အမရပူရမြို့တွင် သမိုင်းဝင်ကြေးပိဿာချိန် တစ်သောင်းငါးထောင်ရှိ နှစ်ပေါင်း ၁၉ဝ ကျော် ခေါင်းလောင်းကြီးကိုလေ့လာနိုင်

 မန္တလေး သြဂုတ် ၂

 ခေတ်တိုင်းတွင် ယဉ်ကျေးမှုရှိနေပေသည်။ ခေတ်တိုင်းတွင် ပြုလုပ်ခဲ့သော အနုပညာလက်ရာများစွာသည် ထိုခေတ်၏ သမိုင်းပင်ဖြစ်သည်။ ခေတ်တစ်ခေတ်၏ ယဉ်ကျေးမှု လက်ရာများသည် ထိုခေတ်၏ အတတ်ပညာ အဆင့်အတန်းကို မှန်းဆနိုင်ပေသည်။ ကမ္ဘာပေါ်ရှိ နိုင်ငံတိုင်းတွင် ကိုယ့်ရိုးရာ ယဉ်ကျေးမှု ရှေးဟောင်းအမွေအနှစ်များရှိပေသည်။ ထိုအမွေအနှစ်များကို အသက်နှင့်ထပ်တူ ထိန်းသိမ်း ကြရမြဲပင်ဖြစ်သည်။ ယဉ်ကျေးမှုပျောက် လူမျိုးပျောက်ဟူသော စကားပင် ရှိနေပေသည်။

မြန်မာနိုင်ငံ၏ဒေသတိုင်းတွင် သမိုင်းဝင်အဖိုးတန်အမွေအနှစ်များ ရှိနေပေသည်။ အထူးသဖြင့် သာသနိကအဆောက်အအုံများနှင့် ရှေးခေတ် ဘိုးဘေး ဘီဘင်တို့၏ကောင်းမှု မှတ်တမ်းကျောက်စာများ၊ ခေါင်းလောင်းစာများ၊ ခေါင်းလောင်းများသည် မြန်မာနိုင်ငံအတွက် အဖိုးမဖြတ်နိုင်သော ယဉ်ကျေးမှု အမွေအနှစ်များပင်ဖြစ်သည်။ မန္တလေးတိုင်းဒေသကြီးအတွင်း မန္တလေးမြို့ တောင်ဘက်ကပ်လျက်ရှိသော ရှေးခေတ်မင်းနေပြည် အမရပူရမြို့တွင် သမိုင်းဝင်ပစ္စည်းများ၊ အနုပညာလက်ရာများ၊ ကမ္ဘာကျော်သစ်သားတံတား ဖြစ်သည့် ဦးပိန်တံတားတို့တည်ရှိပေသည်။

အမရပူရနန်းတော်သည် ယခုနံ့သာရွာ၏ မြောက်ဘက်နားတွင်ရှိ၍ လက်ရှိကာလတွင် ရှေးဟောင်းရွှေတိုက်၊ ငွေတိုက်တော်များကျန်ရှိနေသေး ကြောင်း လေ့လာသိရှိရပါသည်။ အမရပူရနန်းတော်၏ အနောက်တောင် ယွန်းယွန်းနေရာတွင် ဘကြီးတော်ဘုရားတည်ထားကိုးကွယ်ခဲ့သော ''မဟာ ဝိဇယရံသီပုထိုးတော်ကြီး'' ဘုရားဝင်းအတွင်း မဟာရံတံတိုင်း၏ အရှေ့မြောက် ထောင့်နေရာတွင် စေတီတော်ကြီးသမိုင်းရေးထိုးထားသော ကြေးပိဿာချိန် တစ်သောင်းငါးထောင်ရှိသည့် ခေါင်းလောင်းကြီးရှိသည်။ ခေါင်းလောင်းကြီးအား ''မဟာမေရုမကုဋ ဃဏ္ဍရာဇာ''ဟုခေါ်တွင်သည်။

ခေါင်းလောင်းကြီးသည် မဟာဝိဇယရံသီပုထိုးတော်ကြီး၏ သမိုင်းရေးထိုး ထားသော သမိုင်းဝင် အဖိုးတန်အမွေအနှစ်ပင်ဖြစ်သည်။ ထိုသို့သော အဖိုးတန် အနုပညာလက်ရာကို နိုင်ငံတကာမှ ခရီးသွားဧည့်သည်များ စိတ်ဝင်တစား လေ့လာလေ့ရှိသည်။ မြန်မာတို့၏ အဖိုးတန်အနုပညာလက်ရာများကို နိုင်ငံ တကာမှ ခရီးသွားဧည့်သည်များလေ့လာနိုင်စေရန် ဧည့်လမ်းညွှန်များကလည်း ကူညီသင့်လှပေသည်။ ယခုအခါ အမရပူရမြို့တွင် သမိုင်းဝင်နှစ်ပေါင်း ၁၉ဝ ကျော် ကြေးပိဿာချိန် တစ်သောင်းငါးထောင်ရှိသော ခေါင်းလောင်းကြီး သည် တင့်တယ်စွာတည်ရှိလျက်ရှိပါကြောင်း တင်ပြအပ်ပါသည်။

(တိမ်တမန်)
The Mirror Daily
https://www.facebook.com/TheMirrorDaily