ပေါင်းတည်တွင် ရဲနှင့် အရပ်သားရုန်းရင်း ဆန်ခတ်ဖြစ် အရပ်သားသုံးဦး ဆေးရုံတင်ထားရဟုဆို

ပုဒ်မ ၅၀၅ (ခ) ဖြင့် မေ ၆ ရက်က ရုံးထုတ်စစ်ဆေးခံရသည့် ပြည်၊ သဲကုန်းမြို့နယ်မှ လယ်သမား ငါးဦး အနက် တစ်ဦးဖြစ်သည့် ကိုပေါက်စကို အာမခံမပေးဘဲ ပေါင်းတည်ထောင်သို့ ပြောင်းခဲ့ရာ ပေါင်းတည် ထောင်ရှေ့တွင် ရဲနှင့် အရပ်သား ရုန်းရင်းဆန်ခတ်ဖြစ်ပြီး အရပ်သားသုံးဦး ဆေးရုံတင်လိုက်ရသည်ဟု လယ်သမားအရေး ကူညီလှုပ်ရှားသူများကပြောသည်။

သဲကုန်းတရားရုံးတွင် ပုဒ်မ ၅၀၅(ခ) ဖြင့် သန့်ဇင်ထက်၊ ဒေါ်ညို၊ ဒေါ်မုန်း၊ကိုပေါက်စ၊ ကိုအောင် တို့ ငါးဦးကို ရုံးထုတ်စစ်ဆေးခဲ့ပြီး ကိုပေါက်စ ကို အာမခံမပေးဘဲ ပေါင်းတည်ထောင်သို့ ပြောင်းရွှေ့ခဲ့သည်။ ညနေ ၅ နာရီအချိန် ပေါင်းတည်ထောင်ရှေ့တွင် လယ်သမားများက ကိုပေါက်စအား ပြန်လွှတ်ပေးရန် တောင်းဆိုရာမှ ရဲတပ်ဖွဲ့ဝင် သုံးဆယ်ကျော်နှင့် လယ်သမားရှစ်ဦး ရုန်းရင်းဆန်ခတ် ဖြစ်ပွားခဲ့ခြင်းဖြစ်သည်။

ထိုသို့ ရုန်းရင်းဆန်ခတ်ဖြစ်ပွားခဲ့ရာ အမျိုးသားတစ်ဦးဖြစ်သည့် မာနော်နှင့် အမျိုးသမီးနှစ်ဦးဖြစ်သည့် ဒေါ်ဝင်း၊ဒေါ်ညိုတို့ ပြင်းထန်စွာ ဒဏ်ရာရရှိခဲ့ပြီး ပေါင်းတည်ဆေးရုံကြီးသို့ တင်လိုက်ရသည်ဟု လယ် သမားအရေးကူညီလှုပ်ရှားသူ မဇင်မာဝင်းကပြောသည်။

“မာနော်က လူအုပ်ကို ၀င်ဖြေရင်း ရဲတွေ ဖမ်းချုပ်ထိုးလို့ နံရိုးအောင့်နေတယ်။ ဒေါ်ဝင်းကို ရဲကဆောင့် တွန်းတာ လမ်းမနဲ့ ခေါင်းဆောင့်မိပြီး ထောင်အရှေ့ မြေနီလမ်းမှာ တစ်ကြိမ်လဲတယ်။ ပြည်-ရန်ကုန် လမ်းမှာ တစ်ကြိမ်လဲတယ်။ ဆေးရုံမှာ အောက်ဆီဂျင်ပိုက် တပ်ထားရတယ်။ ခေါင်းကိုလည်း ဓာတ်မှန် ရိုက်ရမယ်။ ဒေါ်ညိုက တွန်းလား ထိုးလားလုပ်ရင်း လမ်းပေါ်ရောက်တော့ မူးလဲသွားတာ”ဟု ၎င်းကဆို သည်။

ပေါင်းတည်မြို့နယ် ရဲတပ်ဖွဲ့မှူး ရဲမှူးဦးစံဝေကို ဆက်သွယ်မေးမြန်းရာ ပဲခူးမြို့မှ အပြန်လမ်းတွင် ရှိနေပြီး အကြောင်းအရာကိစ်္စကို မသိရှိသေးဟုဆိုသည်။

ဧပြီ ၁၁ ရက်က သဲကုန်းမြို့အပြင်ဘက် ရွှေကြိုးပင်နတ်စင်၌ လယ်ယာမြေ နှင့် အခြားမြေများ စုံစမ်းစစ် ဆေးရေး ကော်မရှင်မှ တာဝန်ရှိသူ သဲကုန်းမြို့နယ် လွှတ်တော်ကိုယ်စားလှယ် ဦးစိုးအောင်၊ လယ်ယာမြေ များတွင် ငါးကန်လုပ်ငန်းများ လုပ်ကိုင်နေသူ စီးပွားရေး လုပ်ငန်းရှင် ဦးထိုင်ထိုင်၊ သဲကုန်းမြို့နယ်အုပ်ချုပ် ရေးမှူး၊ သဲကုန်းမြို့နယ် သမဦးစီးမှူးတို့ကို လယ်ယာမြေသိမ်းဆည်းခံရသူ လယ်သမားငါးဆယ်ကျော်က ကျိန်စာတိုက်ခဲ့ကြသည်။

ရေခဲ (ပြည်)
Mizzima - News in Burmese