သူရဦးရွှေမန်းရဲ့ ဆုံးဖြတ်ချက်ကိုသာ ထောက်ခံခဲ့တာလို့ NLD ထုတ်ပြန်

 PR ခေါ် အချိုးကျ ကိုယ်စားပြုစနစ် ကျင့်သုံးမှာကို အမျိုးသား ဒီမိုကရေစီ အဖွဲ့ချုပ်က ထောက်ခံတယ်ဆိုပြီး ပြည်သူတွေအကြား ထင်ယောင်ထင်မှား ဖြစ်လာတဲ့ အတွက် PR စနစ်ကို မထောက်ခံကြောင်း အမျိုးသား ဒီမိုကရေစီ အဖွဲ့ချုပ်က ဒီနေ့ ကြေညာချက် ထုတ်ပြန်လိုက်ပါတယ်။

ဒီနေ့ ထုတ်ပြန်တဲ့ ကြေညာချက်နဲ့ ပတ်သက်ပြီး အမျိုးသား ဒီမိုကရေစီ အဖွဲ့ချုပ် ဗဟိုအလုပ်အမှု ဆောင်အဖွဲ့ဝင် ဦးထွန်းထွန်းဟိန်က အခုလို ပြောပါတယ်။

"တချို့က ရှင်းရှင်းလင်းလင်းမရှိတော့ PR စနစ်ကို NLD က ထောက်ခံသလား၊ မထောက်ခံဘူးလားဆိုတာ အငြင်းပွားစရာတွေရှိလာပါတယ်၊ ကျနော်တို့ ထောက်ခံတယ်ဆိုတာက ဥက္ကဌရဲ့ ရှင်းလင်းပြောကြားချက်အပေါ်မှာ ထောက်ခံတာပါဆိုတာကို ကျနော်တို့က ရှင်းရှင်းလင်းလင်း ပြည်သူလူထုသိအောင် လုပ်လိုက်တာပါ"

ဇူလိုင်လ ၂၉ ရက်နေ့ ပြည်သူ့လွှတ်တော် အစည်းအဝေးမှာ NDF ပါတီက ဦးအောင်ဇင် တင်သွင်းတဲ့အဆိုကို ဒေါ်အောင်ဆန်းစုကြည်နဲ့ အမျိုးသားဒီမိုကရေစီအဖွဲ့ချုပ် လွှတ်တော် ကိုယ်စားလှယ်တွေအနေနဲ့ ထောက်ခံဆွေးနွေးခဲ့တာ မဟုတ်ဘဲ၊ ဒီအဆိုအပေါ် လွှတ်တော်ဥက္ကဋ္ဌ သူရဦးရွှေမန်းရဲ့ ပြန်လည်ရှင်းလင်း အဓိပ္ပါယ်ဖွင့်ဆိုချက်အပေါ်မှာသာ ထောက်ခံတာဖြစ်တယ်လို့ ဦးရွှေမန်းရဲ့ ရှင်းလင်းချက်ကိုကိုးကားပြီး ကြေညာချက်မှာ ဖော်ပြထားပါတယ်။

ဒီကိစ္စနဲ့ ပတ်သက်ပြီး အမျိုးသားဒီမိုကရေစီအဖွဲ့ချုပ် ပြည်သူ့လွှတ်တော် ကိုယ်စားလှယ်တွေက မနေ့က လက်မှတ်ရေးထိုးပြီး သူရဦးရွှေမန်းထံ ပေးပို့ထားတယ်လို့လည်း ကြေညာချက်မှာ ပါရှိပါတယ်။

RFA Burmese
https://www.facebook.com/pages/RFA-Burmese/39218993127?fref=nf