ပရိသတ်ဦးရေ သိန်းကျော် တက်ရောက်ခဲ့သော ဒေါ်အောင်ဆန်းစုကြည်၏ မန္တလေး ခရီးစဉ်

photo - MT News

မန္တလေး၊ မတ် ၃

ကြားဖြတ် ရွေးကောက်ပွဲ အတွက် ဒေသ အနှံအပြားသို့ မဲဆွယ်စည်းရုံးရေး ခရီးများ မရပ်မနား ထွက်နေသော ဒေါ်အောင်ဆန်းစုကြည်သည် မြန်မာနိုင်ငံ အလယ်ပိုင်း မန္တလေးမြို့သို့ မတ်လ ၃ ရက်နေ့ မနက်ပိုင်းတွင် လေကြောင်းခရီးဖြင့် ရောက်ရှိလာခဲ့ရာ ဒေါ်အောင်ဆန်းစုကြည်၏ နိုင်ငံရေးခရီးစဉ်များတွင် စံချိန်တင်ရလောက် အောင် များပြားသည့် မန္တလေး မြို့ခံများက ကြိုဆိုခဲ့ကြသည်။

ဖေဖော်ဝါရီလ ၂၈ ရက်နေ့တွင် ဖွဲ့စည်းလိုက်သော မန္တလေးခရိုင် ကျောင်းသားများ သမဂ္ဂကလည်း ဒေါ်အောင်ဆန်းစုကြည်၏ မန္တလေး နိုင်ငံရေးစည်းရုံးရေး ခရီးစဉ်တွင် ဆိုင်းဘုတ်များ ကိုင်ဆောင်ကာ လိုက်ပါနေ ကြကြောင်း သတင်းထောက်က သတင်းပေးပို့သည်။ ကျောင်းသားအင်အား ၁၀၀ နီးပါး ပါဝင်ကြောင်း သိရသည်။

မန္တလေး တံတားဦးလေဆိပ်မှ လူထုဟောပြောပွဲ ပြုလုပ်မည့် အောင်ပင်လယ် (မြို့သစ်) သို့ သွားရောက်ရာ လမ်းတစ်လျှောက်တွင် လာရောက်ကြိုဆိုသူ ဦးရေမှာ လမ်းဘေးဝဲယာ နှစ်ဖက်စလုံးတွင် ပြည့်ကျပ်ညပ်နေပြီး ဒေါ်အောင်ဆန်းစုကြည် ယာဉ်တန်းနှင့်အတူ လိုက်ပါလာသော ကားတန်းနှင့် ဆိုင်ကယ်တန်းမှာ ရန်ကုန် မန္တလေး အမြန်လမ်းမကြီး တံခွန်တိုင်အဝိုင်းမှ သိပံ္ပလမ်း အထိပင် တိုးမပေါက်နိုင်အောင် ရှိကြောင်း ၊ ကြိုဆိုကြသူများတွင် ကမ္ဘာလှည့် ခရီးသွားများပင် ပါဝင်နေကြောင်း The Voice Weekly မန္တလေး သတင်းထောက်များထံက သိရသည်။

ပူပြင်းခြောက်သွေ့သော မြန်မာနိုင်ငံ အလယ်ပိုင်း မန္တလေးမြို့မှာ တပေါင်းလ၏ နွေနံနက်ခင်း ဖြစ်သော်လည်း နိုဘယ်လ် ငြိမ်းချမ်းရေး ဆုရှင် ဒေါ်အောင်ဆန်းစုကြည် ရောက်ရှိလာချိန်တွင် မိုးအုံနေပြီး လူထုဟောပြောပွဲ ပြုလုပ်မည့် မြို့သစ်သို့ သွားရောက်ချိန်တွင်ပင် မိုးများ ရွာသွန်းလျက် ရှိကြောင်း ၊ တံတားဦး လေဆိပ်မှ မြို့သစ်သို့ သွားရောက်ရာတွင် ပုံမှန် မိနစ် လေးဆယ်ခန့်သာ သွားရောက်ရမည့် အချိန်ကို လာရောက် ကြိုဆိုသူ ဦးရေ အဆမတန် များပြားလာမှုကြောင့် လေးနာရီကျော် သွားရောက်ခဲ့ရပြီး အောင်ပင်လယ် သို့ ရောက်ရှိရန် မိနစ်ပိုင်း အချိန်တွင် ပုံမှန် မဟုတ်သော လျှပ်စစ်ဓာတ်အား ပြတ်တောက်မှု ဖြစ်ပေါ်ခဲ့ကြောင်း ဒေါ်အောင်ဆန်းစုကြည်၏ ခရီးစဉ်သို့ လိုက်ပါ သတင်းရယူသူ The Voice Weekly ဓာတ်ပုံ သတင်းထောက် တစ်ဦးက ပြောကြားသည်။

" ရာသီဥတု အေးအေးထဲမှာ နွေးနွေးထွေးထွေး ကြိုဆိုကြတဲ့ အတွက် ကျေးဇူးတင်ပါတယ်" " ဒီလောက်များတဲ့ လူထု မတွေ့ဖူးဘူး၊ ပြည်သူတွေ ဘာလိုချင်လဲ သိပါတယ်၊ စိတ်လုံခြုံမှု ရှိချင်တာပါ၊ စိတ်လုံခြုံမှု မရှိတာဟာ မလိုလားအပ်တဲ့ ဖိနှိပ်တဲ့ ဥပဒေတွေကြောင့် ဖြစ်တယ်၊ စိတ်လုံခြုံမှု ရှိဖို့ဆိုရင် တရားဥပဒေ စိုးမိုးရေးရှိဖို့ ဖြစ်တယ် " ဟု  ဒေါ်စုမှ လူထုမိန့်ခွန်းကို အစပြုခဲ့သည်။

" နားထောင်တဲ့ ပရိတ်သတ်တွေ အရမ်းမတိုးကြပါနဲ့။ အရမ်းတိုးရင် အပေါ်က ကြည့်ရင် လှိုင်းထသလို ဖြစ်ပြီး မူးပါတယ်။ အမေစုကို ချစ်ရင် အရမ်းမတိုးကြပါနဲ့ " ဟု လူထုခေါင်းဆောင် ဒေါ်စုက မန်းလူထု ပရိတ်သတ်သို့ ပြောကြားသည်။

" ကျွန်မ ဒီကို လာရတာကလည်း မန္တလေးက ပြည်သူတွေက ဖိတ်လို့ပါ၊ ရွေးကောက်ပွဲမှာ အောင်ပွဲခံနိုင်လို့ ရှိရင် မန်းပြည်သူတွေကို တစ်ခေါက်လာပြီး ကျေးဇူးဆပ်ပါ့မယ် " ဟု ဒေါ်စုမှ ပြောကြားသည်။

မန္တလေး ခရီးစဉ်၌ ဒေါ်အောင်ဆန်းစုကြည်သည် တံတားဦး လေဆိပ်မှ ဟောပြောပွဲ ကျင်းပမည့် အောင်ပင်လယ် ကစားကွင်းသို့ အချိန်ကြာမြင့်စွာ ကားစီးလာခဲ့ရခြင်းကြောင့် ပင်ပန်းနွမ်းနယ် နေသဖြင့် ၁၀ မိနစ်ခန့် အမှာစကား ပြောပြီးနောက် ဦးဝင်းတင်အား ခေတ္တအမှာစကား ပြောကြားပေးရန် အကူအညီ တောင်းခံခဲ့သည်။

ကြားဖြတ် ရွေးကောက်ပွဲတွင် NLD ဝင်ရောက် ယှဉ်ပြိုင်ရသည့် အကြောင်းအရင်း၊ တရားဥပဒေ စိုးမိုးရေး အကြောင်း၊ မန္တလေးသည် မြန်မာ့နိုင်ငံရေး အတွက် အရေးကြီးသော မြို့ဖြစ်ပြီး ကြားဖြတ် ရွေးကောက်ပွဲတွင် အောင်ပွဲခံ ခဲ့ပါက ကျေးဇူးဆပ်သည့် အနေဖြင့် မန္တလေးမြို့သို့ ထပ်မံ လာရောက်ဦးမည်ဟု ကတိပေး ပြောကြားခဲ့သည်။
The Voice Weekly