အင်တာနက်ပေါ်က လှုံဆော်သူတွေကို အရေးယူဖို့ အမေရိကန်သံအမတ်ကြီး တိုက်တွန်း

အင်တာနက် လူမှုကွန်ရက်တွေပေါ်ကနေ အခြေအနေတွေ မတည်မငြိမ်ဖြစ်အောင် လုပ်ဆောင်နေသူတွေကိုအရေးယူဖို့ မြန်မာနိုင်ငံဆိုင်ရာ အမေရိကန်သံအမတ်ကြီး Derek Mitchell က အစိုးရကို တိုက်တွန်းခဲ့ပါတယ်။

ရန်ကုန်မြို့ American Center မှာ မေလ ၈ ရက်နေ့ကကျင်းပခဲ့တဲ့ လွတ်လပ်စွာထုတ်ဖော်ပြောဆိုခွင့်ဆိုင်ရာ ဆွေးနွေးပွဲမှာ ပြောကြားခဲ့တာပါ။

အင်တာနက်လူမှုကွန်ရက်မှာ တချို့သူတွေက နာမည်အတု၊ အကောင့်အတုတွေနဲ့ ပြဿနာတွေ ပိုမိုကြီးထွားအောင် တာဝန်မဲ့ပြောဆိုရေးသားနေကြတယ်လို့ဆိုပါတယ်။ ကိုယ့်အမြင်ကို ပွင့်ပွင့်လင်းလင်း ထုတ်ဖော်ပြောဆိုခွင့်ရလာတဲ့ ဒီကနေ့အခြေအနေမှာ တာဝန်ယူတဲ့ သတင်းမီဒီယာတွေကို လွတ်လွတ်လပ်လပ်ဆောင်ရွက်ဖို့လိုပြီလို့လည်း ပြောကြားခဲ့ပါတယ်။

အမေရိကန်သံရုံး လူထုဆက်သွယ်ရး လက်ထောက်အရာရှိ Michael Quinlan ကလည်း လွတ်လပ်စွာပြောဆိုခွင့်ကို ဥပဒေနဲ့ သတ်မှတ်ဖို့လိုအပ်ပြီး၊ တရားရေးစနစ်ကလည်း စောင့်ကြည့်နေရမှာဖြစ်ကြောင်း၊ လူမှုရေး၊ ဘာသာရေး သွေးထိုးလှုံ့ဆော်တာ၊ အသရေပျက်အောင် စော်ကားရေးသားတွေဟာ လက်ခံနိုင်စရာမရှိကြောင်း ပြောကြားခဲ့ပါတယ်။

ဒီဆွေးနွေးပွဲမှာ လွတ်လပ်စွာထုတ်ဖေါ်ပြောဆိုခွင့်ရဲ့ အနက်အဓိပ္ပါယ်နဲ့ သဘောသဘာဝ၊ မီဒီယာလွတ်လပ်မှုနဲ့ မြန်မာနိုင်ငံ အခြေအနေ၊ ဆင်ဆာပြဿနာ စတာတွေကို အဓိကဆွေးနွေးခဲ့ကြပါတယ်။ ဒီပွဲကို ကျောင်းသူကျောင်းသားတွေ၊ စာရေးဆရာ အယ်ဒီတာတွေနဲ့ ဘလော့ဂါတွေ စုစုပေါင်း လူ ၃၀၀ ၀န်းကျင် တက်ရောက်ခဲ့ကြပါတယ်။

RFA Burmese