သားသမီး ပညာရေးနှင့် ပတ်သက်၍ လာရောက် မေးမြန်း ဆွေးနွေးသူ မိဘတစ်ဦးကို ခြိမ်းခြောက်စကားနှင့် စိန်ခေါ်မှုများ ပြုခဲ့ (ပေးစာ)

 ကျောက်မဲ ဩဂုတ် ၆

ကျောက်မဲမြို့ပေါ်ရှိ အထက်တန်း ကျောင်းကြီး တစ်ကျောင်းမှ ကျောင်းအုပ်ကြီးသည် ဩဂုတ် ၄ ရက်က သားသမီး ပညာရေးနှင့် ပတ်သက်၍ လာရောက် မေးမြန်း ဆွေးနွေးသူ မိဘတစ်ဦးကို ခြိမ်းခြောက်စကားနှင့် စိန်ခေါ်မှုများ ပြုခဲ့ကြောင်း သိရသည်။

ယင်းဖြစ်စဉ်နှင့်ပတ်သက်၍
"ကျွန်မသမီးရဲ့အရည်အချင်းကို သိချင်လို့ ရိုးသားစိတ်နဲ့ သွားမေးခဲ့တာ ... ကလေးရဲ့ကြိုးစားမှု ရလဒ်ပြောင်းသွားတာကို သိချင်ရုံ သက်သက်ပါ။ မှားတယ် မှန်တယ် မပုတ်ခတ် မစွပ်စွဲရပဲနဲ့ ကလေးရဲ့ အဖြေလွှာကို ကြည့်ချင်လား .. ကြည့်ချင်ရင် ခရိုင်နဲ့မြို့နယ် ပညာရေးမှူးရှေ့မှာ သူတို့ရဲ့ခွင့်ပြုချက်နဲ့ ကြည့်ရမယ်.. ဒီလိုကြည့်ခွင့်ရဖို့ မိခင်ရဲ့ဝန်ထမ်းအလုပ်နဲ့ လဲလှယ်ရမယ် .. စာချုပ်ရေးသား ချုပ်ဆိုရမယ်" လို့ပြောခဲ့တယ်.. ဒါကြောင့် ဒီစကားရဲ့အဓိပ္ပာယ်သေချာအောင် ဖုန်းထပ်ဆက်မေးတော့ အလုပ်နဲ့ လဲလှယ်ရမယ်ဆိုတာ သူပြုတ်ကိုယ်ပြုတ် ဆိုတဲ့အဓိပ္ပာယ်လို့ ထပ်မံဖြေကြားပြီး ခြိမ်းခြောက်စကား နဲ့အတူ စိန်ခေါ်ခဲ့ပါတယ်"ဟု မိခင်ဖြစ်သူ ဒေါ်တင်တင်လတ်ကပြောသည်။

ဆက်လက်ပြီး ဖခင်ဖြစ်သူက

" အမျိုးသမီးက ဝန်ထမ်းဖြစ်သော်လည်း ကျောင်းသားမိဘ တစ်ယောက် ပြည်သူတစ်ယောက်ပါ။ ကိုယ့်ကလေးရဲ့အရည်အချင်းကို သိချင်လို့မေးတာကို ဒီလိုခြိမ်းခြောက်စိန်ခေါ်တာဟာ ယဉ်ကျေးမှုမရှိတာပါပဲ နိုင်ငံတော်မှာ ပြောင်းလဲမှုတွေ လုပ်နေပေမယ့် အောက်ခြေက မပြောင်းနိုင်သေးတာကို တာဝန်ရှိသူတွေ သိစေချင်တယ်"ဟုဆိုသည်။

ပုဂ္ဂလိကကျောင်းတွင် အပ်နှံထားသူ မိဘတစ်ဦးကလည်း "အခုက ပညာရေးကို အားပေးတဲ့ခေတ် ဖြစ်နေပြီ။ သမ္မတကြီးကိုယ်တိုင် ထူးချွန်တဲ့လူငယ်တွေပိုပြီး ထွက်ပေါ်လာဖို့ ပညာသင်ဆုတွေခေါ်နေပြီ .. လူရည်ချွန်တွေမွေးထုတ်ပြီး မြေတောင်မြှောက် ချီးကျူး ဂုဏ်ပြုနေပြီ။ ပညာရေးပြုပြင်ပြောင်းလဲမှုတွေ လုပ်နေတဲ့အချိန်မှာ ပွင့်လင်းမြင်သာဖို့ လိုလာပါပြီ .. အခုဆို အစိုးရကျောင်းတွေက ပုဂ္ဂလိကကျောင်းတွေနဲ့ ယှဉ်ပြိုင်ရတော့မှာ ..ဒီလိုအချိန်မှာ မိဘတွေလာတာကို ကြိုဆိုလက်ခံရမှာပါ။ ခြိမ်းခြောက်တယ် စိန်ခေါ်တယ် ဆိုတာ လုံးဝမဖြစ်သင့်ပါဘူး .. ပုဂ္ဂလိကကျောင်းတွေမှာဆိုရင် ကလေးရဲ့လစဉ်စာမေးပွဲ အဖြေလွှာကို ကလေးနဲ့မိဘတွေကို ပြန်ကြည့်စေတယ် .. ဒီလိုကြည့်ရတဲ့အတွက် အမှားတွေ၊ အားနည်းချက်တွေကို ပြန်ပြင်ဆင်ခွင့်ရတယ်"လို့ဆိုသည်။

ယခုအခါနိုင်ငံတော်တွင် ပြုပြင်ပြောင်းလဲရေး လုပ်ငန်းများကို ပွင့်လင်းမြင်သာစွာ ဆောင်ရွက်နေချိန် တွင် စာသင်ကျောင်းအချို့တွင်လည်း မိဘပြည်သူများကို နွေးထွေးပျူငှာစွာ ဆက်ဆံပြီး ကျောင်းသား ကျောင်းသူများ၏ပညာရေးဆိုင်ရာ ကိစ္စများ ဆွေးနွေးတိုင်ပင်ခွင့်ကို လွတ်လပ်စွာ ခွင့်ပြုသင့်ကြောင်း ကျောင်းသားမိဘများက သုံးသပ်ပြောကြားသည်။

 လေးစားစွာဖြင့်
 မလတ်(ကျောက်မဲ)

BY THIT HTOO LWIN