ဒေါ်အောင်ဆန်းစုကြည် ကျန်းမာရေး ပြန်လည်ကောင်းမွန်

တနင်္သာရီတိုင်း မြိတ်မြို့နယ် မဲဆွယ်စည်းရုံးရေး ခရီးစဉ်အတွင်း ကျန်းမာရေး ချို့ယွင်းခဲ့သော အမျိုးသား ဒီမိုကရေစီ အဖွဲ့ချုပ် (NLD) ဥက္ကဌ ဒေါ်အောင်ဆန်းစုကြည်၏အခြေအနေမှာ တိုးတက် ကောင်းမွန်လာကြောင်း NLD က ယနေ့ ထုတ်ပြန်လိုက်သည်။

မြိတ် ခရီးစဉ်တွင် ဒေသခံများကို နှုတ်ဆက်နေသော ဒေါ်အောင်ဆန်းစုကြည် (ဓာတ်ပုံ - Aung Koe / Facebook)

ဒေါ်အောင်ဆန်းစုကြည်၏ ကျန်းမာရေးကို ယခင်လထဲက အထွေထွေ စမ်းသပ်မှုများပြုလုပ်ခဲ့ရာတွင် လုံးဝ ကောင်းမွန်ကြောင်း တွေ့ရှိရပြီး မြိတ်ခရီးစဉ်၌ ရေယာဉ်အခက်ခဲကြောင့် မော်တော်ဘုတ်ငယ်များဖြင့် နေပူထဲတွင် အချိန်ကြာမြင့်စွာသွားလာခဲ့ရ၍ ပင်ပန်း မှုဒဏ်ခံရသကဲ့သို့ အလုပ်ဖိစီးမှုဒဏ်နှင့် အားနည်းနေခြင်းတို့ကြောင့် နေထိုင်မကောင်း ဖြစ်ရကြောင်း ထုတ်ပြန်ချက်၌ ပါရှိသည်။
“ယခုအခါ ကျန်းမာရေးအခြေအနေမှာ တိုးတက်မှုရှိလာသော်လည်း ၄/၅ ရက် နားနေရန်လိုအပ်ကြောင်းလည်း မိသားစု ဆရာဝန် က အကြံပြုထားပါသည်”ဟု ကြေညာချက်၌ တွေ့ရှိရသည်။
NLD ရွေးကောက်ပွဲ ဗဟိုအောင်နိုင်ရေး ကော်မတီ ဥက္ကဋ္ဌ ဖြစ်သူ ဦးဉာဏ်ဝင်း ကလည်း “ကျန်းမာရေးအခြေအနေက ဒီနေ့တော့ ကောင်းသွားပါပြီဗျာ”ဟု ဧရာဝတီသို့ ပြောသည်။ ဒေါ်အောင်ဆန်းစုကြည်သည် ယခုလ ၃၁ ရက်နေ့တွင် သူ၏ မဲဆန္ဒနယ်မြေ ဖြစ်သော ကော့မှူးမြို့နယ် သို့သွားရောက်ရန်ရှိကြောင်းလည်း သိရသည်။
ကြားဖြတ်ရွေးကောက်ပွဲ မဲဆွယ်စည်းရုံးရေး အဖြစ် ယခုလ၂၄ ရက်နေ့က မြိတ်မြို့နယ် အတွင်း ရေကြောင်းခရီးဖြင့် သွားရောက် ရာတွင် မူးဝေ အော့အန်ခြင်းနှင့် ဝမ်းလျှော၊ ဝမ်းပျက် ဖြစ်ပွားခဲ့ပြီး နေအိမ်တွင် ဆေးကုသမှုခံယူကာ အနားယူနေရာမှ ယနေ့တွင် ပြန်လည် သက်သာလာခြင်းဖြစ်သည်ဟု NLDက ပြောသည်။
မြိတ်မြို့နယ်အတွင်း ရေကြောင်းဖြင့်သွားရောက်ရန် ပြင်ဆင်ထားရာ မူလက စီစဉ်ထားသော ရှပ်ပြေးစက်ရေယာဉ် ငှားရမ်း ထားမှုသည် အချိန်နီးကပ်မှ ပြောင်းလဲသွားခြင်းကြောင့် ရရာရေယာဉ်များနှင့် စီစဉ်ကာ ခရီးဆက်ခဲ့ရခြင်းကြောင့် ကျန်းမာရေး ထိခိုက်မှုဖြစ်ပွားခဲ့ရကြောင်း ခရီးစဉ်တွင် လိုက်ပါသွားသူ ဒေါ်အောင်ဆန်းစုကြည်၏ လုံခြုံရေးတာဝန်ခံ ဦးခွန်သာမြင့် က ပြောပြသည်။
“အရင်စီစဉ်ထားတဲ့ ရှပ်ပြေးက ဟိုရောက်ခါနီးကြမှ ဖိအားပေးခံရတယ်ဆိုပြီးတော့ ပိုင်ရှင်ကမငှားတော့ဘူးဆိုတော့၊ ကုန်တွေ တင် တဲ့ ကာဂိုမော်တော်ကြီးကို ယာယီအမိုးတွေမိုးပြီးတော့ သွားရတယ်။ ကာဂိုကလည်း လူစီးမဟုတ်တော့ ဒီဇယ်အနံ့ကြီးက နံတယ်။ ရှပ်ပြေးလိုလည်းမငြိမ့်ဘူးပေါ့။ လှိုင်းကလည်းမူးတော့ အဲဒီမှာ စ အန်တာပဲ”ဟု ဦးခွန်သာမြင့်က ဧရာဝတီသို့ ပြောသည်။
သူကဆက်လက်ပြီး“အခြေအနေကမကောင်းတော့ (မြိတ်) ကျွန်းစုခရီးစဉ်ကိုဖျက်ဖို့ အစ်မ(ဒေါ်အောင်ဆန်းစုကြည်)ကိုပြောတယ်။ သူကတော့ လူတွေကိုခေါ်ထားပြီးမှ မသွားလို့မဖြစ်ဘူးဆိုပြီး လုပ်နေတာ။ ကျန်းမာရေးအရ မနည်းဝိုင်းပြောရတာပေါ့။ အိမ်ရောက် တော့ အော့အန်တာတို့၊ ဝမ်းသွားတာ တို့ဖြစ်တာ ပေါ့။ နောက်ဆေးတွေ ဘာတွေသွင်းယူရတာပေါ့”ဟု ပြောဆိုသည်။
ဒေါ်အောင်ဆန်းစုကြည်၏ ကျန်းမာရေးအခြေအနေကြောင့် မိသားစု ဆရာဝန်ဒေါက်တာ တင်မျိုးဝင်း၏ အကြံပေးချက်အရ ယခုလ ၂၇-၂၈ ရက်နေ့များတွင် မကွေးမြို့၊ တောင်တွင်းကြီး၊ ကျောက်ပန်းတောင်းနှင့် နတ်မောက်မြို့ခရီးစဉ်များကို ဖျက်သိမ်းခဲ့ပြီး အနူးအညွှတ်တောင်းပန်ကြောင်း အဖွဲ့ချုပ်က ယမန်နေ့ကလည်း ကြေညာချက် ထုတ်ပြန်ခဲ့သည်။
အဆိုပါမြို့နယ်များရှိ မဲအောင်နိုင်ရေးအဖွဲ့များကလည်း ဒေါ်အောင်ဆန်းစုကြည် လာမည်ကို သက်ဆိုင်ရာမြို့နယ်များအတွင်း အသိ ပေး ကြေညာထားသကဲ့သို့ ပြင်ဆင်မှုများလည်းပြုလုပ်ထားကြောင်း၊ မလာဖြစ်တော့သည့်အတွက်ကိုလည်း တောင်းပန် စာများကို မြို့ပေါ်နှင့် ကျေးရွာများသို့ ပေးပို့ခဲ့ရကြောင်း စုံစမ်း သိရှိရသည်။
“ကျနော်တို့ကတော့ ထန်းတောထဲမှာ ဒေါ်စု စကားပြောဖို့ စင်အကြီးကြီးနဲ့ ကြိုဆိုမယ့်ဟာတွေအကုန်စီစဉ်ထားတာပေါ့။ ခုမလာဖြစ် တော့ ဒီဒေသခံတွေက ဒေါ်စု နေမကောင်းလို့ ဝမ်းနည်းစိတ်ပူသလို၊ သူတို့ဆီကိုမလာဖြစ်တဲ့အတွက်လည်း ဝမ်းနည်းနေကြတယ်” ဟု ကျောက်ပန်းတောင်းမြို့နယ် NLD မဲအောင်နိုင်ရေး တာဝန်ရှိသူ ကိုအေးခိုင် က ပြောပြသည်။
မြို့ပေါ်ရှိ ဈေးသူဈေးသားများနှင့် မြို့ခံများ၏ တောင်းဆိုချက်အရ ဒေါ်အောင်ဆန်းစုကြည် ကျန်းမာရေး ကောင်းမွန်ရန် ဆုတောင်း မေတ္တာပို့ပွဲကို မြို့တွင်းရှိ ဆုတောင်းပြည့်ဘုရားကြီး၌ ယနေ့ညနေ ၆ နာရီတွင် ကျင်းပရန် ကျောက်ပန်းတောင်းမြို့နယ် NLD က စီစဉ်ပေးထားသည်ဟုလည်း ဆိုသည်။
ကျောက်ပန်းတောင်းမြို့သို့ ရောက်ရှိလာလျှင် မိန့်ခွန်းပြောရန် ဆောက်လုပ်ပြင်ဆင်ထားသော မဏ္ဍပ်စင်အား ဒေါ်အောင်ဆန်းစုကြည် ကိုယ်တိုင် လာရောက်ဟောပြောပြီးသည်ထိ ထားရှိသွားရန် ဒေသခံများက တောင်းဆိုကြသဖြင့် မဖျက်သိမ်းဘဲ ထားရ သည်ဟု သိရသည်။
ကြားဖြတ်ရွေးကောက်ပွဲ၌ ကျောက်ပန်းတောင်းမြို့နယ်တွင် NLD နှင့် ကြံ့ခိုင်ရေးပါတီ နှစ်ပါတီသာ ဝင်ရောက်ရွေးချယ်ခံကြမည် ဖြစ်ကြောင်း၊ ယခုလ ၂၄ ရက်နေ့က ကြံ့ခိုင်ရေးပါတီဝင် တချို့က ဒေါ်အောင်ဆန်းစုကြည် ကို ဂုဏ်သိက္ခာအရ တိုက်ခိုက်သော ရုပ် ပုံ များ၊ မေးခွန်းများပါဝင်သော ဗီစီဒီနှင့် စာများကို ည အချိန်များတွင် ရပ်ကွက်များအတွင်း ဖြန့်ခဲ့သဖြင့် မြို့နယ်ကော်မရှင် ရုံးသို့ NLD က တိုင်ကြားထားကြောင်းလည်း ကိုအေးခိုင် က ပြောသည်။
“ဒေါ်အောင်ဆန်းစုကြည်က နိုင်ငံခြားသားကို ယူထားတယ်။ သူ့ကို မဲပေးရင် တိုင်းတပါးကျွန်ဖြစ်မယ်။ သူနဲ့ သူ့ခင်ပွန်းပုံတွေ ကို လည်း ဖိုတိုရှော့တွေနဲ့ ပြင်ထားပြီး လုပ်ထားတယ်ဗျ။ တချို့စာသားတွေက မကြားဝံ့၊ မပြောဝံ့တွေပါ ထည့်ထားတယ်ဗျာ။ မြို့နယ်ကော်မရှင်ကို တိုင်ထားတယ်”ဟု သူက ပြောဆိုသည်။
ကြားဖြတ်ရွေးကောက်ပွဲတွင် NLD နှင့် ကြံ့ခိုင်ရေးပါတီတို့က လစ်လပ်မဲဆန္ဒနယ်မြေ ၄၈ နေရာလုံးတွင် ဝင်ရောက် ရွေးချယ်ခံကြ မည်ဖြစ်ပြီး NLD ပါတီမှာ မဲဆွယ်စည်းရုံးရေးကာလတွင်၊ ပုဂ္ဂိုလ်ရေး ဂုဏ်သိက္ခာထိခိုက်စေမည့် တိုက်ခိုက်ခံရမှုများ ရှိသကဲ့သို့ ပါတီ ဆိုင်းဘုတ်များ ဖျက်ဆီးခံရခြင်း၊ ပါတီ ကိုယ်စားလှယ်များ ချောင်းမြောင်းတိုက်ခိုက်ခံရခြင်း၊ ခရီးစဉ်များ ကြန့်ကြာစေရန် ဟန့်တားခံရခြင်းများရှိကြောင်း ပါတီ ဗဟို မဲအောင်နိုင်ရေးအဖွဲ့က ထုတ်ပြန်ထားသည်။
ဧရာဝတီ