ရန်ကုန်၊ ဧပြီ ၃၀
လာမည့် ကျောင်းဖွင့်ရာသီမှ စတင်ကာ အခြေခံပညာ ကျောင်းများတွင် အန္တရာယ်ရှိ အစားအသောက်များ ရောင်းချခြင်းကို ရန်ကုန်တိုင်းဒေသကြီး အစိုးရအဖွဲ့ အနေနှင့် လုံးဝ ပိတ်ပင် တားဆီးသွားမည် ဖြစ်ပြီး ဖောက်ဖျက်ပါက အမျိုးသား အစားအသောက်ဆိုင်ရာ ဥပဒေဖြင့် ထိထိရောက်ရောက် အရေးယူသွားမည် ဖြစ်ကြောင်း ရန်ကုန်တိုင်းဒေသကြီး လူမှုရေးဝန်ကြီး ဒေါက်တာမြင့်သိန်းက ပြောကြားသည်။
ဧပြီလ ၃၀ ရက်နေ့တွင် ပြုလုပ်သော ရန်ကုန်တိုင်းဒေသကြီး လွှတ်တော် အဋ္ဌမ ပုံမှန်အစည်းအဝေးတွင် ဗဟန်းမြို့နယ် တိုင်းဒေသကြီး လွှတ်တော်ကိုယ်စားလှယ် ဒေါက်တာညိုညိုသင်း၏ အခြေခံပညာ ကျောင်းများတွင် အန္တရာယ်ရှိ အစားအသောက်များ ရောင်းချခြင်းကို အပြီးသတ် ပိတ်ပင်ရေး အစိုးရအဖွဲ့သို့ တိုက်တွန်းကြောင်း အဆိုကို ဆွေးနွေးခြင်းနှင့် ပတ်သက်ပြီး ၎င်းက အထက်ပါအတိုင်း ပြောကြားလိုက်ခြင်း ဖြစ်သည်။
“အခြေခံပညာ ကျောင်းများမှာ ဓာတုဗေဒ ဆိုးဆေးများ ပါဝင်တဲ့ ပြည်တွင်း ပြည်ပ အစားအသောက်များ ရောင်းချခြင်းကို မေလမှ စတင်ပြီး စစ်ဆေး ပိတ်ပင်သွားပါမယ်” ဟု လူမှုရေးဝန်ကြီး ဒေါက်တာမြင့်သိန်းက ပြောကြားသည်။
ယင်းသို့ စစ်ဆေးရာတွင် အခြေခံပညာ ကျောင်းများအတွင်းရှိ မုန့်ဆိုင်များအတွင်း ရောင်းချနေမှုများကို ကျောင်းကျန်းမာရေး အဖွဲ့များနှင့် ပူးပေါင်းစစ်ဆေးခြင်း၊ မုန့်ဆိုင်များအတွင်း အစားအသောက်နှင့် ဆေးဝါးကွပ်ကဲရေး ဦးစီးဌာန FDA က ခွင့်ပြုထားသော မုန့်များ ဟုတ် မဟုတ် စစ်ဆေးခြင်းများကို လုပ်ဆောင်သွားမည် ဖြစ်ကြောင်း ၎င်းကဆိုသည်။
ယင်းကဲ့သို့ ဓာတုဗေဒ ဆိုးဆေး ပါဝင်သော အစားအသောက်များ ရောင်းချခြင်းကို လုံးဝပိတ်ပင်ပါက မရှိဆင်းရဲသော ဈေးရောင်းသူများ၏ တစ်နိုင်တစ်ပိုင် စီးပွားရေးကို ထိခိုက်နိုင်ကြောင်း လမ်းမတော်မြို့နယ် တိုင်းဒေသကြီး လွှတ်တော်ကိုယ်စားလှယ် ဦးစိုးဝင်းက ထောက်ပြ ပြောဆိုသည်။
“ကျွန်တော်တို့က ဈေးမရောင်းရဘူးလို့ ပိတ်ပင်မှာ မဟုတ်ပါဘူး။ ရောင်းလို့ရတဲ့ မုန့်အမျိုးအစားတွေ ရှိပါတယ်” ဟု လူမှုရေးဝန်ကြီး ဒေါက်တာမြင့်သိန်းက ပြောကြားသည်။
ထို့အပြင် အခြေခံပညာ ကျောင်းများအတွင်း ဈေးရောင်းသူများကို သက်ဆိုင်ရာ ကျောင်းအုပ်များမှ တစ်ဆင့် အသိပညာပေးမှုများ ပြုလုပ်မည် ဖြစ်ပြီး အန္တရာယ်ရှိ အစားအသောက်များ ရောင်းချခြင်း မပြုဟူသော ဝန်ခံလက်မှတ်များ ရေးထိုးရမည် ဖြစ်ကြောင်း ၎င်းကဆိုသည်။
The Voice Weekly
အခြေခံပညာ ကျောင်းများတွင် အန္တရာယ်ရှိ အစားအသောက်များ ရောင်းချခြင်း လုံးဝ ပိတ်ပင်မည်
Reviewed by သစ်ထူးလွင်
on
16:02
Rating:
Reviewed by သစ်ထူးလွင်
on
16:02
Rating:
