မြန်မာနိုင်ငံ စာပေနဲ့စာနယ်ဇင်းအဖွဲ့ ဖျက်သိမ်းမည်

မြန်မာနိုင်ငံ စာပေနဲ့စာနယ်ဇင်းအဖွဲ့ဟာ  အရေးပေါ်ညီလာခံတခု လာမယ့်ရက်တွေ အတွင်းမှာ ခေါ်ယူပြီးတော့၊ ဒီညီလာခံကနေ စာပေနဲ့စာနယ်ဇင်းအဖွဲ့ကို ဖျက်သိမ်းတော့မယ်လို့ အဖွဲ့ခေါင်းဆောင် တဦးက ပြောကြားလိုက်ပါတယ်။

မြန်မာနိုင်ငံရဲ့ တခုတည်းသော စာပေဆိုင်ရာ အဖွဲ့အစည်းဖြစ်တဲ့ မြန်မာနိုင်ငံ စာပေနဲ့စာနယ်ဇင်းအဖွဲ့ကို ဖျက်သိမ်းပြီး သက်ဆိုင်ရာလုပ်ငန်းတွေပေါ်ကို မူတည်ကာ မြန်မာနိုင်ငံ သတင်းစာဆရာများအသင်း၊ မြန်မာနိုင်ငံ စာရေးဆရာများအသင်းနဲ့ မြန်မာနိုင်ငံ ပုံနှိပ်ထုတ်ဝေဖြန့်ချိသူများ အသင်းဆိုပြီး သီးခြား လွတ်လပ်တဲ့  စာပေဆိုင်ရာအဖွဲ့အစည်း ၃ ဖွဲ့ ပေါ်လာတော့မယ်လို့ မြန်မာနိုင်ငံ စာပေနဲ့စာနယ်ဇင်းက တွဲဘက် အတွင်းရေးမှုး ဦးကိုကို (ကိုကို – စက်မှုတက္ကသိုလ်)က ပြောပါတယ်။

“မတ်လ နောက်ဆုံး အပတ်လောက်မှာ မြန်မာနိုင်ငံ စာပေစာနယ်ဇင်း အရေးပေါ် ညီလာခံလုပ်မယ်။ သတင်းစာထဲမှာလည်း ခေါ်ထားတယ်။ လောလောဆယ် မြန်မာနိုင်ငံစာရေးဆရာအသင်း၊ မြန်မာနိုင်ငံသတင်းစာဆရာ အသင်း၊ မြန်မာနိုင်ငံ ပုံနှိပ်ထုတ်ဝေဖြန့်ချိသူများ အသင်းဆိုပြီး အသင်း ၃ ဖွဲ့ ပြောင်းလဲတည်ထောင်ရန် ရှိပါတယ်။ သီးခြား အသင်းတွေ ဖြစ်တဲ့အတွက် အဲဒီ အသင်းတခုချင်းစီရဲ့ ဖွဲစည်းပုံစည်းမျဉ်းတွေ ရေးဆွဲနေပါတယ်။”

အသစ်ဖွဲ့ စည်းမယ့် စာနယ်ဇင်းဆိုင်ရာ အသင်း ၃ သင်းမှာ  မြန်မာနိုင်ငံစာပေနဲ့ စာနယ်ဇင်းအဖွဲ့က အမှုဆောင်တွေ ပြန်ပါလာမှာ မဟုတ်ဘဲ  ညီလာခံကနေ ရွေးချယ်ပြီး အမှုဆောင်သစ်တွေနဲ့ ပြန်လည် ဖွဲ့စည်းသွားမယ်လို့ ဦးကိုကိုက ဆက်ပြောပါတယ်။

လက်ရှိ မြန်မာနိုင်ငံစာပေနဲ့စာနယ်ဇင်းအဖွဲ့ကို ပြန်ကြားရေးဝန်ကြီးဌာနက ဦးဆောင်ပြီးတော့ ဖွဲ့စည်းထားတာ ဖြစ်ပြီး  ဌာနဆိုင်ရာတွေက အဆိုပြုထားတဲ့ ကိုယ်စားလှယ်တွေကို အမှုဆောင် အဖွဲ့ဝင်အဖြစ် ထည့်သွင်းထားရတာပါ။

နောင် ဖွဲ့စည်းမယ့် မြန်မာနိုင်ငံ သတင်းစာဆရာများ အသင်းကိုတော့ အစိုးရကိုယ်စားလှယ်တွေ မပါဝင်ဘဲ လွတ်လပ်တဲ့အဖွဲ့အစည်း ဖြစ်အောင် လုပ်ဆောင်မယ်လို့ သူက ဆက်ပြောပါတယ်။

သမ္မတ ဦးသိန်းစိန်ကလည်း စတုတ္ထမဏ္ဍိုင်တွေအနေနဲ့ ဒီမိုကရေစီ ကျင့်စဉ်နဲ့အညီ လွတ်လပ်မှုနဲ့ တာဝန်ယူမှုကို မျှမျှတတ ထိန်းကျောင်း ဆောင်ရွက်သွားနိုင်စေဖို့        အမျိုးသားစာနယ်ဇင်းကောင်စီ(အစက)ကို ထူထောင်သွားမယ်လို့ မတ်လ ၁ ရက်နေ့က အစိုးရအဖွဲ့ ၁ နှစ်ပြည့် နိုင်ငံတော်အခြေပြု မိန့်ခွန်းမှာ ထည့်သွင်း ပြောကြားသွားပါတယ်။ 

ဒီဗွီဘီ