ပြည်မြို့၌အဝေးပြေးကားကိုခဲဖြင့်ထုသူခုနစ်ဦးကိုလက်ရဖမ်းဆီးရမိ

 ပြည် ဇူလိုင် ၃၁

 ပြည်မြို့သို့ ဝင်ရောက်လာ သည့် ASIA အဝေးပြေးကားကို ခဲဖြင့်ထုကာထွက်ပြေးသည့် လူ ငယ်များကို ဖမ်းဆီးရမိကြောင်း သိရသည်။
ယမန်နေ့ည ၁ဝ နာရီခန့်တွင် ပြည်မြို့သို့ ဝင်ရောက်လာသည့် ASIA အဝေးပြေးကားကို လမ်း ဘေးထိုင်နေသည့်လူငယ်များက ခဲ ဖြင့်ထုသဖြင့် ကားမှန်ကွဲကြေသွားပြီး အဝေးပြေးကားယာဉ်မောင်းက ကားကိုပြန်ကွေ့ကာ ချက်ချင်း လိုက်လံဖမ်းဆီးရန် ကြိုးစား ခဲ့သဖြင့် ခဲဖြင့်ထုသူလူငယ်များ ထွက်ပြေးသွားရာ ဆိုင်ကယ် တစ်စီးကျန်ခဲ့သဖြင့် ယင်းဆိုင် ကယ်နှင့်ဆက်စပ်ကာ လိုက်လံဖမ်း ဆီးရာမှ ယင်းလူငယ်ခုနစ်ဦးကို ဖော်ထုတ်ဖမ်းဆီးနိုင်ခဲ့ကြောင်း ASIA ယာဉ်လိုင်း တာဝန်ရှိသူ တစ်ဦးက ပြောကြားသည်။

ခဲဖြင့်အပေါက်ခံရမှုကြောင့် ကားမှန်များကွဲကြေခဲ့ရပြီး ပျက်စီး ဆုံးရှုံးမှုတန်ဖိုးကို တွက်ချက်နေ ဆဲဖြစ်ကြောင်းသိရသည်။ ပြည်မြို့ ကုန်သည်လမ်း၊ ဈေးလမ်းနှင့် ဂျပန်လမ်းတို့ရှိ နေအိမ်များရှေ့တွင် ရပ်နားထားသော အိမ်စီးကားများ ကို ဆိုင်ကယ်စီးလူငယ်အုပ်စုက ခဲဖြင့်ပေါက်၊ တုတ်ဖြင့်ရိုက်မှု ကြောင့် ဇူလိုင် ၁၅ရက်က ကား တစ်စီး၊ ၁၆ ရက်ညက ကားလေး စီးတို့၏ ကားမှန်များကွဲခြင်း၊ ကားဘော်ဒီပိန်ခြင်းများကြုံခဲ့ရပြီး ယခုဖမ်းမိထားသော လူငယ်များ မှာ ယင်းကိစ္စနှင့်ဆက်စပ်မှုရှိမရှိ စုံစမ်းနေဆဲဖြစ်ကြောင်း သိရသည်။
ယင်းဖမ်းမိသော လူငယ်များ ကို ပြည်အမှတ်(၂)ရဲစခန်းတွင် အမှုဖွင့်အရေးယူလျက်ရှိကြောင်း သိရသည်။

မန္တလေးမြို့တွင်လည်း ၂ဝ၁၃ ခုနှစ် မတ်လတွင် ရမ်းကားလူငယ် များက ယခုကဲ့သို့ပင် မန္တလေးမြို့ အချက်အချာကျသော လမ်းမကြီး များဖြစ်သည့် ၃၅လမ်း၊ ၂၆(ဘီ) လမ်း၊ ၇၃လမ်းတို့တွင် ညအိပ် ရပ်နားထားသည့် ကားများကို တုတ်များဖြင့်ရိုက်ခွဲခြင်း၊ ကျောက် ခဲများ၊ အုတ်နီခဲများဖြင့် ရမ်းကား ဖျက်ဆီးမှုကြောင့် ကား၁ဝစီး ကျော် ဆုံးရှုံးမှုများ ကြုံတွေ့ခဲ့ရ သည်။

စိုးကြီး
The Union Daily
https://www.facebook.com/pages/The-Union-Daily/139677556201764?ref=br_tf