အမျိုးစောင့် ဥပဒေကြမ်း ရေးဆွဲရေး ကော်မရှင် ဖွဲ့စည်း

ပြည်ထောင်စုသမ္မတမြန်မာနိုင်ငံတော်

နိုင်ငံတော်သမ္မတရုံး

အမိန့်ကြော်ငြာစာ

အမှတ်၊ ၁၉ / ၂၀၁၄

၁၃၇၅ ခုနှစ်၊ တပေါင်းလဆန်း ၇ ရက်

( ၂၀၁၄ ခုနှစ် ၊ မတ်လ ၇ ရက် )

ဥပဒေကြမ်းရေးဆွဲရေးကော်မရှင် ဖွဲ့စည်းတာဝန်ပေးအပ်ခြင်း

၁။ ရဟန်းရှင်လူပြည်သူများက နိုင်ငံတော်သမ္မတထံ ဆန္ဒပြုတင်ပြလာမှုအရ ကိုးကွယ်ရာ ဘာသာ ကူးပြောင်းခြင်းဆိုင်ရာဥပဒေနှင့် လူဦးရေတိုးပွားနှုန်း ထိန်းညှိရေးဆိုင်ရာဥပဒေများ ပြဋ္ဌာန်း နိုင်ရေးအတွက် ဥပဒေကြမ်းများရေးဆွဲခြင်းကို အစိုးရအဖွဲ့မှ ဆောင်ရွက်ပေးပါရန် ပြည်ထောင်စု လွှတ်တော်နာယက က ပြန်ကြားလာပါသည်။

၂။ ဥပဒေကြမ်းများရေးဆွဲပြုစုရာတွင် ပြီးပြည့်စုံသည့် ဥပဒေကြမ်းများဖြစ်နိုင်စေရန် ဘာသာရပ် ဆိုင်ရာ အတွေ့အကြုံရှိသော ပုဂ္ဂိုလ်များပါဝင်သည့် ကော်မရှင်တစ်ရပ် ဖွဲ့စည်း၍ ရေးဆွဲသင့်သည့် အတွက် ဥပဒေကြမ်းရေးဆွဲရေးကော်မရှင်ကို အောက်ပါပုဂ္ဂိုလ်များဖြင့် ဖွဲ့စည်းတာဝန်ပေးလိုက်သည်-

(က) ဦးထွန်းထွန်းဦး ဒုတိယရှေ့နေချုပ်၊ ပြည်ထောင်စုရှေ့နေချုပ်ရုံး ဥက္ကဋ္ဌ

(ခ) ဦးဝင်းမြင့် ဒုတိယဝန်ကြီး၊ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန ဒုတိယဥက္ကဋ္ဌ

(ဂ) ဒေါက်တာမောင်မောင်ဌေး ဒုတိယဝန်ကြီး၊ သာသနာရေးဝန်ကြီးဌာန ဒုတိယဥက္ကဋ္ဌ

(ဃ) ဦးစစ်အေး အဖွဲ့ခေါင်းဆောင်၊ နိုင်ငံတော်သမ္မတ၏ဥပဒေအကြံပေးအဖွဲ့ အဖွဲ့ဝင်

(င) ဦးတင်ဝင်း သံအမတ်ကြီး (အငြိမ်းစား) အဖွဲ့ဝင်

(စ) ဒေါက်တာတိုးလှ ပါမောက္ခ (အငြိမ်းစား)၊ သမိုင်းပညာရှင် အဖွဲ့ဝင်

(ဆ) ဒေါ်နန္ဒာမွန်း ညွှန်ကြားရေးမှူးချုပ်၊ သမိုင်းသုတေသနဦးစီးဌာန အဖွဲ့ဝင်

(ဇ) ဦးခိုင်အောင် ညွှန်ကြားရေးမှူးချုပ်၊ သာသနာတော်ထွန်းကားပြန့်ပွားရေးဦးစီးဌာန အဖွဲ့ဝင်

(ဈ) ဦးမြင့်ကြိုင် ညွှန်ကြားရေးမှူးချုပ်၊ ပြည်သူ့အင်အားဦးစီးဌာန အဖွဲ့ဝင်

(ည) ဦးမြတ်သူ (တက္ကသိုလ်မြတ်သူ) စာရေးဆရာ အဖွဲ့ဝင်

(ဋ) ဒေါက်တာမြင့်ထွေး ပြည်သူ့ကျန်းမာရေးပညာရှင် အဖွဲ့ဝင်

(ဌ) ဦးဝင်းမြင့် ဒုတိယညွှန်ကြားရေးမှူးချုပ်၊ ပြည်ထောင်စုရှေ့နေချုပ်ရုံး အတွင်းရေးမှူး

၃။ ကော်မရှင်၏ လုပ်ငန်းတာဝန်များမှာ အောက်ပါအတိုင်း ဖြစ်သည်-

(က) ရဟန်းရှင်လူ ပြည်သူတို့ထံက ပေးပို့လာသည့် အကြံပြုချက်များနှင့် ဥပဒေကြမ်းများ ရယူနိုင်ရေး ဆက်သွယ်ဆောင်ရွက်မည့်ပုဂ္ဂိုလ် သတ်မှတ်တာဝန်ပေးရန်၊

(ခ) လိုအပ်ပါက ပွင့်လင်းမြင်သာစွာဖြင့် အစည်းအဝေးနှင့် အလုပ်ရုံ ဆွေးနွေးပွဲများကို ကျင်းပ၍ ဥပဒေကြမ်းရေးဆွဲရာတွင် ပါဝင်သင့်သော အချက်အလက်များ ဖော်ထုတ်ရန်၊

(ဂ) အောက်ပါအချက်များကို အခြေခံ၍ ဥပဒေကြမ်းရေးဆွဲရန်-

(၁) ဖွဲ့စည်းပုံအခြေခံဥပဒေနှင့် ညီညွတ်စေပြီး၊ ကွဲပြားသော ဘာသာအယူဝါဒ ရှိနေမှုနှင့် တိုင်းရင်းသားစည်းလုံးညီညွတ်မှု ခိုင်မြဲစေရေးတို့ကို အလေးထား သုံးသပ်ရေးဆွဲရန်၊

(၂) တည်ဆဲဥပဒေများနှင့် ညီညွတ်စေပြီး ချိတ်ဆက်ကျင့်သုံးနိုင်စေရန်၊

(၃) နိုင်ငံတော်နှင့် ပြည်သူတို့အတွက် ရေရှည်အကျိုးရှိစေပြီး တစ်နိုင်ငံလုံး လွှမ်းခြုံ ကျင့်သုံးနိုင်စေရန်။

(ဃ) လိုအပ်ပါက ဘာသာရပ်ကျွမ်းကျင်သော လူပုဂ္ဂိုလ်နှင့် အဖွဲ့အစည်းများကို ဖိတ်ခေါ်၍ အကြံဉာဏ်ရယူရန်။

၎။ ကော်မရှင်သည် အောက်ပါနည်းလမ်းများကိုအသုံးပြု၍ ဥပဒေကြမ်းအား ရေးဆွဲပြုစုရန်ဖြစ်သည်-

(က) ပြည်ပနိုင်ငံများမှ သက်ဆိုင်ရာ ဥပဒေများအား စိစစ်လေ့လာ၍ မိမိနိုင်ငံ၏ လူ့အဖွဲ့အစည်းနှင့် ဆီလျော်ညီညွတ်သည့်အချက်များကို သုံးသပ်ပြီး ရေးဆွဲပြုစုခြင်း၊

(ခ) မြန်မာ့ယဉ်ကျေးမှု ဓလေ့ထုံးတမ်းအစဉ်အလာများနှင့် ကိုက်ညီစေရန် ရေးဆွဲပြုစုခြင်း၊

(ဂ) ရဟန်းရှင်လူ ပြည်သူများထံမှလည်းကောင်း၊ ဘာသာရပ် ကျွမ်းကျင်သူများ ထံမှ လည်းကောင်း အကြံပြုချက်များ သို့မဟုတ် ဥပဒေကြမ်းများကို ဖိတ်ခေါ်တောင်းခံ၍ အချက်အလက်ရယူပြီး ရေးဆွဲပြုစုခြင်း။

၅။ ဥပဒေကြမ်းရေးဆွဲရေးအတွက် လိုအပ်သော ဘဏ္ဍာငွေကို နိုင်ငံတော်သမ္မတရုံး ရန်ပုံငွေမှ ကျခံသုံးစွဲရမည်။

၆။ ကော်မရှင်သည် အပြီးသတ် ပြုစုရေးဆွဲပြီးသည့် ဥပဒေကြမ်း ၂ ရပ်ကို ၃၀-၆-၂၀၁၄ ရက် နေ့ထက် နောက်မကျစေဘဲ နိုင်ငံတော်သမ္မတထံ တင်ပြရမည်။ ယင်းဥပဒေကြမ်း ၂ ရပ်အား ဥပဒေအဖြစ် အတည်ပြုပြဋ္ဌာန်းပြီးချိန်တွင် ကော်မရှင်၏ လုပ်ငန်းတာဝန် ပြီးဆုံးသည်။

(ပုံ) သိန်းစိန်

နိုင်ငံတော်သမ္မတ

ပြည်ထောင်စုသမ္မတမြန်မာနိုင်ငံတော်