မြန်မာနိုင်ငံ၌ ဆင်ကောင်ရေ လျော့ကျလာ

ကချင်ပြည်နယ် ပူတာအိုမြို့နယ်အတွင်း လုပ်ငန်းခွင်တွင် အသုံးပြုသော
ဆင်တစ်ကောင်ကို တွေ့မြင်ရစဉ် (ဓါတ်ပုံ-Eleven Media Group)

သစ်တောပြုန်းတီးမှု မြင့်တက်လာခြင်းအပြင် တိရစ္ဆာန်ထွက်ပစ္စည်း များ တရားမ၀င် ရောင်းချမှုများကြောင့် မြန်မာနိုင်ငံတွင် ဆင်ကောင် ရေလျော့ကျလာကြောင်း သတင်းရရှိ ပါသည်။ မြန်မာနိုင်ငံသည် အာရှဒေသတွင် အာရှဆင်များ အဓိက ကျက်စားရာနိုင်ငံများ၌ အပါအ၀င်ဖြစ်နေပြီး သစ်လုပ်ငန်းသုံးဆင်များ၊ ပုဂ္ဂလိကပိုင်ဆင်များနှင့် တောဆင်များ ဟူ၍ရှိနေသည်။

“လွန်ခဲ့တဲ့ ၁၀ နှစ်လောက်က ထုတ်တဲ့ စာအုပ်တွေအရတော့ အကောင်ရေ ၃၀၀၀ လောက်ဆိုတာ သိရတယ်။ တောဆင်လည်း ခန့်မှန်း ခြေ ၃၀၀၀ လောက်ဆိုတာ ဖတ်ဖူးတယ်။ ဒါပေမယ့် ဒီကနေ့ အခြေအနေမှာတော့ အဲဒီထက် လျော့နည်း သွားပြီဆိုတာတော့ ကျိန်းသေတယ် လို့ ယူဆတယ်”ဟု မြန်မာငှက်နှင့် သဘာဝပတ်ဝန်းကျင် ထိန်းသိမ်းရေးအသင်းမှ အမှုဆောင်အဖွဲ့ဝင် ဦးခင်မောင်ကြီးက Eleven Media Group ကို ပြောကြားသည်။

မြန်မာ၊ ထိုင်း၊ အိန္ဒိယ၊ သီရိ လင်္ကာ စသည့် အာရှဆင်များ အဓိက တွေ့ရှိရာ နိုင်ငံလေးနိုင်ငံမှ ဆင်များအကြောင်းကို ပြင်သစ်နိုင်ငံမှ မှတ်တမ်းတင် ရုပ်ရှင်ရိုက်ကူးရာတွင် မြန်မာနိုင်ငံရှိ သစ်ထုတ်လုပ်ရေး နယ်မြေများ၊ ဆင်များ ကျက်စားရာ နယ်မြေများ စသည်တို့တွင် မှတ်တမ်းတင်ခဲ့ရာ၌ လိုက်ပါခဲ့သည့်ခရီး စဉ်မှ တွေ့ရှိမှုများပေါ် အခြေခံကာ ၎င်းက ရှင်းလင်းပြောကြားခဲ့ခြင်း ဖြစ်သည်။

“ဘာဖြစ်လို့လဲဆိုတော့ ခရီးစဉ်တစ်လျှောက်လုံးမှာ ဆင်ဆရာဝန်တွေနဲ့လည်း တွေ့ရတယ်။ ဆင်ဆရာတွေက သစ်ထုတ်ရေးက ဆင်တွေကို စောင့်ရှောက်ရသလို တောရိုင်းဆင်တွေကိုလည်း သူတို့မေ့ဆေးနဲ့ ဖမ်းတော့လည်း သူတို့ သစ်ထုတ်ရေးကအဖွဲ့တွေပဲ ဖမ်းရတယ်။ အဲဒီလို ဖမ်းဖမ်းလာတာတွေရယ်၊ နောက် နေ့စဉ်နဲ့အမျှ ဘယ်နေရာမှာတော့ ဘယ်ဆင်သေသွားပြန်ပြီ၊ ဘယ်နေရာမှာတော့ ဘယ်ဆင် ဘယ်လိုဖြစ်လို့ သေသွားပြန်ပြီ။ ဘယ်နေရာမှာတော့ ဘယ်တောဆင် တွေ သေပြီးတော့ အစွယ်ဖြတ်ခံထားရပြီးတော့ ပုပ်ပွနေတာတွေ့ရတယ်။ ဒီလိုသတင်းတွေက ကြားရသိရတာ တွေရှိတယ်။ ကိုယ်တိုင်တွေ့ရတာ ရှိတယ်”ဟု ဦးခင်မောင်ကြီးက ပြော ကြားခဲ့သည်။

မြန်မာနိုင်ငံတွင် လုံးဝကာကွယ်ထားသော တိရစ္ဆာန်များအဖြစ် ကျား၊ ဆင်၊ ကြံ့သူတော်၊ ရွှေသမင် အပါအ၀င် နို့တိုက်သတ္တ၀ါ ၃၉ မျိုးရှိ ကြောင်း သစ်တောဦးစီးဌာန၏ ထုတ်ပြန်ချက်များအရ သိရှိရသည်။

အပင်မျိုးစိတ် ၁၁၈၀၀၊ ကြိမ် မျိုးစိတ် ၃၇ မျိုး၊ ၀ါးမျိုးစိတ် ၉၆ မျိုး၊ ဆေးဘက်ဝင် အပင်များ ၈၄၁ မျိုး၊ နို့တိုက်သတ္တ၀ါများ ၂၅၁ မျိုး၊ တွားသွားသတ္တ၀ါ ၂၇၂ မျိုး၊ ကုန်းနေရေနေ သတ္တ၀ါများ ၈၂ မျိုး၊ ငှက် ၁၀၅၆ မျိုး၊ ပင်လယ်ငါး ၄၆၅ မျိုး တို့ကို ဒေသအသီးသီးတွင် တွေ့ရှိရသည်ဟု သိရှိရသည်။

လက်ရှိတွင်မူ အချို့သော တိရစ္ဆာန်မျိုးစိတ်များမှာ အကောင်ရေ လျော့ကျခြင်း၊ မျိုးသုဉ်းပျောက်ကွယ်လု အခြေအနေသို့ ရောက်ရှိခြင်းများကို ရင်ဆိုင်လာရသည်ဟု သိရှိရသည်။ တိရစ္ဆာန်မျိုးစိတ်များ လျော့ပါးပျောက်ကွယ် လာခြင်းသည် အဓိကအားဖြင့် ၎င်းတို့နေထိုင်ပေါက်ဖွားရှင်သန်ရာ သစ်တောမြေ နည်းပါးလာခြင်းကြောင့် ဖြစ်သည်ဟု သိရှိရကြောင်း Eleven Media Group အင်တာနက် စာမျက်နှာမှာ ရေးသားဖော်ပြထားပါသည်။

Eleven Media Group