ချောက်မြို့တွင် ဟိုက်ဒရိုဂျင်ပါအောက်ဆိုက်စက်ရုံ မီးလောင်မှုဖြစ်ပွား

(ပုံမှာ ပေါက်ကွဲမှုဖြစ်ပွားခဲ့သည့် စက်ရုံအတွင်းနေရာကိုတွေ့ရစဉ်။)  ဓါတ်ပုံ -   Yangon Media Group 

ချောက် သြဂုတ်၂။
ချောက်မြို့တွင် လည်ပတ်နေသော စက်မှုဝန်ကြီးဌာန စက္ကူနှင့် အိမ်သုံးပစ္စည်းလုပ်ငန်းလက်အောက်ရှိ ဟိုက်ဒရိုဂျင်ပါအောက်ဆိုက်စက်ရုံသည် သဘာဝဓါတ်ငွေ့ကိုအသုံးပြုလျက် ပုံမှန်ထုတ်လုပ်မှုလုပ်ငန်း များဆောင်ရွက်နေစဉ် သြဂုတ် ၂ရက် နေ့လည် ၁၂နာရီ ၅၀မိနစ်တွင် Main Unit ရှိ Oxidation Tower မှ ပုံမှန်မဟုတ်သော ထူးခြားသည့် အသံကြီးပေါ်ထွက်လာပြီးနောက် ဟိုက်ဒရိုဂျင်ပါဝင်သော ဓာတုအရည်များ (working solution) အောက်သို့စီးကျကာ ပေါက်ကွဲမှု (၃)ကြိမ် ဖြစ်ပေါ်၍ မီးလောင်မှုဖြစ်ပွားခဲ့ကြောင်း သက်ဆိုင်ရာမှသတင်းရရှိသည်။

မီးလောင်မှုဖြစ်ပွားရာသို့ ချောက်၊ညောင်ဦးနှင့် ကျောက်ပန်းတောင်းမြို့တို့မှ မီးသတ်ကားများရောက်ရှိလာပြီး မီးငြိမ်းသတ်ခဲ့ရာ ညနေ ၄နာရီခွဲခန့်တွင် မီးကိုထိန်းနိုင်ခဲ့ပြီး ညနေခြောက်နာရီတွင် မီးငြိမ်းသတ်နိုင်ခဲ့ကြောင်း တာဝန်ရှိသူတစ်ဦးက ရန်ကုန်မီဒီယာသို့ပြောကြားသည်။

မီးလောင်မှုဖြစ်စဉ်ကြောင့် စက်ရုံဝန်ထမ်း (၅)ဦးနှင့် မီးသတ်ဝန်ထမ်း (၁)ဦးတို့ အနည်းငယ်ဒဏ်ရာရရှိသွားကြပြီး ဓာတုအရည်ထိမှန်သည့် ၀န်ထမ်းတစ်ဦးကို ချောက်မြို့ပြည်သူ့ဆေးရုံတွင် တင်ပို့ထာ့းကြောင်း စက်မှုဝန်ကြီးဌာနမှ အရာရှိတစ်ဦးက အတည်ပြုပြောကြားသည်။

မီးလောင်မှုကြောင့် စက်ရုံအတွင်းရှိ အခြားအဆောက်အဦများ ပျက်စီးမှုမရှိသော်လည်း ပေါက်ကွဲမှုအရှိန်ကြောင့် ပြတင်းပေါက်မှန်များ ကွဲအက်ပျက်စီးသွားကြောင်းသိရှိရသည်။
မီးလောင်မှုဖြစ်ပွားသည့် အဆိုပါစက်ရုံသို့ နေပြည်တော်ရှိ စက်မှုဝန်ကြီးဌာနမှ တာဝန်ရှိသူများ ရောက်ရှိနေပြီး လိုအပ်သည်များ ဆောင်ရွက်ပေးလျက်ရှိနေကြောင်း စက်မှုဝန်ကြီးဌာနမှသတင်းရရှိသည်။

by Yangon Media Group

(ပုံမှာ ပေါက်ကွဲမှုဖြစ်ပွားခဲ့သည့် စက်ရုံအတွင်းနေရာကိုတွေ့ရစဉ်။)