နိုင်ငံခြားသားများ ကျူးလွန်သည့် ရာဇ၀တ်မှုခင်းနှင့် လိမ်လည်မှုပိုများလာ

ရန်ကုန်၊ နိုဝင်ဘာ-၄

နိုင်ငံတကာနှင့် ဆက်သွယ်မှု များပြားလာ သည်နှင့်အမျှ နိုင်ငံခြားသားများ၏ ရာဇ၀တ်မှု ကျူးလွန်မှုများ တစ်နေ့တခြား များပြားလာကာ တရားစွဲဆို အရေးယူမှု များလည်း များပြားလာရသည်ဟု မြန်မာနိုင်ငံ ရဲတပ်ဖွဲ့နှင့် တရားရေး ၀န်ထမ်းများထံမှ သတင်းရရှိသည်။

ယခုနှစ်ပိုင်းတွင် နိုင်ငံခြားသားများ ကျူးလွန်သော ပြစ်မှုများသည် လူဝင်မှု ကြီးကြပ်ရေး ဥပဒေကို ဖောက်ဖျက်ခြင်းများ ရှိသကဲ့သို့ လိမ်လည်မှု၊ ကိုယ်ထိလက်ရောက် စော်ကားမှုစသည့် ရာဇ၀တ်မှုများဖြင့် အရေးယူရခြင်းများ ရှိလာကြောင်း သိရသည်။

နိုင်ငံခြားသားပိုင် စက်ရုံများ မှ အကြီးတန်း ၀န်ထမ်းများက မြန်မာဝန်ထမ်းများကို ကိုယ်ထိလက်ရောက်စော်ကားခြင်း၊ ဧည့်သည်က ဟိုတယ်ဝန်ထမ်းကို ကိုယ်ထိလက်ရောက် စော်ကားခြင်း စသည်များအပြင် ရာဇ၀တ်မှုခင်းများနှင့် လိမ်လည်မှုများ ပါရှိလာခဲ့ခြင်း ဖြစ်သည်။

လှိုင်သာယာမြို့နယ် စက်မှုဇုန်(၄) ရှိ ဟိုင်မိုဆံပင်တုစက်ရုံတွင် ကိုရီးယားလူမျိုးအရာရှိနှင့် စက်ရုံအလုပ်သမားများကြား အငြင်းပွားမှု ဖြစ်ပွားရာမှ ရုန်းရင်းဆန်ခတ် ဖြစ်ပွားခဲ့သဖြင့် ကိုရီးယားလူမျိုးကို အလုပ်သမား ၁၅ ဦးက ကာယိနြေ္ဒထိခိုက်မှုနှင့် သာမန်နာကျင်မှု အမှုနှစ်မှုဖြင့် အမှုဖွင့်တရားစွဲဆိုခဲ့သည်။ ထို့အပြင် ဂျပန်နိုင်ငံသား ဧည့်သည်တစ်ဦးက ဟိုတယ်ဧည့်ကြိုဝန်ထမ်းတစ်ဦးအား ကိုယ်ထိလက်ရောက်ကျူးလွန်ခဲ့ရာ အဆိုပါ အမှုတွင် ဧည့်ကြိုအမျိုးသမီးက တရားစွဲဆိုမှုတွင် ဆယ်လတိတိ နှစ်ဦးနှစ်ဖက် အပြန်အလှန်တရားစွဲဆိုကြပြီး ဂျပန်နိုင်ငံသားက တောင်းပန်ကြေး ကျပ်သိန်း ၁၀၀ ပေး၍ အမှုအား ရုပ်သိမ်းခဲ့ကာ လက်ရှိတွင် ဂျပန်နိုင်ငံသားမှာ ပုဇွန်တောင်မြို့နယ် လ၀ကဦးစီးမှူးက ဖွင့်ထားသည့် လ၀က ဥပဒေချိုးဖောက်မှုဖြင့် အမှုဆက်လက်ရင်ဆိုင်လျက်ရှိသည်ဟု ဧည့်ကြိုအမျိုးသမီးဘက်မှ အမှုလိုက်ရှေ့နေဦးဝင်းနိုင်က ပြောသည်။

“ဖြစ်ပြီးတဲ့ကိစ္စကို ပြန်လည် မပြောချင်တော့ပါဘူး။ ဧည့်သည်က မူးနေတယ်လေ။ နောက်ပြီး သူခေါ်လာတဲ့ ကောင်မလေးကို ကျွန်မတို့က ပေးမ၀င်တော့ ပြဿနာက ပိုကြီးထွားသွားတာပါ” ဟု Orchid ဟိုတယ်မှ ဧည့်ကြိုအမျိုးသမီး မအေးအေးကြည်က ပြောသည်။

မည်သည့် နိုင်ငံခြားသား တစ်ဦးကိုမဆို နိုင်ငံတော်မှ ထုတ်ပြန်ထားသော ဥပဒေတစ်ရပ်ရပ်ကို ချိုးဖောက်ပါက အပြစ်ပေး အရေးယူပိုင်ခွင့်ရှိပြီး ရာဇ၀တ်မှုနှင့်သက်ဆိုင်သော ပြစ်မှုများကိုကျူးလွန်ပါက ပြည်တွင်းတရားရုံးများတွင် တရားစွဲဆိုဆုံးဖြတ်ကာ အပြစ်ပေးပိုင်ခွင့်ရှိသည်ဟု မြန်မာနိုင်ငံရဲတပ်ဖွဲ့ တာဝန်ရှိသူက ပြောကြားသည်။

သို့ရာတွင် နိုင်ငံအချင်းချင်း ချစ်ခင်ရင်းနှီးမှု မပျက်စေရန်၊ ရန်လိုစိတ်များ မဖြစ်စေရန်အတွက် ပြစ်ဒဏ်စီရင်ရာတွင် လျှော့ပေါ့ခြင်းများ၊
ဥပမာအားဖြင့် ထောင်ဒဏ်ချမှတ်သော်လည်း သတ်မှတ်ပြစ်ဒဏ်အပြည့်အ၀ မခံစားရဘဲ သက်ဆိုင်ရာ နိုင်ငံသို့ လွှဲပြောင်းပေးခြင်းမျိုးလည်း ရှိသည်ဟု တရားလွှတ်တော်ရှေ့နေ ဦးခင်ဇော် (မရမ်းကုန်း)က ဆိုသည်။

“ခုက နိုင်ငံခြားသားတွေဝင်လာပြီ။ ကောင်းတာရော၊မကောင်းတာရော ပါလာမယ်။ ဒါကြောင့် ကိုယ့်နိုင်ငံသားတွေ အထူးသဖြင့်
အမျိုးသမီးတွေအပေါ် ကိုယ်ထိလက်ရောက် မတရားကျူးလွန်လာရင် ပြင်းပြင်းထန်ထန် အရေးယူပြပြီး ဒါမျိုးဒီမှာ အလုပ်မရဘူးဆိုတာ သိအောင်လုပ်ထားရမယ်” ဟု ပြည်ပရောက် နိုင်ငံရေးလေ့လာသူတစ်ဦးက ပြောသည်။

၂၀၁၁ နှင့် ၂၀၁၂ ခုနှစ်များအတွင်းကလည်း ရန်ကုန်နှင့် မန္တလေးမြို့ကြီးများတွင် တရုတ်နိုင်ငံသားအချို့က ဖုန်းဟန်းဆက် အဟောင်းများအား မြို့အတွင်း လူစည်ကားရာနေရာများ၊ လက်ဖက်ရည်ဆိုင်တို့တွင် လိမ်လည်ရောင်းချသည့် ဖြစ်စဉ်အချို့ ဖြစ်ပွားခဲ့ပြီး ယင်းကိစ္စများတွင် တိုင်တန်းခြင်း မရှိခဲ့သောကြောင့် အဆိုပါ အဖွဲ့သည် အရေးယူမှုမခံရဘဲ လိမ်လည်မှုအကြိမ်ရေ အများအပြား ကျူးလွန်နိုင်ခဲ့သည်။ နိုင်ငံသားများအပေါ် နိုင်ငံခြားသားများက ပြစ်မှုကျူးလွန်ခြင်း ဖြစ်ပွားရာတွင် နိုင်ငံသားများက တိုင်တန်းမှုနည်းပြီး ထိုသို့ ဖြစ်ရခြင်းမှာလည်း နိုင်ငံသားတို့က ၎င်းတို့နှင့် ရင်ဆိုင်ရမည့် သူ၏ဓနအင်အားကြောင့်ဖြစ်စေ ဖြစ်ပြီးသမျှ အရှည်ရှည် မလုပ်လိုကြသည်ကတစ်ကြောင်းကြောင့် ဖြစ်သည်ဟု တရားရေးဝန်ထမ်းများက သုံးသပ်ပြောကြားသည်။

နိုင်ငံခြားသားများအား ပြစ်မှုကျူးလွန်၍ ပြစ်ဒဏ်ပေးရာတွင် ထိရောက်စွာ အရေးယူနိုင်ရန်လိုအပ်ပြီး ထိရောက်စွာ ပြစ်ဒဏ်မချမှတ်နိုင်ပါက ပြစ်မှုကျူးလွန်ခြင်းကို အားပေးရာရောက်သည်ဟု ရှေ့နေဦးခင်ဇော်(မရမ်းကုန်း)က ပြောသည်။

ပြစ်မှုဆိုင်ရာ ကျင့်ထုံးဥပဒေ နှင့် ပြစ်မှုဆိုင်ရာဥပဒေတို့တွင် ဥပဒေသည် နိုင်ငံသား၊ နိုင်ငံခြားသား မခွဲခြားဘဲ အရေးယူရမည်ဆိုသော်လည်း နိုင်ငံခြားသားဖြစ်သည့်အတွက် ပြစ်ဒဏ်လျှော့ပေါ့ခြင်းမျိုးများလည်းရှိသည်ဟု တရားရုံးရှေ့နေတစ်ဦးက ပြောသည်။

နိုင်ငံခြားသားများ ကျူးလွန်သော ပြစ်မှုများသည် ရာဇ၀တ်မှုမဟုတ်ဘဲ တရားမ၀င် လူပုဂ္ဂိုလ်အသင်းအဖွဲ့များနှင့် ဆက်သွယ်ခြင်းများ ပြုလုပ်ပါက ပြည်နှင်ဒဏ်ပေးဆောင်ရွက်သည်ဟု မြန်မာနိုင်ငံ ရဲတပ်ဖွဲ့တာဝန်ရှိသူက ပြောကြားသည်။

ယခုနှစ်အတွင်း ဖြစ်ပွားခဲ့သော ဂျပန်နိုင်ငံသားနှင့် ဧည့်ကြိုအမျိုးသမီးပုံစံနှင့် အလားတူ ပြီးခဲ့သည့် နှစ်ဆန်းပိုင်းက ဖြစ်ပွားခဲ့သော အင်းလျားလိတ်ဟိုတယ်၌ ပြင်သစ်နိုင်ငံသားတစ်ဦးနှင့် ဧည့်ကြိုကောင်တာရှိ ဟိုတယ်အမျိုးသမီးဝန်ထမ်းတစ်ဦးတို့သည် ကြွေးဝယ်ကတ်နှင့် ပတ်သက်၍ အငြင်းပွားခဲ့ကြသည်။ ဟိုတယ်ဝန်ထမ်းအမျိုးသမီးက ပြင်သစ်နိုင်ငံသားအား ငွေသားပါဝင်မှု မရှိဟု ပြောကြားရာမှ နှစ်ဖက်အချင်းများပြီး ပြင်သစ်နိုင်ငံသားက ကိုယ်ထိလက်ရောက် စော်ကားခဲ့သည်။ ယင်းအမှုမှာ တစ်နှစ်ကျော်ကြာခဲ့ကာ ဟိုတယ်ဝန်ထမ်းအမျိုးသမီးက အမှုကိုပြန်လည်ရုပ်သိမ်းခဲ့သည့် ဖြစ်စဉ်မျိုး ဖြစ်ပေါ်ခဲ့ဖူးသည်။

“နိုင်ငံခြားသားတွေနဲ့ဆက်နွှယ်နေတဲ့ ဟိုတယ်လုပ်ငန်းတွေ၊ ခရီးသွားလုပ်ငန်းတွေမှာ အရင်တုန်းက ဒီလိုပြဿနာတွေ ခဏခဏဖြစ်ဖူးတယ်။ လေဆိပ်က ၀န်ထမ်းတစ်ဦးဆို ဆွဲလားရမ်းလားအထိ ဖြစ်ဖူးပေမယ့် နောက်ရက်မှာ နိုင်ငံခြားသားက ပြန်ပြီးလာတောင်းပန်သွားတယ်” ဟု တရားရုံး ရှေ့နေဦးသန်းလွင်က ပြောကြားသည်။

မြန်မာနိုင်ငံတွင်း ရောက်ရှိလာသူ နိုင်ငံခြားသားအားလုံးတွင် ရာဇ၀တ်မှု(သို့မဟုတ်)နိုင်ငံတော်မှ ထုတ်ပြန်ထားသော ဥပဒေတစ်ရပ်ရပ်ကို ဖောက်ဖျက်ကျူးလွန်ရန် ရည်ရွယ်ချက်နှင့် ၀င်ရောက်လာသူများ ရှိ၊ မရှိ စိစစ်ရန်အတွက် နိုင်ငံခြားသားများ ကြီးကြပ်ထိန်းသိမ်း စောင့်ရှောက်ရေးကော်မတီကိုလည်း ဖွဲ့စည်းထားသည်။ အဆိုပါ ကော်မတီသည် ပြည်ပတွင် ဗီဇာထုတ်ပေးခြင်း၊ နိုင်ငံတော်သို့ လေဆိပ်၊ ရေဆိပ်၊ နယ်စပ်စစ်ဆေးရေး ဂိတ်များမှ ၀င်ရောက်စဉ် စစ်ဆေးခြင်း၊ နိုင်ငံတော်အတွင်းရှိနေစဉ် စိစစ်ခြင်းတို့ကို လုပ်ဆောင်ကြောင်းသိရသည်။နိုင်ငံအတွင်း စိစစ်ရာတွင် ဗီဇာစည်းကမ်းအတိုင်း နေထိုင်မှုရှိမရှိ၊ ခရီးသွားလာမှုကန့်သတ်ချက်များ ဖောက်ဖျက်မှု ရှိ၊ မရှိ၊ သံရုံးများတွင် ဖွင့်လှစ်ထားသော စင်တာများ၌ နိုင်ငံရေး စွက်ဖက်မှုရှိမရှိ၊ အင်န်ဂျီအို၊ အိုင်အင်န်ဂျီအိုများမှ ဆန့်ကျင်လုပ်ဆောင်၊ သွားလာမှုများ ရှိမရှိ၊ ၀န်ကြီးဌာနမှ ထောက်ခံခေါ်ယူထားသော ဗီဇာအသီးသီးဖြင့် ၀င်ရောက်လာသူများ ဗီဇာစည်းကမ်း ဖောက်ဖျက်ခြင်း ရှိမရှိ၊ ကမ္ဘာလှည့်ခရီးသည်များမှ နယ်စပ်ဖြတ်ကျော်မှုခင်းနှင့် Tourism Related Crime များ ကျူးလွန်ခြင်းရှိမရှိတို့ကို ပြုလုပ်ကြောင်းလည်း သတင်းရရှိသည်။

7Day News Journal