မြန်မာ့သစ်လုပ်ငန်း ပြည်ပရောင်း/စက်ဌာနကြီး မသမာမှုအား တိုင်ကြားခြင်း

အယ်ဒီတာခင်ဗျား

၁။ နိုင်ငံပိုင်သစ်စက်များ/သစ်လုံးဆိပ်များတွင် အကြောင်းအမျိုးမျိုးကြောင့် နိုင်ငံပိုင်ပစ္စည်းများ မီးလောင်ပျက်စီးဆုံးရှုံးမှုများရှိခဲ့ပါက အထက်သို့တင်ပြရန်မလိုပဲ တာဝန်ရှိသူများအနေဖြင့် ရဲစခန်းသို့ တိုက်ရိုက်သွားရောက်အဖမ်းခံကြရန် ပတ်ဝန်းကျင်ထိမ်းသိန်းရေးနှင့်သစ်တောရေးရာဝန်ကြီးဌာန(ယခင်သစ်တောရေးရာဝန်ကြီးဌာန)မှ အငြိမ်းစားဝန်ကြီးတစ်ဦးက မိန့်ကြားခဲ့ဘူးသည်ကို ယနေ့အချိန်တွင် အသက်(၅၀)ဝန်းကျင်ရှိနေပြီဖြစ်သော တာဝန်ထမ်းဆောင်ဆဲ သစ်တောဌာနဝန်ထမ်းအားလုံးလိုလို သိရှိမှတ်သားခဲ့ဘူးပြီးဖြစ်ပါလိမ့်မည်။

၂။ သို့ပါသော်လည်း(၂၆-၃-၂၀၁၂)ရက်နေ့မှ (၂၇-၃-၂၀၁၂)ရက်နေ့အထိ လောင်ကျွမ်းခဲ့သော သံလျင်မြို့နယ် သီလဝါသစ်လုံးဆိပ်ရှိ နိုင်ငံပိုင်ကျွန်းနှင့်သစ်မာ သစ်လုံးတန်(၇၀၀၀)နီးပါး (တန်ဖိုး အမေရိကန်ဒေါ်လာ ၅.၅ သန်း) မီးလောင်ပျက်စီးဆုံးရှုံးမှုတွင် တာဝန်ရှိ ဝန်ထမ်းကြီး/ငယ်များအား ယနေ့အထိ တစ်ဦးတစ်ယောက်မျှ အရေးယူခြင်း/အပြစ်ပေးခြင်း မပြုလုပ်ခဲ့ပါ။
အဓိကတာဝန်ရှိသစ်ဆိပ်တာဝန်ခံ(၃)ဦးအနက် (၁)ဦးအား ရာထူးတိုးမြှင့်ပေးလိုက်ခြင်း၊ကျန်(၁)ဦးအား အပိုဝင်ငွေ(အောက်ဆိုဒ်) ရရှိသော ဌာနများသို့ ဆက်လက်ပြောင်းရွှေ့ပေးလိုက်ပြီး တာဝန်ရှိမန်နေဂျာ(၃)ဦးအားလည်း ယနေ့အထိ လုံးဝအရေးယူမှု မရှိခဲ့ပါ။ သို့ပါ၍  ဌာနရှိဝန်ထမ်းများနှင့် သစ်ကုမ္ပဏီအသီးသီးမှ ပုဂ္ဂိုလ်များက သီလဝါသစ်လုံးဆိပ်ရှိ နိုင်ငံပိုင်သစ်လုံး ဒေါ်လာ(၅.၅)သန်းဖိုး မီးလောင်ပျက်ဆီးဆုံးရှုံးမှုတွင် တာဝန်ရှိသူတစ်ဦးတစ်ယောက် အရေးယူခံရခြင်း/အပြစ်ပေးခံရခြင်း မရှိသည့်ကိစ္စအား အထက်လူကြီးများမှ အမှန်တကယ် မသိကြခြင်းလော၊အိပ်ပျော်နေကြသလော စသည်ဖြင့် ယနေ့ထက်တိုင် သို့လောသို့လောနှင့် ပြောဆိုဝေဖန်လျှက် ရှိနေဆဲဖြစ်ပါသည်။ 

၃။ နိုင်ငံတော်သမ္မတကြီး၊ဒုသမ္မတကြီးနှင့်ပြည်သူ့လွှတ်တော်ဥက္ကဌကြီး အပါအဝင် အကြီးအကဲအားလုံးက Clean Government၊Good Government ဖြစ်ရေး၊လာဘ်ပေးလာဘ်ယူပပျောက်ကင်းစင်ရေးနှင့် ပွင့်လင်းမြင်သာသောအစိုးရ၊ဌာနဖြစ်စေရေးအတွက် အချိန်တိုင်း၊နေရာတိုင်းတွင် လမ်းညွန်မိန့်ကြားလျှက်ရှိသော်လည်း ပတ်ဝန်းကျင်ထိမ်းသိန်းရေးနှင့်သစ်တောရေးရာဝန်ကြီးဌာန မြန်မာ့သစ်လုပ်ငန်း ပြည်ပရောင်း/စက်ဌာနကြီး လက်အောက်ရှိ သီလဝါသစ်လုံးဆိပ်မှ နိုင်ငံပိုင်သစ်လုံးများ မီးလောင်ဆုံးရှုံးမှုတွင် ပွင့်လင်းမြင်သာမှုမရှိပဲ ထိမ်ချန်ဖုံးကွယ်ထားမှုအား ဖော်ထုတ်အရေးယူပေးပါရန် အယ်ဒီတာမှတဆင့် တင်ပြလိုက်ရပါသည်။


အငြိမ်းစားသစ်တောဝန်ထမ်းတစ်ဦး