အစိုးရ ထက်၊ လယ်၊ မူ ကျောင်း ဆရာ ဆရာမများ အပိုငွေ ကောက်ခံပါက ထိထိ ရောက်ရောက် အရေးယူမည်

ရန်ကုန် ဇွန် ၁

နိုင်ငံတစ်ဝန်း ပညာရေး ဝန်ကြီးဌာန အောက်ရှိ အစိုးရပိုင် ထက်၊ လယ်၊ မူ ကျောင်းများမှ ဆရာ ဆရာမများ အနေဖြင့် ယခုနှစ် ၂၀၁၄-၂၀၁၅ ပညာသင်နှစ်တွင် အားကစားကြေး၊ အာစရိယပူဇော်ကြေး၊ ကျောင်း စာကြည့်တိုက်ကြေး၊ စာမေးပွဲကြေး၊ စာရွက် စာတမ်းကြေးကအစ အခြား မည်သည့် အကြောင်းအရာဖိုးမှ ကျောင်းသားများနှင့် ကျောင်းသား မိဘများထံမှ ကောက်ခံမှုကို လုံးဝ ခွင့်ပြုတော့မည် မဟုတ်ဘဲ တိုင်ကြား သိရှိပါက ပညာရေး ဝန်ကြီးဌာန အနေဖြင့် ထိထိရောက်ရောက် အရေးယူ ဆောင်ရွက် သွားမည် ဖြစ်ကြောင်း ပညာရေး ဝန်ကြီးဌာနမှ သိရသည်။

မြန်မာနိုင်ငံအနေဖြင့် ဘက်ပေါင်းစုံမှ ပြုပြင် ပြောင်းလဲမှုများ အရှိန်အဟုန်ဖြင့် လုပ်ဆောင်လျက် ရှိရာတွင် နိုင်ငံ အဆင့်အတန်း မြင့်စေရန် အဓိက အခြေခံအချက် ဖြစ်သည့် ပညာရေးကို အစဉ်တစိုက် တစ်ဟုန်ထိုး လုပ်ဆောင်နေပြီ ဖြစ်သည်။ ယခင်နှစ် ၂၀၁၁-၂၀၁၂ ပညာသင်နှစ်မှစ၍ အခမဲ့ မူလတန်းကျောင်း ပညာရေးကို စတင် အောင်မြင်စွာ လုပ်ဆောင်နိုင်ခဲ့ပြီး ဖြစ်သည်။ ယခုနှစ် ၂၀၁၄-၂၀၁၅ ပညာသင်နှစ်တွင်လည်း တစ်ဆင့်မြှင့်၍ အခမဲ့ အလယ်တန်းအဆင့် ပညာရေးကို နိုင်ငံတော် စီမံချက်ဖြင့် စတင်အကောင်အထည် ဖော်လုပ်ဆောင်နေပြီဖြစ်သည်။

" ကျွန်တော်တို့ ယခုနှစ်ကစပြီး အလယ်တန်း အခမဲ့ ပညာရေးစနစ်ကို နိုင်ငံတော် စီမံချက်ဖြင့် လုပ်ဆောင် ပေးနေပါပြီ။ ကျောင်းအပ်ခ၊ ဖတ်စာအုပ်ဖိုးက အစ မည်သည့်ငွေမှ တစ်ပြားတစ်ချပ်မှ မပေးရပါဘူး။ ဒါ့အပြင် အားကစားကြေး၊ ကျောင်းစာကြည့်တိုက်ကြေး၊ စာမေးပွဲကြေး၊ အာစရိယ ပူဇော်ပွဲကြေးကအစ ကျောင်းသားနဲ့ ကျောင်းသားမိဘတွေထံက ဘာဆိုဘာမှ ကောက်ခံမှု မပြုရတော့ပါဘူး။ ကောက်ခံရင် တစ်ဦး တစ်ယောက်က တိုင်လို့ပဲဖြစ်ဖြစ်၊ သိလို့ပဲ ဖြစ်ဖြစ် ဒီနှစ်ကတော့ အရင်နှစ်တွေကလို မြို့ကနေ နယ်တွေ ပြောင်းတာတို့၊ ရာထူး လျှော့တာတို့ မလုပ်တော့ပါဘူး။ အနည်းဆုံး ပင်စင်ပေးလို့ရရင် ပင်စင်ပေးမယ်။ အပြစ်ပေါ်မှာ မူတည်ပြီးတော့ လုံးဝ ဖြုတ်သင့်ရင်ဖြုတ်၊ အပြစ်ကြီးငယ်ပေါ် မူတည်ပြီး ဒီကိစ္စကို ပညာရေး ဝန်ကြီးဌာန အနေနဲ့ ကင်းစင် ပပျောက်သွားအောင် လုပ်ဆောင်သွားဖို့ စီစဉ် ဆောင်ရွက်မှုတွေ လုပ်နေပါတယ်" ဟု ပညာရေးဝန်ကြီးဌာနမှ ဒုတိယ ညွှန်ကြားရေးမှူး ဦးမြင့်စိန်က မြန်မာ့အလင်းသို့ ပြောကြားသည်။

နိုင်ငံတော်အနေဖြင့် မြန်မာနိုင်ငံ၏ ပညာရေးကို အဆင့်မြင့်စေရန် ရည်ရွယ်ချက်ဖြင့် ယခင် ၂၀၁၃-၂၀၁၄ ပညာသင်နှစ်မှစပြီး နိုင်ငံတစ်ဝန်းရှိ ထက်၊ လယ်၊ မူ ကျောင်းများကို သင့်တင့် လျောက်ပတ်သည့် အသုံးငွေ ဘတ်ဂျက်များ စတင် ချထားပေးခဲ့သည်။ ထို့အပြင် ကမ္ဘာ့ဘဏ်၊ ဩစတြေးလျနှင့် NGO အဖွဲ့အချို့တို့ ကလည်း မြန်မာနိုင်ငံ ပညာရေး အဆင့်မြင့်စေရန် ဒေါ်လာသန်း ၁၀၀ ကို ထောက်ပံ့ လှူဒါန်းမှုပြုခဲ့သည်။

သို့သော် ယခင် ပညာသင်နှစ်တွင် ထက်၊ လယ်၊ မူကျောင်းများသို့ နိုင်ငံတော်က ချထားပေးသည့် အသုံးပြု ရန်ငွေ ဘတ်ဂျက်များကို စည်းကမ်းတကျ သုံးစွဲမှု အလေ့အထ မရှိသော ကျောင်းအချို့က အဆိုပါငွေကိုသုံးစွဲမှု မရှိဘဲ ကျောင်းသားများနှင့် ကျောင်းသား မိဘများထံမှ အချို့ အသုံးစရိတ်ငွေများကို ကောက်ခံမှုများ ရှိခဲ့ခြင်းတို့ကြောင့် ယခုနှစ်တွင် ထိုသို့ မဖြစ်စေရန် ပညာရေးဝန်ကြီးဌာန အနေဖြင့် ထိထိ ရောက်ရောက် အပြစ်ပေး ဆောင်ရွက်မှုများ ပြုလုပ်သွားမည် ဖြစ်ကြောင်း သိရသည်။

"ကျွန်မတို့ ပညာရေးအနေနဲ့ အရင်နှစ်တွေက အခုလို ဘတ်ဂျက် ချထားပေးတာ မရှိခဲ့ဘူးလေ။ အခုလို ချထားပေးတော့ ဘယ်လို သုံးရမယ်မှန်းလည်း မသိဘူးပေါ့။ ပြီးတော့ စာရင်းစစ်ကိုလည်း ကြောက်ရတယ်လေ။ အဲဒီငွေထဲက သိပ်မသုံးရဲလို့ ကျောင်းမိုးမလုံလို့ ပြင်ဖို့တောင်မှ မတင်ပြခဲ့ဘူး။ ဒီနှစ်တော့ ပညာရေးက လိုက်လံ ကြီးကြပ် စစ်ဆေးတဲ့အဖွဲ့က တကယ် အမှန်လုပ်တာ၊ တိတိကျကျနဲ့ စစ်မှန်တဲ့ ဘောက်ချာ အစစ်နဲ့ဆိုရင် ရဲရဲတင်းတင်း သုံးလို့တော့ မှာထားတယ်။ ဒါ့ကြောင့် ဒီနှစ်မှာတော့ လုပ်သင့် လုပ်ထိုက်တာ၊ ပြင်သင့် ပြင်ထိုက်တာကိုလည်း ပြင်မယ်။ ပြီးတော့ ကလေးတွေ ကျန်းမာရေး အတွက် ကျောင်းနောက်က ချုံနွယ်တွေကို ရှင်းဖို့လည်း အထက်ကို တင်ပြထားပါတယ်"ဟု သာကေတ မြို့နယ်အတွင်းရှိ အခြေခံပညာ မူလတန်း ကျောင်းအုပ် ဆရာမတစ်ဦးက ဆိုသည်။

မြန်မာနိုင်ငံ ပညာရေးဝန်ကြီးဌာန အနေဖြင့် ၂၀၁၁-၂၀၁၂ ပညာသင်နှစ်မှ စတင်၍ အခမဲ့မူလတန်း ပညာရေးကို စတင်ခဲ့ပြီး ယခုနှစ် ၂၀၁၄-၂၀၁၅ ပညာသင်နှစ်တွင် အခမဲ့ အလယ်တန်း ပညာရေးကို စတင် ဆောင်ရွက်ခဲ့ပြီ ဖြစ်သည်။ အခမဲ့ မူလတန်း ပညာရေး စနစ်တွင် ကျောင်းအပ်နှံခ၊ ဖတ်စာအုပ်၊ ဗလာ စာအုပ်နှင့် ကလေးများကို ခဲတံ၊ ဘောပင် စသည်တို့ကို ဝယ်ယူရန် ငွေကျပ် ၁၀၀၀ နှုန်းကိုလည်း နှစ်နှစ် ဆက်တိုက် ပေးဝေခဲ့ပြီး ယခုနှစ်အခမဲ့ အလယ်တန်း ပညာရေးတွင် ကျောင်းအပ်နှံခနှင့် ကျောင်းသုံး ဖတ်စာအုပ်တို့ကို အခမဲ့ ပေးဝေသည့် အပြင် ပညာသင်နှစ် တစ်ခုလုံးတွင်လည်း ကျောင်းသားနှင့် ကျောင်းသား မိဘများအနေဖြင့် အကုန်အကျခံ ပေးဆောင် သင်ယူရတော့မည် မဟုတ်ကြောင်း သိရသည်။

MOI Webportal Myanmar