွားမယ်လို့ သိရပါတယ်။

RFA Burmese
https://www.facebook.com/pages/RFA-Burmese/39218993127?fref=nf