ဗန်းမော်မြို့နယ် မဲပေးခွင့်ရှိသူစာရင်း လွှဲမှားစွာထုတ်ပြန်

၅မတ်လ၂၀၁၂ — လာမည့်ကြားဖြတ်ရွေးကောက်ပွဲအတွက် မဲပေးခွင့်ရှိသူများစာရင်းကို ကချင်ပြည်နယ် ဗန်းမော်မြို့၌ မတ်လ ၁ရက်နေ့က ထုတ်ပြန်လိုက်ပြီး ၂၀၁၀ ခုနှစ် ရွေးကောက်ပွဲကာလက မဲပေးခွင့်ရှိသူများစာရင်း ဖြစ်နေကြောင်းသိရသည်။

ဒေါ်အောင်ဆန်းစုကြည် ဗန်းမော်မြို့စည်းရုံးရေးခရီးစဉ်အတွင်း ဗန်းမော်ကိုယ်စားလှယ်လောင်း ဦးဘမြင့်နှင့်အတူ တွေ့ရစဉ် ။ ဓါတ်ပုံ - MG သျှမ်းသံတော်ဆင့်

မြို့ပေါ်ရပ်ကွက်အုပ်ချုပ်ရေးရုံးများ၌ အဆိုပါစာရင်းကြေညာထားရာ ၂၀၁၀ ခုနှစ်က အသက် ၁၆နှစ်နှင့် ၁၇နှစ်အရွယ် လူငယ်များ ယခု အသက် ၁၈ နှစ်ပြည့်ပြီ ဖြစ်သော်လည်း မဲပေးခွင့်ရှိသူများစာရင်းတွင် အဆိုပါလူငယ်များအမည်စာရင်း ပါဝင်ခြင်းရှိကြောင်း သိရသည်။

ရပ်ကွက်များအတွင်းရှိ လူငယ်များက အဆိုပါစာရင်းကိစ္စကို NLD ရုံးသို့ လာရောက်ပြောကြားသဖြင့် သိရှိရကြောင်း ဗန်းမော်မြို့နယ် NLD အဖွဲ့ဝင်တစ်ဦးက သျှမ်းသံတော်ဆင့်သို့ ပြောသည်။

´´မတ်လ ၁ရက်နေ့က ရပ်ကွက်ရုံးတွင် မဲပေးပိုင်ခွင့်ရှိသူများစာရင်းထုတ်ပြန်ထားပြီလေ။ အဲဒီစာရင်းတွေက ၂၀၁၀ တုန်းက စာရင်းတွေဖြစ်နေတယ်။ အခုအသစ်ကောက်ယူထားတာမဟုတ်ဘူးပေါ့။ အဲဒီကြားမှာ သေသွားတဲ့သူတွေရှိမယ်။ ၁၈ နှစ်ပြည့်လာမဲ့သူတွေလည်းရှိမယ်ပေါ့။ အဲဒီစာရင်းတွေကို နှုတ်ထားတာ၊ တိုးထားတာတို့မရှိဘူးပေါ့။ လူငယ်တွေက လာပြောကြတယ်။ ၂၀၁၀တုန်းက သူ့အသက်မပြည့်သေးဘူး။ အခုအသက်ပြည့်ပြီ။ သူ့စာရင်းမပါဘူးပေါ့။ တချို့ကလည်း သေသွားပြီ။ အဲဒါတွေမထုတ်ထားသေးဘူးပေါ့´´ဟု သူက ပြောသည်။

၎င်းကိစ္စ (၇)ရက်အတွင်း ကန့်ကွက်ရမည်ဖြစ်သော်လည်း လောလောဆယ်မြို့နယ်အုပ်ချုပ်မှ တာဝန်ရှိသူများ ခရီးလွန်နေကြောင်း သူက ဆက်ပြောသည်။

´´အဲဒီစာရင်းက (၇)ရက်အတွင်းကန့်ကွက်ရင် ကန့်ကွက် ၊ မကန့်ကွက်ရင် အတည်ဖြစ်မယ်ပေါ့။ ဒါပေမဲ့ အခုအရေးပါတဲ့ လူတွေက ခရီးလွန်နေကြတယ်´´ဟု ဆိုသည်။

ကြားဖြတ်ရွေးကောက်ပွဲအား လာမည့်ဧပြီလဆန်းပိုင်းတွင် ကျင်းပရန်ရှိပြီး၊ ဗန်းမော်မြို့နယ်အတွင်း၌ အမျိုးသားဒီမိုကရေစီအဖွဲ့ချုပ်ပါတီ NLD ၊ တိုင်းရင်းသား စည်းလုံးညီညွှတ်ရေးပါတီနှင့် ကြံ့ဖွံ့ပါတီတို့ ယှဉ်ပြိုင်ကြမည်ဟု သိရသည်။

သျှမ်းသံတော်ဆင့်သတင်း