မြစ်ဆုံ၏ ကျေးဇူးပဲ့တင်သံ အခမ်းအနား

မြစ်ဆုံ၏ ကျေးဇူးပဲ့တင်သံ အခမ်းအနားကို ဖေဖော်ဝါရီလ ၂၄ ရက်နေ့ နံနက် ၁၁နာရီအချိန်တွင် ဧရာဝတီ မြစ်ဆုံ အနီးရှိ တန်ဖဲရွာတွင် ကျင်းပခဲ့ပြီး အဆိုပါ အခမ်းအနားသို့ ကချင် ဒေသခံများ၊ ၈၈မျိုးဆက် ကျောင်းသားများ အဖွဲ့မှ ကိုမင်းကိုနိုင်အပါအ၀င် အဖွဲ့ဝင် (၁၆)ဦး၊ သဘာဝ ပတ်ဝန်းကျင် ထိန်းသိမ်း စောင့်ရှောက်သူများ ၊ ကဗျာဆရာ၊ ဓာတ်ပုံဆရာ၊ ဒီဇိုင်း ဆရာများနှင့် သတင်း သမားများ တက်ရောက် ခဲ့ကြသည်။ 

ကိုမင်းကိုနိုင်အား ဧရာဝတီ မြစ်ဆုံ အနီးရှိ တန်ဖဲရွာ၌ ယနေ့နံနက်ပိုင်းတွင် ကျင်းပခဲ့သည့် မြစ်ဆုံ၏ ကျေးဇူးပဲ့တင်သံ အခမ်းအနားတွင်တွေ့ရစဉ်

 လူဆိုတာ ကိုယ်မွေးတဲ့ နေရာ ကိုယ် နေတဲ့နေရာကို ချစ်ကြတာပါပဲ။ ချစ်ကြတဲ့ နေရာမှာ ဟောဒီမြစ်ဆုံဒေသက တိုင်းရင်းသားတွေက
နောက်ဆုံး နှာခေါင်းကို ရေမြုပ်တဲ့အထိ ကြံ့ကြံ့ခိုင်ပြီး နေသွားမယ်လို့ ကြားတဲ့အခါမှာ ကျွန်တော်တို့ အင်မတန် အားရှိပါတယ်။ ကိုယ့်မြေ ကိုယ့်ရေကို ချစ်တဲ့ စိတ်တွေလည်း ပိုပြီးတော့ ရှိပါတယ်။ သိပ်ပြီး ကျေးဇူးတင်ပါတယ်။ အဲဒီ စကားမျိုး ကြားရတာ၊ အဲဒီတော့ အခုလို စီမံကိန်း ခေတ္တရပ်ဆိုင်းပြီးတော့ ကိုယ့်ရပ် ကိုယ်ရွာ ပြန်လာနိုင်ကြပြီး မိတ်ဆုံ စားပွဲတွေ ကျေးဇူးတင် စကားတွေ ပြောနိုင်တယ်ဆိုတာ အောင်ပွဲပါ။ အခုလို အောင်ဖို့ အတွက် အလကား မရခဲ့ပါဘူး။ ကိုယ့် ခံစားချက် ကိုယ်လိုရာကို သတ္တိရှိရှိ ဖော်ထုတ်ရဲတဲ့ သတ္တိက နံပါတ်တစ်ပါ။ ဒုတိယ အချက်က တစ်ပြည်လုံးက ပြည်ထောင်စု သားတွေဟာ ကချင်ပြည်နယ်မှာ ဖြစ်တာကို ၀ိုင်းပြီး စိတ်ပူတယ်။ စိတ်ပူပြီး ကချင် တိုင်းရင်းသားတွေဘက်က ၀င်ပြီး ရပ်ပေးတယ်။ ဥပမာ- သဘာဝပတ်ဝန်းကျင် ထိန်းသိမ်းရေး အဖွဲ့တွေ၊ စာပေသမားတွေ၊ အနုပညာ သမားတွေ အားလုံး ၀ိုင်းပြီးတော့ လက်တွဲပြီး လက်ချင်း ချိတ်ပြီးတော့ ကချင်ပြည်သူတွေနဲ့အတူ ရပ်လိုက်လို့ အောင်မြင်တာပါ။ အဲဒီတော့ အားလုံးကို ကချင်ပြည်သူတွေ ကိုယ်စား ကျွန်တော်က ကျေးဇူးတင်ပါတယ်လို့ ပြောချင်ပါတယ်။ စီးပွားရေးအရ ဆုပ်ကိုင်ရမယ့် ကိစ္စတစ်ခုလောက်ကို မကြည့်ဘဲ ဟိုးနောက် မမြင်ရတဲ့ မဝေးသေးတဲ့ ကလေးတွေ အနာဂတ်ကမ္ဘာကို ကြည့်ပြီးတော့ အမြော်အမြင်ကြီးခဲ့တဲ့
ပညာရှင်တွေ၊ တိုင်းရင်းသားတွေရဲ့ အမြော်အမြင်ကြီးမှုကို ကျေးဇူးတင်ပါတယ်။ ကျွန်တော်တို့ ပြည်သူတွေဟာ အာဏာ မရှိဘူးဆိုပြီး စိတ်မပျက်ပါနဲ့။ အာဏာမရှိပေမယ့် တကယ်ညီညွတ်တယ်ဆိုရင် သြဇာ ရှိပါတယ်။ အဓိကက အားလုံး ညီညွတ်ပါ။ ကချင်မှာပဲ ဖြစ်ဖြစ်၊ ရှမ်းပြည်မှာပဲ ဖြစ်ဖြစ်၊ မွန်ပြည်မှာပဲ ဖြစ်ဖြစ်၊ တစ်ခုခု ဖြစ်တယ်ဆိုရင် အားလုံးက အတူတူပဲလို့ ခံစားမယ်ဆိုရင် အရာရာကို အောင်မြင်ပါတယ်။ နောက်ဆုံး ဒီဧရာဝတီ မြစ်ကြီးကို ပိတ်ဆို့မယ်ဆိုတဲ့ စီမံကိန်းကို တားလိုက်နိုင်တာဟာ အစိုးရရော၊ သမ္မတကြီးရော၊ ဟောဒီ ပြည်သူ ပြည်သားတွေရော ပူးပေါင်းပြီးတော့ ဆောင်ရွက်လိုက်တာပါ။ ပိတ်ဆို့မှုကို ဖွင့်လိုက်ခြင်း အားဖြင့် ပူးပေါင်းဆောင်ရွက်မှုဆိုတဲ့ မြစ်ကြီးဟာ စီးသွားပါပြီ။ သိပ်မင်္ဂလာရှိပါတယ်။ အဲတာကြောင့် ဗမာလိုပြောတော့ အမျိုးသား ညီညွတ်ရေးလို့ ပြောပါတယ်။ ကချင်လို ဘယ်လို ပြောတယ် ကျွန်တော် မသိပါဘူး။ ဒါ အရေးကြီးပါတယ်။ အမျိုးသားအားလုံး ညီညွတ်ရေးဟာ ဟောဒီက မြစ်ဆုံက စပြီး ရသွားလို့ အမျိုးသားညီညွတ်ရေးဆိုတဲ့ မြစ်ကြီး စ စီးသွားပါပြီ။ ကျွန်တော်တို့ ကမ္ဘာတည်သရွေ့ ကာကွယ်ကြပါစို့၊ ထိမ်းသိန်းကြပါစို့။ ကမ္ဘာပေါ်မှာ တိုင်းပြည်က နိုင်ငံတကာက အားလုံးကြည့်နေပါတယ်။ ကျွန်တော်တို့ ပြည်ထောင်စုကြီးမှာ ဘယ်လောက် ညီညွတ်သလဲ။ ဘယ်လောက် အားရှိသလဲဆိုတာ ကြည့်နေပါတယ်။ တစ်ကမ္ဘာလုံးက စောင့်ကြည့်နေတဲ့ အချိန်မှာ အားလုံးက ညီညွတ်တယ်ဆိုတာကို ပြလိုက်နိုင်တဲ့ အတွက် ဂုဏ်ယူတယ်လို့ ပြောရင်း အားလုံးကို ကျေးဇူး တင်ပါတယ်။

-ကိုမင်းကိုနိုင် (မြစ်ဆုံ၏ ကျေးဇူးပဲ့တင်သံ အခမ်းအနား၌ ပြောကြားခဲ့သည်များမှ
ကောက်နုတ်ချက်)

 

ဦးအုန်းအား ဧရာဝတီ မြစ်ဆုံ အနီးရှိ တန်ဖဲရွာ၌ ယနေ့နံနက်ပိုင်းတွင် ကျင်းပခဲ့သည့် မြစ်ဆုံ၏ ကျေးဇူးပဲ့တင်သံ အခမ်းအနားတွင်တွေ့ရစဉ်

ကျွန်တော် မြစ်ဆုံကို လေးခေါက်ရောက်ပါတယ်။ ပထမဆုံးအကြိမ်ရောက်တုန်းက မြစ်ဆုံ ကြည်လင်ပြီး ငါးတွေနဲ့ လှလို့ တကယ် ကျက်သရေရှိတဲ့ မြစ်ဆုံပါ။ ဒုတိယအကြိမ်ရောက်တော့ တော်တော်လေးဆိုးလာပါပြီ။ ငါးလဲသိပ်မရှိဘူး။ မြစ်ရေကလည်း နောက်နေတယ်။ တတိယအကြိမ်ကပိုဆိုးတယ်။ အခုစတုတ္ထအကြိမ်လာကြည့်တဲ့ အခါကျတော့ အရင်ကလို မဖြစ်ခဲ့ဘူး။ သို့သော် ကျွန်တော် ဘာတွေးမိလဲဆိုတော့ မြစ်ဆုံဟာ မေခနဲ့ မလိခ ဆုံတဲ့နေရာ၊ ကချင်ပြည်နယ်ရဲ့ ယဉ်ကျေးမှု၊ ကချင်တွေမှာ အယူရှိတယ် သားသမီးမွေးရင် တစ်ယောက်က ဆိုးတယ်။ တစ်ယောက်က ပျော့တယ်။ ဆိုးတာနဲ့ ပျော့တာရောရင် လှသွားတယ်။ အဲ့ဒီတော့ မေခနဲ့ မလိခပေါင်းသွားမှ တစ်ကယ် ဧရာဝတီ ဖြစ်သွားတာ။ ဧရာဝတီကြီးဟာ မြန်မာနိုင်ငံရဲ့ အသက်သခင် ကျေးဇူးပဲ။ မြန်မာနိုင်ငံရဲ့ မြောက်ဖျားမှာ ရှိတဲ့ ကချင်ပြည်နယ်မှာရှိတဲ့ မြစ်ဆုံဒေသဟာ လူတွေရဲ့ လည်ပင်းလိုပါပဲ။ ကိုမင်းကိုနိုင် ပြောသလိုပဲ ခေါင်းနဲ့တူတယ်။ လည်ပင်းနဲ့ တူတယ်။ အဲ့ဒါကို သိလို့ ရှိရင် ခန္ဓာကိုယ်တစ်ခုလုံး ဇီဝိန်ကြွေဖို့ရှိတယ်။ ကျွန်တော် လေ့လာလိုက်တော့ ဒီမြစ်ဆုံဟာ သဘာဝ ၀န်းကျင်ဆိုတာ ကချင်ပြည်နယ်ဟာ သစ်ခွအမျိုးပေါင်း ၈၀၀ ကျော်ရှိတယ်။ တောင်ဇလပ်မျိုး ၂၀၀ ကျော်ရှိတယ်။ ဒါတွေကို ပြုစုတဲ့ ဆရာတွေ၊ ဆရာမတွေ ရှိတယ်။ ဒါတင်မကဘူး ကမ္ဘာမှာ မရှိတော့ဘူး ပျောက်ကွယ်သွားပြီဆိုတဲ့ အပိုလိုလိပ်ပြာ၊ ဟိုး ခါကာဘိုရာဇီ ဥယျာဉ်မှာရှိတယ်။ ကျွန်တော် အကောင် အရှင်မတွေ့ဘူး အသေပဲ တွေ့တယ်။ ကမ္ဘာမှာ အသေးဆုံးဆိုတဲ့ သမင်မျိုး ပူတာအိုနယ်မှာ တွေ့တယ်။ ဒီလောက်ရှားပါးပြီး ဒီလောက် အဖိုးတန်တဲ့ သဘာ၀၀န်ကျင်ကို ပိုင်ဆိုင်တဲ့ ကချင်ပြည်နယ်ဟာ မြန်မာပြည်ရဲ့ ဦးခေါင်း မြန်မာပြည်ရဲ့ အသက်သွေးကြောပါပဲ။ ကချင်ပြည်နယ်မှာတစ်ခုဖြစ်ရင် ဗမာရော၊ ရခိုင်ရော၊ ရှမ်းရော၊ မွန်ရော၊ ကရင်ရော၊ ကချင်ရော အတူတူ ၀ိုင်းပြီးတော့ ကိုယ့်တိုင်းပြည်ကိုယ့်လူမျိုးရဲ့ တစ်ကယ်တန်ဖိုး အရှိဆုံး ဒေသကို ကာကွယ်ရမှာပါ။ ကျွန်တော်သိသလောက် ဧရာဝတီ မြစ်ဆိုတာ အရင်တုန်းကဆိုရင် အိုင်ကြီးတွေ ဆက်သွားတာပါ။ ပုပ္ပါးမှာ မီးတောင်ကြီးတွေ ပေါက်တဲ့ အခါမှ ဧရာဝတီက ချင်တွင်းနဲ့ မဆက်ဘူး။ ဧရာဝတီနဲ့ စစ်တောင်းနဲ့ ဆက်တယ်။ နှစ်ပေါင်း တစ်သိန်းကျော်လောက်က မီတောင်ကြီး ပေါက်ပြီးတော့မှ ဧရာဝတီမြစ်က ပြတ်ထွက်သွားပြီး ချင်းတွင်း မြစ်နဲ့ ဆက်တယ်။ ဘူမိဗေဒ အထောက်အထားတွေ ရှိပါတယ်။ ထူးဆန်းတဲ့ ဧရာဝတီမြစ်ဟာ မြန်မာပြည်ရဲ့ မြစ်လို့ ပြောတာတောင် နည်းသေးတယ်။ ကမ္ဘာရဲ့ မြစ်၊ ကမ္ဘာကတောင် တန်ဖိုးထား အလေးထားတဲ့ မြစ်၊ မြန်မာပြည်မှာ မြစ်ဖျားခံတယ်၊ မြန်မာပြည်ကို စီးတယ်။ ဘင်္ဂလားပင်လယ်အော်ကို ၀င်သွားတယ်။ မြန်မာ့အသက်သွေးကြောဟာ ဧရာဝတီမြစ်။ ဒီ ဧရာဝတီမြစ်ကို ကချင်တင်မကဘူး ဗမာရော၊ ရခိုင်ရော၊ မွန်ရော၊ ကရင်ရော အားလုံး ၀ိုင်းပြီးတော့ အသက်နဲ့ လဲ ပြီးတော့ ဆောင်ရွက် စောင့်ရှောက်ရမယ်လို့ ပြောကြားချင်ပါတယ်။

သဘာဝပတ်ဝန်းကျင်ထိန်းသိမ်းရေးပညာရှင် ဆရာကြီးဦးအုန်း (မြစ်ဆုံ၏ ကျေးဇူးပဲ့တင်သံ အခမ်းအနား၌ ပြောကြားခဲ့သည်များမှ ကောက်နုတ်ချက်)

ဆရာအော်ပီကျယ်အား ဧရာဝတီ မြစ်ဆုံ အနီးရှိ တန်ဖဲရွာ၌ ယနေ့နံနက်ပိုင်းတွင် ကျင်းပခဲ့သည့် မြစ်ဆုံ၏ ကျေးဇူးပဲ့တင်သံ အခမ်းအနားတွင်တွေ့ရစဉ်

ကျွန်တော်တို့ အနုပညာသမားတွေ အနေနဲ့ ဧရာဝတီ ဒီလောက်ကြီမားတဲ့ ဆည်ကြီးဆောက်တယ်။ ဆည်ကြီးကိစ္စမှ မဟုတ်ပါဘူး ရွှေတူးတဲ့ကိစ္စ မြစ်ကြောင်းကို မထိန်းသိမ်းပဲနဲ့ နှစ်စဉ်တဖြေးဖြေး ယိုယွင်းလာတဲ့ ဧရာဝတီကို ချင်တွင်းကို ကျွန်တော်တို့ အနုပညာသမားတွေ တော်တော်များများ စိုးရိမ်ပါတယ်။ အဲ့ဒီတော့ ကျွန်တော်တို့ တတ်တဲ့ အနုပညာနဲ့ ၀ိုင်းပြီးတော့ ကျွန်တော်တို့ ရေးကြမယ်ဆိုတော့ ကျွန်တော်တို့က နှလုံးသားခံစားမှုကို အဓိကထားပြီးတော့ ကျွန်တော် တို့ အနုပညာဖန်တီးတာပါ။ ဒါပေမယ့် ကျွန်တော်တို့ အခုတစ်ချို့ကိစ္စတွေက နှလုံးသားတစ်ခုတည်းနဲ့ မပြီးတော့ပါဘူး။ ဦးနှောက်အသိတရားကို နှလုံးသားနဲ့ ပေါင်းစပ်ရမှာပါ။ အဲ့ဒါကြောင့် ဆရာကြီး ဦးအုန်းတို့လို ပညာရှင်ပေါင်းများစွာက အရှေ့ကဦးဆောင် ကျွန်တော်တို့ကလည်း အနုပညာနဲ့ တစ်စွမ်းသရွေ့ ပေါင်းစည်းပြီးတော့ ဧရာဝတီအတွက် သဘာဝပတ်ဝန်းကျင်အတွက် မြန်မာတစ်နိုင်ငံလုံးအတွက် နိင်ငံရေးနဲ့ စီးပွားရေးအတွက် ကျွန်တော်တို့ ၀ိုင်းပြီးတော့ ဆောင်ရွက်ကြပါတယ်။ အဓိကက ကျွန်တော်တို့က မျက်စိနဲ့ မြင်မှ ခံစားရပါတယ်။ မြစ်ဆုံဆိုတာ အခုမှ ပထမဆုံးရောက်ဖူးတာပါ။ ဒီကို ကြည့်လိုက်တော့ အသိဥာဏ်နဲ့ စပ်ပြီး စဉ်းစားတွေခေါ်ခံစားကြည့်တော့ ရွှေတူနေတဲ့ဟာတွေ ဒီကျောက်တုံးတွေပေါ်မှာ ရွှံနွံတွေ ကပ်နေတဲ့ဟာတွေ အများကြီးပဲ။ စောစောက ရပ်မယ်ဆိုတာကို ၀မ်းမြောက်ဝမ်းသာပါတယ်။ ဒါပေမယ့် သိပ်လဲ မသေချာဘူး။ အဲ့ဒီမသေချာသေးခြင်းကိုလည်း ကျွန်တော်တို့က တက်ထောင်လိုက်လို့ လည်း မရပါဘူး။ အဲ့ဒါကြောင့် ကျွန်တော်တို့အားလုံး ခံစားမှုက အရေးကြီးပါတယ်။ အဲ့ဒီခံစားမှုနဲ့ နှလုံးသားနဲ့ အလုပ်လုပ်မှ ကျွန်တော်တို့ ပြည်သူတစ်ရပ်လုံးက ပါဝင်ပါတယ်။ အသိဥာဏ်ဦးဆောင်သော ခံစားမှုနဲ့ ဒီဧရာဝတီမြစ်ကြီရော၊ မြန်မာတစ်နိုင်ငံလုံး ကိစ္စတွေရော ဆက်လက်ဆောင်ရွက်နိုင်ပါစေလို့ ဆန္ဒပြုပါတယ်။
ဆရာအော်ပီကျယ် (မြစ်ဆုံ၏ ကျေးဇူးပဲ့တင်သံ အခမ်းအနား၌ ပြောကြားခဲ့သည်များမှ ကောက်နုတ်ချက်)

ဧရာဝတီ မြစ်ဆုံ အနီးရှိ တန်ဖဲရွာ၌ ယနေ့နံနက်ပိုင်းတွင် ကျင်းပခဲ့သည့် မြစ်ဆုံ၏ ကျေးဇူးပဲ့တင်သံ အခမ်းအနားသို့ တက်ရောက်လာသူများကို တွေ့ရစဉ်

 Eleven