ဒေါ်အောင်ဆန်းစုကြည် ပုသိမ် ကိုးသိန်းအားကစားကွင်း၌ လူထုအားပြောကြားသည့် မိန့်ခွန်း အပြည့်အစုံ

အခုအချိန်ဟာ ကျွန်မတို့ ပါတီတည်ဆောက်နေတဲ့ အချိန်မို့လို့ ပါတီတည်ဆောက်ရေး အနေနဲ့လည်း ကျွန်မတို့လာတာဖြစ်ပါတယ်။ ဒီအပြင်မှာလည်း လာမယ့် ကြားဖြတ်ရွေးကောက်ပွဲအတွက် ပြင်ဆင်နေတဲ့အချိန်မှာ ကျွန်မတို့ ပါတီရွေးကောက်ပွဲတွက်လည်း စည်းရုံးဖို့ လာခဲ့တာဖြစ်ပါတယ်။ အဲဒါနဲ့ပတ်သက်လို့ ကျွန်မသိပ်ပြီးတော့ စီကာပတ်ကုံး မပြောချင်ဘူး၊ ရိုးရိုးပဲပြောချင်တာက ကျွန်မတို့ရဲ့ ကိုယ်စားလှယ်ကိုထောက်ခံအားပေး မဲပေးကြပါလို့ပဲပြောချင်ပါတယ်။ (ဟေး ဟေး ဟေး လက်ခုပ်သံများ)
ကျွန်မတို့ဟာ ဒီအချိန်မှာ ကြားဖြတ်ရွေးကောက်ပွဲမှာ နေရာလည်းသိပ်မများပါဘူး၊ ဒီနေရာလေး နည်းနည်းကိုဝင်ပြီးရွေးလို့ ဘာထူးမှာလည်းလို့ပြောကြတယ်။ ဒါပေမယ့်ကျွန်မတို့ကတော့ ဘယ်နေရာကဖြစ်ဖြစ် ရတဲ့နေရာက ပြည်သူတွေရဲ့ အကျိုးကို အထိရောက်ဆုံးလုပ်ချင်တဲ့ ဆန္ဒရှိပါတယ်။ ဒါကြောင့်မို့လို့ ရှိတဲ့နေရာတွေမှာ ၀င်ပြိုင်တာပါ၊ မဲထည့်တဲ့နေရာမှာ လူပုဂ္ဂိုလ်တဦးတယောက်သာမက အဖွဲ့အစည်းရဲ့ အဓိကရည်ရွယ်ချက်ဖြစ်တဲ့ ပြည်သူတွေ ဒီမိုကရေစီလုံခြုံမှုအောက်မှာ နေနိုင်ရေးဖို့အတွက်ု မဲပေးတယ်လို့ စိတ်ထဲမှာထားပြီးတော့ ကျွန်မတို့ အဖွဲ့ချုပ်ကိုမဲထည့်ပေးစေချင်ပါတယ်။ (ဟေး )

   အခုဒီလောက် အင်တိုက်အားတိုက် ကြိုပြီးမှ ပုသိမ်မှာ မဲကို ကျွန်မတို့ မနိုင်ဘူးဆိုရင် မဟုတ်တော့ဘူးနော်၊ (ဟေး )  
ကျွန်မတို့ မြန်မာပြည်တ၀ှမ်းခရီးသွားတဲ့ အခါမှာ ဘာကိုသတိထားမိလည်းဆိုတော့ လာကြိုကြတဲ့ ပြည်သူတွေအမြဲပဲ ရွှင်ရွှင်လန်းလန်းနဲ့ရှိပါတယ်။ ဒီလောက်တောင် ခက်ခဲတဲ့ဘ၀တွေကို ဖြတ်သန်းနေရတဲ့ကြားထဲက ဒီလောက်တောင် လှိုက်လှိုက်လှဲလှဲပြုံးပြုံးရွှင်ရွင် တက်တက်ကြွကြွ ကြိုဆိုတာဟာ ပြည်သူတွေကို ကျွန်မတို့ အင်မတန်မှ ကျေးဇူးတင်သလို ဒီလိုပြည်သူတွေနဲ့ဆို ကျွန်မတို့ဟာ တကယ်ပဲ သာယာတဲ့ ပြည်ထောင်စုကြီးတခုကို ဆောက်တည်နိုင်မယ်လို့ ယုံကြည်ပါတယ်။ (ဟေး )

လမ်းမှာကျွန်မတို့ကို ကြိုဆိုတဲ့ သူတွေထဲမှာဆိုရင် ကရင်တိုင်းရင်းသူ တိုင်းရင်းသားတွေ ကပြီးကြိုဆိုတာ တွေ့တဲ့အခါကျတော့ ကျွန်မစိတ်ထဲမှာ ကျွန်မတို့ဟာ တိုင်းရင်းသားပေါင်းစုံနဲ့ စုပေါင်းပြီး တည်ထောင်ထားတဲ့  ပြည်ထောင်စုကြီးဖြစ်စေချင်တယ်။ စစ်မှန်တဲ့ ပြည်ထောင်စုစိတ်ဓါတ်အပေါ်မှာ ခြေခံပြီး ထူထောင်မယ်ဆိုရင်နဲ့ တည်ထောင်မယ်ဆိုလို့ရှိရင် ပြည်သူတွေဟာ အေးအေးချမ်းချမ်းနဲ့ ဖွံ့ဖြိုးနိုင်မယ့်ဘ၀ကိုရောက်နိုင်မှာပါ။
ဒါပေမယ့် ဒီကိစ္စဟာ ၀ိုင်းပြီးကြိုးစားရမယ့် ကိစ္စပါ၊ ကျွန်မအမြဲပဲပြောပါတယ်။ ကျွန်မဟာ ပြည်သူတွေကို လွယ်လွယ်နဲ့ စည်းရုံးချင်တဲ့ စိတ်နဲ့ပဲ မဖြစ်နိုင်တာတွေ မပြောပါဘူး။

ကျွန်မရိုးရိုးပဲပြောရမယ်ဆိုရင် နိုင်ငံတနိုင်ငံတိုးတက်ဖို့ဆိုတာဟာ ပြည်သူတွေပါမှ ဖြစ်နိုင်ပါတယ်။ ပြည်သူတွေ မပါရင် မဖြစ်နိုင်ပါဘူးဆိုတာ သိစေချင်ပါတယ်။

ကျွန်မတို့ ဘယ်လောက်ပဲ ကြိုးစားကြိုးစား ပြည်သူတွေဟာ ကျွန်မတို့နောက်က မရှိလို့ရှိရင် ကြိုးစားချက်တွေဟာ ထိရောက်နိုင်မှာ မဟုတ်ပါဘူး၊ နောက်က မားမား မတ်မတ်ရှိရဲ့လား (ရှိပါတယ်)

ကျွန်မအနေနဲ့ ဒီလိုပြည်သူတွေက အင်မတန်မှ ပူပြင်းတဲ့နေ အောက်မှာလာပြီးတော့ ကျွန်မတို့ကို အားပေးတယ်ဆိုတာ အင်မတန်မှ ခံနိုင်ရည်ရှိတဲ့ နိုင်ငံပဲဆိုတာ သဘောပေါက်ပါတယ်။ ဒီခံနိုင်ရည်တွေကို ခံနိုင်ရည်ရှိတဲ့ အင်အားတွေကို ကျွန်မတို့နိုင်ငံ အေးချမ်းဖို့ တိုးတက်ဖို့ သုံးရမှာပါ။ အဲဒီဟာမှာ အားလုံးပါဝင်စေချင်ပါတယ်။ အထူးသဖြင့် လူငယ်တွေပါဝင်စေချင်ပါတယ်။ (ဟေး)
ကျွန်မတခုတော့ နည်းနည်းစိတ်ပူပါတယ်။ လာကြိုတဲ့အထဲမှာ လူငယ်တွေ အများကြီး  လာကြိုတဲ့အခါ တော်ကြာ စာမေးပွဲတွေ ဘာတွေ မဖြေဖြစ်ရင် စာမေးပွဲကျမှာကို စိုးရိမ်ပါတယ်။ (လက်ခုပ်သံများ)

ကျွန်မတို့လူငယ်တွေကို ပညာတတ်စေချင်တယ်။ ဒါဟာ ကျွန်မတို့ နိုင်ငံရဲ့ အနာဂတ်ဖြစ်ပါတယ်။ ကျွန်မတို့ဟာ နိုင်ငံအတွက် ဘာလုပ်ပေးရမလဲဆိုရင် ပြည်သူတွေရဲ့ အသံကိုနားထောင်လိုက်လို့ ရှိရင် အဖြေက ရှင်းရှင်းလေးပါ။ ပြည်သူတွေဟာ ဆင်းရဲတဲ့ ဘ၀ကနေ လွတ်မြောက်စေချင်တယ်၊် ပညာရေး ကျန်းမာရေး ဘက်မှာ တိုးတက်စေချင်တယ်ဆိုတာ ကြားရပါတယ်။ ဒါဟာ ကျွန်မတို့ ရည်ရွယ်ချက်နဲ့လည်း ထပ်တူထပ်မျှ ဖြစ်ပါတယ်။ အရှေ့လူတွေ ခဏထိုင်ပေးပါ။ အနောက်ကလူတွေ မြင်ရအောင်လို့၊ သတင်းထောက်တွေလည်း ထိုင်ပေးပါ၊ သတင်းထောက်တွေ ကျွန်မကို ရန်ကုန်မှာ တချိန်လုံးတွေ့နေတာပဲ၊ ဒီမှာ ခဏသာတွေ့ရတဲ့ ပြည်သူတွေကို ငဲ့ညှာပြီး ထိုင်ပေးပါ။ (ဟေး   )

အားလုံးဟာ တယောက်နဲ့ တယောက် နားလည်မှုရှိမှ ဖြစ်မယ်နော်၊ ကိုယ်လိုချင်တာပဲ ဇွတ်လုပ်နေရင် ကျွန်မတို့နိုင်ငံအတွက် မကောင်းပါဘူး။ နားလည်မှုနဲ့ အရှေ့ကလူတွေ ခဏထိုင်ပေးပါ။ (ဟေး)

အရှေ့မှာရောက်နေတဲ့သူက အနောက်ကသူတွေကို အမြဲညှာရတယ်။ ဒါဟာ လုပ်သင့်တဲ့လုပ်ထိုက်တဲ့ ကိစ္စပဲ။ ကျွန်မအဲလောက်ပြောလိုက်တော့ အခါကျတော့ ဘာကိုဆိုလိုတယ်ဆိုတာ လူတိုင်းလူတိုင်းဟာ အခွင့်အရေး နဲ့ ကိုက်ညီတဲ့ တာဝန်ရှိတယ်ဆိုတာ ပြောချင်တာပါ၊ ဒါကြောင့် ပိုပြီးအခွင့်ရေး ရလေလေ ပိုပြီး တာဝန်ကြီးလေလေဆိုတာနားလည်စေချင်ပါတယ်။
ကျွန်မတို့ အမျိုးသား ဒီမိုကရေစီ အဖွဲ့ချုပ်က ရွေးကောက်ပွဲ ၀င်တဲ့အခါ မူ ၃ခုကို အဓိကထားပြီး ၀င်မှာဖြစ်ပါတယ်။ အဲဒီမူသုံးခုက ဘာလဲဆိုရင် ပထမတခုက ဥပဒေစိုးမိုးရေးပဲ၊ ဥပဒေစိုးမိုးရေး ကိုလိုလားရခြင်းက ပြည်သူတွေရဲ့ လုံခြုံရေးပဲ၊ ကျွန်မတို့ပြည်သူတွေ စိတ်ချလက်ချ အေးအေးချမ်းချမ်းနေနိုင်ဖို့ပါ၊ ဥပဒေစိုးမိုးရေးဆိုတာ လူတိုင်းလူတိုင်း ဘ၀နဲ့ ဆိုင်ပါတယ်။ တောင်သူလယ်သမားတွေနဲ့လည်း ဆိုင်တယ်။ ကိုယ့်ကိုယ်ပိုင်လုပ်ငန်းကို လုပ်နေတဲ့ လုပ်ငန်းရှင်လေးတွေနဲ့လည်း ဆိုင်တယ်၊ လုပ်ငန်းရှင်ကြီးတွေနဲ့လည်း ဆိုင်ပါတယ်။ ဥပဒေစိုးမိုးရေး ရှိရင် ကိုယ့်ကို ဘယ်သူက မှ ကိုယ့်ကိုလာပြီးတော့ မတရားသဖြင့် လာအနိုင်ကျင့်လို့မရပါဘူး။ ဥပဒေစိုးမိုးရေးဆိုတာ ပြည်သူတွေကို အကာအကွယ်ပေးထားဖို့ အဓိကဖြစ်ပါတယ်။ ဒါကြောင့်ပြည်သူတွေကို အကာအကွယ်ပေးထားမယ့် ဥပဒေခိုင်ခိုင်မာမာဖြစ်ဖို့ ကျွန်မတို့ အဖွဲ့ချုပ်ကနေပြီးတော့ တောင်းဆိုနေတာဖြစ်ပါတယ်။
(လက်ခုပ်သံများ )

ပုသိမ်ထီးဖြင့် ပုသိမ်မြို့တွင်တွေ့ရသည့် ဒေါ်အောင်ဆန်းစုကြည်
နောက် တခုကတော့ ကျွန်မတို့ဟာ ပြည်တွင်းငြိမ်းချမ်းရေးကို တောင်းဆိုနေပါတယ်။ ဒါကတော့ ထူးထူးထွေထွေ ရှင်းပြနေဖို့ မလိုပါဘူး။ ပြည်တွင်းငြိမ်းချမ်းရေးရမှ ကျွန်မတို့ဟာ စစ်မှန်တဲ့ ပြည်ထောင်စုအဖြစ် ရပ်တည်နိုင်မှာပါ။ ဧရာဝတီတိုင်းဆိုလို့ရှိရင် တနည်းအားဖြင့် စံနမူနာထားရမယ့်တိုင်း လို့ပြောလို့ရပါတယ်။ ဗမာအများစုရှိပေမယ့် ကရင်တိုင်းရင်းသားတွေလည်းအများကြီး ရှိပါတယ်။ မွန်တိုင်းရင်းသားတွေလည်း အများကြီး ရှိပါတယ်။ အားလုံးဟာ အေးအေးချမ်းချမ်းနဲ့ ညီရင်းအစ်ကိုမောင်ရင်းနှမလို့ အေးအေးချမ်းချမ်းနဲ့ နေနိုင်တယ်ဆိုတာဟာ ဧရာဝတီတိုင်းက ရှေ့ကနေပြီးစံပြအဖြစ်ရပ်တည်ပေးစေချင်ပါတယ်။ (ဟေး )

ဒီတနိုင်ငံလုံးဟာ ဧရာဝတီမြစ်ကြီးကို အဓိကထားပါတယ်။ ဒါကြောင့်မို့လို့ ဒီတိုင်းဟာ ဧရာဝတီတိုင်း နာမည်ရထားတာ အင်မတန်မှ ထူးခြားတယ် မင်္ဂလာရှိပါတယ်လို့ ယူဆပါတယ်။ ကိုယ်ရဲ့ အမည်နဲ့လိုက်အောင် တန်ဖိုးရှိရှိ မင်္ဂလာရှိရှိ ကျက်သရေရှိရှိ ဒီတိုင်းကို ထူထောင်ပေးစေချင်ပါတယ်။ ကျွန်မတို့ ပြည်သူတွေဟာ စိတ်တက်ကြွတာလောက် စည်းကမ်းရှိတဲ့နေရာမှာတော့ နည်းနည်းလေး အင်အားနည်းတယ်လို့ ပြောရပါမယ်။ စိတ်တက်ကြွတာမှာ အင်အားများတယ်။ စည်းကမ်းရှိတဲ့နေရာမှာ အင်အားနည်းပါတယ်။ အင်အားများတဲ့နေရာမှ ဒီအင်အားတွေကို မှန်မှန်ကန်ကန် သုံးရမယ်၊ များတဲ့နေရာက နည်းတဲ့နေရာကို ဖြည့်ပေးစေချင်ပါတယ်။ အင်အားကို မှန်မှန်ကန်ကန်သုံးမှ အများကို အကျိုးပြုပါမယ်။ အင်အားကို အလွဲသုံးစားလုပ်ပြီဆိုရင် အများအတွက် အန္တရာယ်ဖြစ်ပါတယ်။ ဒါကြောင့် ကျွန်မတို့ ပြည်သူတွေဟာ ကိုယ့်ရဲ့ အင်အားတွေကို မှန်မှန်ကန်ကန်နဲ့ အများအကျိုးအတွက် နိုင်ငံအကျိုးအတွက် သုံးစေချင်ပါတယ်။ နောက်ပြီးတော့ ရှိနေတဲ့ အားနည်းမှုတွေကိုလည်း ပြုပြင်စေချင်ပါတယ်။ နိုင်ငံတနိုင်ငံဟာ ကိုယ်လိုချင်တဲ့ပန်းတိုင်ကိုရောက်ပြီဆိုပြီး ရပ်သွားလို့မရပါဘူး။ အမြဲပဲရှေ့ကို ဆက်ပြီးသွားနေရမှာပါ။ ဒါကြောင့် ကျွန်မတို့ ဟာ ဆင်းရဲမွဲတေမှု ပပျောက်ရေးဆိုရုံနဲ့ မပြီးပါဘူး၊ အဲဒီအဆင့်ကနေ ဖူလုံတဲ့အဆင့် ချမ်းသာတဲ့အဆင့်ရောက်ဖို့ ကျွန်မတို့ကြိုးစားရပါမယ်၊  အဖက်ဖက်က ကျွန်မတို့ ကြိုးစားရပါလိမ့်မယ်။ အလုပ်ဖန်တီးရေးဆိုတာလည်း အရေးကြီးတယ်။ ပညာရေးမှာ ကျွန်မတို့ လူငယ်တွေ ကိုယ်တတ်ထားတဲ့ပညာတွေ သင့်သင့်တော်တော် သုံးနိုင်ဖို့ အရေးကြီးပါတယ်။ ပညာတွေတတ်ထားပြီး အလုပ်မရှိဘူးဆိုရင် ဒီပညာတွေဟာ အဟောသိကံဖြစ်သွားနိုင်ပါတယ်။ (ဟေး )

ဒါကြောင့် ကျွန်မတို့လူငယ်တွေကို အထူးသဖြင့် အနာဂတ်တွက်အားကိုးရတာကြောင့်မို့လို့ ပညာရေးကို မြှင့်တင်စေချင်ပါတယ်။ ပညာတတ်ပြီး မကျန်းမာလုိ့ရှိရင်လည်း လုပ်သင့်လုပ်ထိုက်တဲ့ ကိစ္စတွေကို လုပ်နိုင်ဖို့အားနည်းသွားမှာပါ၊ ဒါကြောင့် ကျန်းမာရေးအလေးထားပြီး တော့၊ ပြည်သူပြည်သားတွေဟာ ပိုက်ဆံမရှိလို့ ကျန်းမာရေး ဂရုမစိုက်နိုင်ဘူးဆိုတဲ့အနေအထားမှာ မရှိအောင်လို့ ကြိုးစားပြီး လုပ်ချင်ပါတယ်။ ပြည်သူတွေအားလုံး ကျန်းမာမယ် ပညာနဲ့ပြည့်စုံမယ်ဆိုလို့ရှိရင် ဒီနိုင်ငံဟာ ချမ်းသာတဲ့နိုင်ငံတခုဖြစ်လာဖို့ အခွင့်အရေးတွေ အများကြီးရှိပါတယ်။

(ပရိသတ် အမေး ဒေါ်စု ပျော်ရွင်ပါသလား )
ပျော်ရွင်ပါတယ်။ ဒီနေ့ပဲ ပျော်ရွင်လို့မရဘူး တသက်လုံးပျှော်ရွှင်မှကောင်းမှာပါ၊ (ဟေး )

ရေရှည်ပျော်ရွှင်ဖို့ ကျွန်မတို့အားလုံး လက်တွဲလုပ်သွားရမှပါ။ အတူလုပ်တဲ့အခါမှာဆိုလို့ရှိရင် အထူလက်တွဲလုပ်နိုင်လို့ရှိရင် အလုပ်က ဘယ်လောက်ပဲ အခက်အခဲရှိပါစေ ပင်ပန်းတဲ့စိတ်ထက် တက်ကြွတဲ့စိတ်က ပိုပါလိမ့်မယ်၊ ဒါက အခုဒီမှာရောက်နေတဲ့ ပရိသတ်က သက်သေပါပဲ၊ နေပူအောက်မှ ပင်ပန်းတဲ့စိတ်မရှိပဲ တက်တက်ကြွကြွကျွန်မတို့ကို အားပေးတာဟာ ဒါဟာ ပြည်သူတွေရဲ့ မေတ္တာနဲ့ စေတနာသာမက ပြည်သူတွေရဲ့ စွမ်းအားကို ဖေါ်ပြနေတယ်လို့ ကျွန်မကဒီလိုပဲမြင်ပါတယ်။
အခုနောက် ၂ လမပြည့်ခင်၊ ၂ လတောင် မကျန်တော့ဘူးပေါ့နော်၊ ၂လနီးပါးကာလမှာ ကြားဖြတ်ရွေးကောက်ပွဲတွေ လုပ်တော့မယ်။

အဲဒီရွေးကောက်ပွဲတွေက တဆင့်ကျွန်မတို့ ကိုယ်စားလှယ်တွေဟာ လွှတ်တော် ထဲရောက်သွားပြီဆိုလို့ရှိရင် တတ်နိုင်သမျှ ပြည်သူတွေရဲ့ အကျိုးကို ထမ်းဆောင်ပါမယ်။ ဒီထဲမှာ ဖွဲ့စည်းပုံအခြေခံဥပဒေနဲ့ ပတ်သက်လို့ အခြားဥပဒေတွေနဲ့ ပတ်သက်လို့ ပြင်သင့်တာတွေ ပြင်ဖို့ကျွန်မတို့ ကြိုးစားပါမယ်။ အဲဒီလိုကြိုးစားတဲ့အခါကျရင် ပြည်သူရဲ့ ထောက်ခံမှုကို လိုအပ်တယ်ဆိုတာ အခုကတည်းက ပြောထားပါရစေ။

ကျွန်မတို့ ပြည်သူရဲ့ ထောက်ခံမှုမရှိရင်တော့ ဘယ်တော့မှ ရေရှည်မှာ အောင်မြင်မှုမရနိုင်ပါဘူး၊ ဒီတော့ပြည်သူတွေအနေနဲ့ ကိုယ့်ကိုယ်ကို တန်ဖိုးထားပါ၊ ကိုယ့်ကိုယ်ကို ယုံကြည်မှုရှိပါ၊ ကိုယ်တဦးတယောက်ရဲ့ စွမ်းအားဟာ မနည်းဘူးဆိုတာနားလည်ပါ။ နောက်ပြီးတော့ ကိုယ့်ရဲ့ မဲတပြားရဲ့ စွမ်းအားဟာ မနည်းဘူးဆိုတာလည်း သဘောပေါက်စေချင်ပါတယ်။ ကျွန်မတို့နိုင်ငံမှာ ရွေးကောက်ပွဲဆိုတာ ခဏခဏဖြစ်တာ မဟုတ်ပါဘူး၊ တခါတလေမှ ဖြစ်တာပါ၊ (ဟေး )

ဒီလို တခါတလေမှ ဆိုတဲ့အဆင့်ကနေပြီး ပုံမှန်ဖြစ်တဲ့အဆင့်သာမက ပုံမှန်လွတ်လွတ်လပ်လပ် မျှမျှတတနဲ့ ဖြစ်နိုင်ဖို့ကျွန်မတိုအားလုံး ၀ိုင်းပြီး ကြိုးစားရပါလိမ့်မယ်။ လာမယ့်ကြားဖြတ်ရွေးကောက်ပွဲမှာ လွတ်လွတ်လပ်လပ် မျှမျှတတရှိနိုင်ဖို့ဟာပြည်သူအားလုံးဝိုင်းကူညီပါလို့ ကျွန်မမေတ္တာရပ်ခံချင်ပါတယ်။ (ဟေး)

ရွေးကောက်ပွဲစည်းကမ်း စည်းမျဉ်း ဥပဒေဘယ်လိုရှိသလဲ ဆိုတာကို ကျွန်မတို့အဖွဲ့ချုပ်က ကြိုးစားပြီးဆောင်ရွက်ပေးပါမယ်။ ပြည်သူတွေကလည်း ဒီစည်းမျဉ်းစည်းကမ်း တွေအတိုင်းဖြစ်ရဲ့လားဆိုတာ ၀ိုင်းဝန်းကြည့်ရှုပြီးတော့ ရွေးကောက်ပွဲကို ကာကွယ်စောင့်ရှောက်ပေးစေချင်ပါတယ်။

ရွေးကောက်ပွဲကို ကာကွယ်စောင့်ရှောက်ပေးပြီးတော့ ကျွန်မစောစောက ပြောတာကို ထပ်ပြီးပြောပါရစေ ရွေးကောက်ပွဲမှာ ကျွန်မတို့ အမျိုးသားဒီမိုကရေစီအဖွဲ့ချုပ်ကို မဲထည့်ဖို့ မမေ့ပါနဲ့လို့ပြောပါရစေ၊ အဲဒီတနေ့မှာ အပင်ပန်းခံပြီး မဲရုံကိုသွားပြီး ကျွန်မတို့အန်အယ်လ်ဒီကိုယ်စားလှယ်လောင်းကို မဲထည့်ပေးပါ၊ မဲထည့်တဲ့နေရာမှာလည်း မမှားနဲ့နော်  ပယ်မဲဖြစ်အောင်လည်း မလုပ်ပါနဲ့၊ ကျွန်မတို့မဲတွေက ပယ်မဲဖြစ်ဖို့ လွယ်ပါတယ်။ သေသေချာချာသတိထားပြီးတော၊ လက်ကမ်းစာစောင်တွေလည်း ကျွန်မတို့ဝေပါမယ်။ ဘယ်လိုမဲထည့်ရမယ်ဆိုတာ မဲထည့်တဲ့နေရာမှာ ပယ်မဲမဖြစ်အောင် ဘယ်လိုသတိထားရမယ်ဆိုတာကို ကိုယ်တိုင်တင်မက ကိုယ့်ရဲ့ အသိမိတ်ဆွေတွေကိုပါ ပညာပေးပြီးတော့ နှိုးဆော်ပေးကြပါလို့ ကျွန်မမေတ္တာရပ်ခံချင်ပါတယ်။

ကျေးဇူးတင်ပါတယ်။ အခုဆိုရင် နေကလည်းအင်မတန်ပူပါပြီ ပြည်သူတွေက တကယ်တော့ ကျွန်မကိုလာပြီးတော့ နားထောင်ဖို့အတွက် ကျွန်မကိုလာပြီတော့အားတွေနဲ့ ဖြည့်ဆည်းပေးတာဆိုတာကို ကျွန်မနားလည်ပါတယ်။ အဲဒီအတွက်လည်း အင်မတန်ကျေးဇူးတင်ပါတယ်။ ကျွန်မတို့ကို အနှစ်နှစ်ဆယ် ကျော်ထောက်ခံခဲ့တဲ့ ပြည်သူလူထု ကျွန်မတို့ကို အနှစ်နှစ်ဆယ်ကျော်  ရှင်သန်နိုင်အောင်လို့ ကာကွယ်ပေးခဲ့တဲ့ ပြည်သူလူထုကို ကျွန်မတို့များမကြာခင် ဆပ်နိုင်မယ့် အခွင့်အရေးရနိုင်မယ်လို့ မျှော်လင့်ပါတယ်လို့ ပြောရင်းနဲ့ နိဂုံးချုပ်ပါတယ်။     ။

 ဖေဖေါ်ဝါရီ ၇၊ ၂၀၁၂ (YPI)