ကိုထင်ကျော်ကို ထောင်ဒဏ် ၁ နှစ် ထပ်မံချမှတ်

 ရန်ကုန်တိုင်း အတွင်း တရားရုံး ၁၂ ရုံးမှာ အမှုရင်ဆိုင် နေရတဲ့ ဒီမိုကရေစီ စဉ်ဆက်မပြတ် လှုပ်ရှားသူများ အင်အားစု MDCF အဖွဲ့ခေါင်းဆောင် ကိုထင်ကျော်ကို တောင်ဒဂုံမြို့နယ် တရားရုံးက ဒီနေ့ ထောင်ဒဏ် ၁ နှစ် ထပ်မံချမှတ်လိုက်တဲ့ အတွက် စုစုပေါင်း ထောင်ဒဏ် ၄ နှစ်ရှိသွားပြီလို့ သတင်းရရှိပါတယ်။

ကိုထင်ကျော်ကို ခွင့်ပြုချက်မရှိဘဲ ဆန္ဒပြမှုတွေ၊ ဆူပူအောင်လှုံ့ ဆော်မှုတွေနဲ့  ရန်ကုန်တိုင်းအတွင်း မြို့ နယ်အတော်များများက ရဲတပ်ဖွဲ့ တွေက တရားစွဲထားပြီး၊ မြို့ နယ်တစ်ခုစီအလိုက် ထောင်ဒဏ်ချမှတ်နေတာပါ။ နောက်ထပ်ရင်ဆိုင်ရဦးမယ့် တရားရုံး ၆ ရုံးကျန်သေးတယ်လို့  ကိုထင်ကျော်ရဲ့ညီ ကိုသိန်းအောင်မြင့်က RFA ကို အခုလိုပြောပါတယ်။

"ကိုထင်ကျော်ကို ပုဒ်မ ၁၈ နဲ့ ၆ လပိုင်း ၄ ရက်နေ့က ကျောက်တံတားမြို့နယ်က ထောင် ၃ လ ချထားတာရှိတယ်၊ ပြီးတော့ ၇ လပိုင်း ၉ ရက်နေ့က ဗဟန်းမြို့နယ်က ထောင် ၃ လ ချထားတာရှိပေါ့ဗျာ၊ ၅ဝ၅(ခ)နဲ့က ဒီ ၆ လပိုင်း ၂၃ ရက်နေ့က တောင်ဥက္ကလာပ တရားရုံးက ထောင်ဒဏ် ၆ လချထားပါတယ်၊ ပြီးတော့ ၇ လပိုင်း ၂၁ ရက်နေ့မှာပဲ ဒဂုံအရှေ့နဲ့ ဒဂုံမြောက်တရားရုံးက ထောင်ဒဏ် ၁ နှစ်စီ ချထားပါတယ်၊ ဒီနေ့ သြဂုတ်လ ၁ ရက်နေ့မှာတော့ တောင်ဒဂုံတရားရုံးက ထောင်ဒဏ် ၁ နှစ် ထပ်ချပါတယ်ခင်ဗျ၊ စုစုပေါင်း ထောင်ဒဏ်အားလုံး ၄ နှစ် ရှိသွားပါပြီ၊ နောက်ထပ် တရားရုံး ၆ ရုံး ကျန်ပါသေးတယ်ခင်ဗျ"

ကိုထင်ကျော်ဟာ ၂၀၀၇ ခုနှစ်က ကုန်ဈေးနှုန်းကျဆင်းရေးအတွက် အကြိမ်ကြိမ် ဆန္ဒပြတောင်းဆိုခဲ့တာကြောင့် နှစ်ရှည်ထောင်ဒဏ် ချမှတ်ခံခဲ့ရပါတယ်။

အခုအစိုးရလက်ထက်မှာ ပြစ်ဒဏ်လျှော့ပေါ့ပေးတဲ့အတွက် ပြန်လွတ်လာပြီးတဲ့နောက်မှာလည်း လက်ကျန်နိုင်ငံရေး အကျဉ်းသားတွေ လွှတ်ပေးဖို့၊ မြေယာသိမ်းခံရတဲ့ ပြည်သူတွေကို မြေယာပြန်ပေးဖို့၊ တယ်လီဖုန်းဆင်းကတ်တွေ ၅ ထောင်ကျပ်နဲ့  ရောင်းပေးဖို့ စသဖြင့် အကြိမ်ကြိမ် တောင်းဆိုဆန္ဒပြခဲ့သလို၊ အခုတစ်ကြိမ် အဖမ်းမခံရခင်မှာတော့ အစိုးရကို အယုံအကြည်မရှိကြောင်းနဲ့  ဒေါ်အောင်ဆန်းစုကြည်နဲ့ တိုင်းရင်းသားဒီမိုကရေစီ အင်အားစုတွေကို ကြားဖြတ်အစိုးရအဖြစ် ပြည်သူတွေက တင်မြှောက်ကြောင်း လှုပ်ရှားမှုတွေ ပြုလုပ်ခဲ့ပါတယ်။

RFA Burmese
https://www.facebook.com/pages/RFA-Burmese/39218993127