မကွေးတိုင်းဒေသကြီး၊ ပခုက္ကူမြို့နယ်၊ မြစ်ခြေတိုက်နယ် သရက်တောကျေးရွာအုပ်စုက လျှပ်စစ်မီတာခ ပိုကောက်ခံတဲ့အတွက် ပြီးခဲ့တဲ့ ဖေဖေါ်ဝါရီလ ၁၉ ရက်နေ့က ကန့်ကွက်ဆန္ဒပြခဲ့သူတွေထဲက ဦးဆောင်သူ ၄ ဦးကို တရားမ၀င် စီတန်းလှည့်လည်ခြင်းဆိုင်ရာ ပုဒ်မ ၁၈ နဲ့ ပခုက္ကူမြို့နယ်တရားရုံးမှာ တရားစွဲလိုက်ပါတယ်။
ဆန္ဒပြဖို့ခွင့်ပြုမိန့် အကြိမ်ကြိမ်တောင်းခံပေမဲ့ မပေးခဲ့တာကြောင့် သူတို့အနေနဲ့ တရားမ၀င် ဆန္ဒပြတာဖြစ်ကြောင်း တရားစွဲခံရသူ သရက်တောကျေးရွာသား ဦးညွန့်အောင်က ပြောပါတယ်။
"လျှပ်စစ်ကွားခြားယူနစ်တွေ မတောင်းဖို့ဆိုပြီးတော့ ကျနော်တို့က အာဏာပိုင်တွေကို အစောကတည်းက စာတွေနဲ့ ငြိမ်းချမ်းစွာ စုဝေးခွင့်ကိုတင်တယ်၊ ခွင့်ပြုမိန့်မပေးဘဲနဲ့ သူတို့က ငြင်းပယ်ပြီးတော့ ပုဒ်မ ၁၈ နဲ့ ကျနော်တို့ကို တရားစွဲတာပါ၊ ဒီလူတွေက ဥပဒေတွေနဲ့ တပြေးညီ လိုက်နာဆောင်ရွက်ပါတယ်၊ ဆန္ဒပြခွင့်ကိုလည်း ၁၄ ရက် ၂ လပိုင်းက တင်ပါတယ်၊ တင်တဲ့အချိန်မှာ ကျနော်တို့ကို ငြင်းပယ်လိုက်ပါတယ်၊ ကျနော်တို့ကို ပုဒ်မ ၁၈ နဲ့ တရားရုံးကို ခေါ်ပါတယ်၊ အခုကျနော်တို့ အာမခံနဲ့ ပြန်ထွက်လာတာပါ"
ပြီးခဲ့တဲ့ မတ်လ ၇ ရက်နေ့ကလည်း အဲဒီနေ့က ဆန္ဒပြသူတွေထဲက ၂ ဦးကို မြစ်ခြေတိုက်နယ် ရဲအုပ်က တရားစွဲခဲ့ပြီး နောက်ထပ်ဦးဆောင်သူ ၄ ဦးကို ဒီနေ့ ထပ်မံတရားစွဲလိုက်တာဖြစ်ပါတယ်။
ပခုက္ကူမြို့နယ် သရက်တောကျေးရွာအုပ်စု လျှပ်တရာ၊ အိုးဘို၊ သဇင်၊ သပြေစုစတဲ့ ကျေးရွာ ၁၂ ရွာမှာ မီတာခတွေ ကောက်ခံတဲ့အခါ ယူနစ် ၁၀၀ မှာ ယူနစ် ၄၀ ၀န်းကျင်လောက်ကို ကွာခြားယူနစ်ဆိုပြီး ထည့်သွင်းကောက်ခံတာကို ဒေသခံတွေက ၂ ကြိမ် ဆန္ဒပြကန့်ကွက်ခဲ့ကြတာပါ။
သရက်တောကျေးရွာအုပ်စုမှာ အဲဒီလို အပိုယူနစ်ကြေးဆိုပြီး မီတာပြေစာမှာပါရှိပေမယ့် အနီးအနားက မြစ်ခြေကျေးရွာအုပ်စုမှာတော့ မပါရှိဘူးလို့ ကျေးရွာသားတွေက ပြောပါတယ်။
တရားစွဲခံရတဲ့ ရွာသား ၆ဦးကို လာမယ့် မတ်လ ၁၈ ရက်နေ့မှာ ပခုက္ကူမြို့နယ် တရားရုံးမှာ အမှုစစ်ဆေးမယ်လို့ သိရပါတယ်။
RFA Burmese
မီတာခပိုကောက်မှု ဆန္ဒပြပွဲ ခေါင်းဆောင် ၄ ဦး တရားစွဲခံရ
Reviewed by သစ်ထူးလွင်
on
05:30
Rating:
Reviewed by သစ်ထူးလွင်
on
05:30
Rating:
